پاۆلودار وبلىسىنداعى الاپات ءورت ءسوندىرىلدى

پاۆلودار. KAZINFORM - پاۆلودار وبلىسىنىڭ باياناۋىل اۋدانى اۋماعىنداعى تابيعي ءورت ءسوندىرىلدى. قازىر ءورتتىڭ اۋدانى انىقتالىپ جاتىر. بۇل تۋرالى ق ر توتەنشە جاعدايلار مينيسترلىگىنەن حابارلادى.

باسپا ءسوز قىزمەتىنىڭ حابارلاۋىنشا، باياناۋىل اۋدانى كۇركەلى اۋىلدىق وكرۋگىنىڭ اكىمى الىبەك ساپابەكوۆ جەلتاۋ اۋىلىنان قاۋىپسىز جەرگە كوشىرىلگەن تۇرعىندار ۇيلەرىنە ورالا باستاعانىن جەتكىزدى. ءبىراق ازىرشە ەلدى مەكەننەن ەۆاكۋاتسيالانعان 18 ادامنىڭ نەشەۋى قايتىپ ورالعانى تۋرالى ناقتى دەرەك جوق. ورتكە بايلانىستى شتاب جۇمىس ىستەپ، تىكۇشاقتار بارلاۋ جۇمىستارىن جۇرگىزىپ جاتىر.

جۇمات شانين اۋىلىندا قازىرگى ساتتە ەۆاكۋاتسيالىق پۋنكت جۇمىس ىستەپ تۇر. ەرىكتىلەر مەن جەرگىلىكتى ءماسليحات دەپۋتاتتارى قۇتقارۋشىلارعا ازىق-تۇلىك، قاجەتتى زاتتارىن جەتكىزىپ بەرگەن.

ەسكە سالا كەتەيىك، 6-قازان كۇنى باياناۋىلدا دالالىق ايماقتان ءورت شىعىپ، ءبىر اۋىلدىڭ تۇرعىندارى قاۋىپسىز اۋماققا كوشىرىلدى.

ال 7-قازان كۇنى تۇسكە تامان پاۆلودار وبلىسىنىڭ اكىمى باياناۋىلداعى ءورتتىڭ وقشاۋلانعانىن حابارلادى.

كەشەگى دەرەك بويىنشا باياناۋىلدا ءورت شالعان جەرلەردىڭ اۋماعى 10 مىڭ گەكتارعا جەتكەن.