پاۆلوداردا بۇيرەگىن ساتپاق بولعان شەتەلدىك ۇستالدى
پاۆلودار. KAZINFORM - ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى زاڭسىز ارەكەتتەردى توقتاتتى.
شىلدە ايىنىڭ ورتاسىندا جەدەل قىزمەتكەرلەرگە كورشى مەملەكەتتىڭ ازاماتىنىڭ بۇيرەگىن ساتۋ تۋرالى جەدەل اقپارات تۇسكەن. وسى ماقساتتا شەتەلدىك ايەل پاۆلودار قالاسىنا كەلىپ، باعا مەن شارتتاردى تالقىلاپ، ساتۋعا كەلىسىم بەرگەن.
- ۇ ق ق ك ب قىزمەتكەرلەرى كۇدىكتىنى كەلىسىلگەن اقشانىڭ ءبىر بولىگىن الۋ كەزىندە ۇستادى. اتالعان فاكت بويىنشا قىلمىستىق ءىس قوزعالدى. كۇدىكتى قاماۋعا الىندى. قاجەتتى تەرگەۋ ارەكەتتەرى جۇرگىزىلىپ جاتىر، - دەدى پاۆلودار وبلىسى پ د باستىعىنىڭ ءبىرىنشى ورىنباسارى بولات نۇرسەيىتوۆ.
سپيكەر قولدانىستاعى زاڭناماعا سايكەس قازاقستاندا زاڭسىز ترانسپلانتاتسيالاۋعا، سونداي-اق ادام اعزالارىنىڭ، مۇشەلەرىنىڭ، تىندەرىنىڭ جانە تىندەرىنىڭ بولىكتەرىن ساتۋ، ساتىپ الۋعا تىيىم سالىنعانىن جانە ول ءۇشىن قىلمىستىق جاۋاپكەرشىلىككە تارتىلاتىنىن ەسكە سالدى.
- پوليتسيا ازاماتتاردى وسىنداي فاكتىلەرگە كۋا بولعان جاعدايدا، «102» ارناسىنا نەمەسە «police 102» موبيلدى قوسىمشا ارقىلى حابارلاۋعا شاقىرادى. انونيمدىلىككە كەپىلدىك بەرىلەدى، - دەلىنگەن حابارلامادا.
