پاۆلوداردا 14 جاسار الەم چەمپيونى تۇرادى

پاۆلودار. KAZINFORM - پاۆلوداردا جان شىنعوجا اتتى 14 جاسار چەمپيون بالا تۇرادى. وسى ۋاقىتقا دەيىن جاس ءوسپىرىم بىرنەشە الەم چەمپيوناتىن باعىندىرعان.

جاننىڭ جاسى قازىر 14 كە تولدى. سپورتقا جانى قۇمار جاس ءوسپىرىم 21-ورتا مەكتەپتە ءبىلىم الادى. اجەسى باقتىلى التىباساروۆانىڭ ايتۋىنشا، نەمەرەسىنىڭ سپورتقا قىزىعۋشىلىعىن قازىرگى قازاقستان تاەكۆوندو GTF فەدەراتسياسىنىڭ پرەزيدەنتى قالەن سۇلتانعازين وياتىپتى. قالەن اعا پاۆلوداردا ءبىراز جىلدار تاەكۆوندو باپكەرى بولعانى ءمالىم. جاس ءوسپىرىمنىڭ بويىنداعى وتتى بايقاعان شەبەر ونى باۋلىپ، جارىستارعا اپارا باستاعان.

- جان - جالعىز ۇلىمنان تۋعان بەس نەمەرەمنىڭ ۇلكەنى. كىشكەنتايىنان مەنىڭ جانىمدا ءوستى. ەركەلەۋ ەدى، سپورتقا بارىپ ءتارتىپتى، جيناقى بولا تۇسكەنىن كورىپ ءماز بولدىق. قازىر قالاداعى «پرايد» كلۋبىندا جاتتىعىپ ءجۇر. الدا تەمىرتاۋدا وتەتىن قازاقستان چەمپيوناتى، ودان سوڭ شوتلانديادا بولاتىن الەم بىرىنشىلىگى تۇر. وسى جارىستارعا قاتىسىپ، باعىن سىنايتىن ويى بار. نەمەرەم وسى ۋاقىتقا دەيىن بىرنەشە الەم كۋبوگىنا، چەمپيوناتتارىنا قاتىسىپ، جۇلدەمەن ورالدى. بارلىق باسەكەلەردەن جيىنى 60 تان استام مەدال اكەلدى، - دەيدى اجەسى.

بۇگىنگە دەيىن جەتكەن جەتىستىكتەرى بارشىلىق. ماسەلەن، 2018 -جىلى ارمەنيا ەلىندە وتكەن جارىستا ەۋروپا كۋبوگىنىڭ كۇمىس جۇلدەگەرى، 2022 -جىلى كيپر رەسپۋبليكاسىنداعى بىرىنشىلىكتە ەۋرازيا كۋبوگىن يەلەنسە، سول جىلى ق ر چەمپيوناتىنىڭ جەڭىمپازى اتاندى. رەسەي ەلدەرىندە وتكەن اشىق چەمپيوناتتاردا قارسىلاس شاق كەلتىرمەدى. بۇگىندە بۇل سپورت تۇرىنەن قارا بەلبەۋدىڭ يەسى جانە سپورت شەبەرلىگىنە كانديدات.

- تۇڭعىشىمىز - ءبىزدىڭ وتباسىمىزدىڭ ماقتانىشى! ال سپورت كەز كەلگەن ادامنىڭ دەنىنىڭ ساۋلىعى ءۇشىن قاجەت. نەمەرەمنىڭ سپورتقا قىزىعۋشىلىعى جوعارى بولعانىنا قۋانامىن. قازىرگى تاڭدا تاەكۆوندوعا ۇزبەي بارىپ ءجۇر. جارىستاردا جەتىستىككە جەتىپ، ابىرويى اسقاقتاپ جاتسا، وندا ءبىزدىڭ مەرەيىمىزدىڭ تاسىعانى، - دەپ قوستى اجەسى.

جان شىنعوجا سپورتپەن قوسا وقۋدى دا قاتار الىپ ءجۇر. ۇستازدارى وقۋ ۇلگەرىمى جاقسى ەكەنىن جەتكىزدى.