پاۆلوداردا شاكەن ايمانوۆتىڭ ءومىرى جايىندا جازىلعان «سۇڭعىلا» كىتابى جارىق كوردى
پاۆلودار. KAZINFORM - كىتاپ قازاق كينوسىنىڭ اتاسى شاكەن ايمانوۆتىڭ 110 جىلدىعىنا وراي باسىلدى. وندا قازاقتىڭ بەلگىلى تۇلعالارىنىڭ ەستەلىكتەرى مەن ماقالالارى توپتاستىرىلعان.
«بۇل كىتاپتا نەگىزىنەن وتكەن عاسىردىڭ 60-70- جىلدارى باسپا ءسوز بەتتەرىندە جارىق كورگەن ماقالالاردى، كىتاپتارداعى كەيبىر ەستەلىكتەردى توپتاستىردىق. كەلەر ۇرپاق شاكەن اعامىزدىڭ قانداي ادام بولعانىن، ونىڭ ءومىرىنىڭ قالاي ورىلگەنىن ءبىلسىن دەگەن نيەتتەن تۋىپ وتىر. جيناققا ولجاس سۇلەيمەنوۆ، ءابىش كەكىلبايەۆ، ءاسانالى ءاشىموۆ، بيبىگۇل تولەگەنوۆا، اكىم تارازي، اشىربەك سىعاي جانە شاكەن ايمانوۆپەن يىق تىرەسىپ جۇمىس ىستەگەن وزگە دە ونەر قايراتكەرلەرىنىڭ ەستەلىك ماقالالارى ەندى. كولەمى 345 بەت بولىپ شىقتى. شاكەن اعا قانداي فيلم تۇسىرسە دە، ۇلتتىق قۇندىلىقتاردى دارىپتەگەن. وسى ەرەكشەلىكتەردى نەگىزگى ۇستانىم ەتىپ، كىتاپتىڭ بايانىنا سىڭىردىك»، - دەپ اتاپ ءوتتى كىتاپتىڭ قۇراستىرۋشىسى، فيلولوگيا عىلىمدارىنىڭ كانديداتى، تورايعىروۆ ۋنيۆەرسيتەتىندەگى بەكماحانوۆ اتىنداعى ولكەنىڭ تاريحى مەن مادەنيەتىن زەرتتەۋ ورتالىعىنىڭ ديرەكتورى امانتاي قۇدابايەۆ.
كىتاپتىڭ تۇساۋكەسەرىنە وراي شاكەن ايمانوۆتىڭ 110 جىلدىعىنا ارنالعان حالىقارالىق عىلىمي-پراكتيكالىق كونفەرەنتسيا ءوتتى. وعان پاۆلودار وبلىسىنىڭ اكىمى اسايىن بايحانوۆ، قازاقستاننىڭ ەڭبەك سىڭىرگەن قايراتكەرى، كينورەجيسسەر، سەناريست، پروديۋسەر، قازاق ۇلتتىق ونەر ۋنيۆەرسيتەتىنىڭ پروفەسسورى سلامبەك تاۋەكەل، قازاقستان رەسپۋبليكاسىنىڭ ەڭبەك سىڭىرگەن ءارتىسى شاحيماردان ءابىلوۆ، تەاتر جانە كينو اكتەرى ەرگەنباي ءابۋ جانە تورايعىروۆ ۋنيۆەرسيتەتىنىڭ عالىمدارى قاتىستى.
ال بۇقار جىراۋ اتىنداعى ادەبيەت جانە ونەر مۋزەيى ش. ايمانوۆ پەن كاۋكەن كەنجەتايەۆتىڭ شىعارماشىلىعى مەن ءومىرى جايىندا كورمە ۇسىندى.
