پاۆلوداردا داۋىلعا بايلانىستى باسقارما باسشىسى قىزمەتىنەن بوساتىلدى

پاۆلودار وبلىسىنىڭ اكىمى ەنەرگەتيكا جانە تۇرعىن ءۇي- كومۋنالدىق شارۋاشىلىق باسقارماسىنىڭ باسشىسى ەرجان سالحانوۆتى قىزمەتىنەن بوساتتى. شەشىم داۋىل سالدارىن جويۋعا ارنالعان ءماجىلىس بارىسىندا جاريالاندى، دەپ حابارلايدى Kazinform.

قاراشانىڭ 18-نەن 19-نا قاراعان ءتۇنى پاۆلودار وبلىسىندا كۇشتى جەل 83 الەۋمەتتىك نىساننىڭ شاتىرىپ جۇلىپ كەتتى. سونداي- اق 63 كوپقاباتتى جانە 80-نەن استام جەر ۇيگە زاقىم كەلىپ، 18 اۋىل وسى ۋاقىتقا دەيىن جارىقسىز وتىر.

تابيعاتتىڭ دۇلەي كۇشىنىڭ سالدارىمەن كۇرەسۋ جانە زاقىم كەلگەن نىسانداردى قالپىنا كەلتىرۋ ءۇشىن وبلىستىڭ 9 اۋدانىندا تابيعي اپاتقا بايلانىستى توتەنشە جاعداي جاريالاندى.

بۇل تۋرالى رەسمي تۇردە كۇندىز جاريالانىپ، كەشكىسىن اكىمدىكتە ءماجىلىس ءوتتى.

جينالىس قورىتىندىسى بويىنشا ەرجان سالحانوۆ وزىنە سەنىپ تاپسىرىلعان سالانى باقىلاۋدى السىرەتىپ العانى ءۇشىن قىزمەتىنەن بوساتىلدى.

سونىمەن قاتار ءوڭىر باسشىسى اسايىن بايحانوۆ قالا، اۋدان جانە كەيبىر وبلىستىق ۆەدومستۆولاردىڭ جۇمىسىنا قاناعاتتانبايتىنىن جەتكىزدى. سوعان قاراماستان وزگە شەنەۋنىكتەر ءوز ورىندارىندا قالدى.

اسايىن بايحانوۆ مونوپوليستىڭ جۇمىسىن دا سىنادى. اكىمگە ەلەكتر قۋاتىن قالپىنا كەلتىرۋ جۇمىستارى ۇنامايدى. وسى سەبەپتى اسايىن بايحانوۆ «پاۆلودارەنەرگو» ا ق باس ديرەكتورى ولەگ شەمەلدى قالىپتاسقان جاعدايمەن جەكە اينالىسۋدى تاپسىردى.

«مىنە، 18 اۋىلدىڭ ەلەكتر قۋاتىنسىز وتىرعانىنا ءۇش تاۋلىك بولدى. بۇل دەگەنىڭىز ولار ءۇش تاۋلىك بويى جارىقسىز، بايلانىسسىز وتىر دەگەن ءسوز، كەيبىرىندە ءتىپتى سۋ دا جوق. كوپتەگەن تۇرعىندار ۇزاق جاناتىن پەش پەن سۋ سوراتىن ناسوستاردى قولدانادى. ولار ەلەكتر قۋاتىنسىز جۇمىس ىستەمەيدى. مەن شۇعىل تۇردە قالپىنا كەلتىرۋ جۇمىستارىن قايتا قۇرىپ، وعان وزگە كۇشتەردى دە تارتۋدى تاپسىرامىن. ەگەر قولدارىڭىزدان كەلمەسە بىزدەن كومەك سۇراۋلارىڭىز كەرەك ەدى»، - دەدى وبلىس اكىمى «پاۆلودارەنەرگو» ا ق باسشىلىعىنا قاراتا ايتقان سوزىندە.

اۆتور

ايدار وسپاناليەۆ