پاۆلودار وبلىسىندا 30 مىڭنان اسا كيىك بار
پاۆلودار. KAZINFORM - اڭشىلىق شارۋاشىلىقتاردىڭ مالىمەتتەرى بويىنشا وڭىردەگى بارلىق جابايى جانۋاردىڭ جالپى سانى 833 مىڭنان اسادى.
ەرتىس-بايان وڭىرىندە اقبوكەندەردىڭ ماۋسىمدىق كوشى- قونى بايقالىپ وتىر.
- وبلىستا جالپى اۋماعى 9 ميلليون گەكتاردان استام القاپتا 36 اڭشىلىق شارۋاشىلىعى بار. بۇل جەرلەردە سيرەك كەزدەسەتىن جانە جوعالىپ كەتۋ قاۋپى بار تۇياقتى جابايى جانۋار - كيىكتەردىڭ ماۋسىمدىق كوشىپ- قونۋى بايقالادى. كيىكتەردىڭ سانى شامامەن 30 مىڭنان اسادى جانە ولار جىل وتكەن سايىن كوبەيىپ كەلەدى. جانۋارلار باياناۋىل اۋدانىنىڭ قاراعاندى وبلىسىمەن شەكارالاس جەرلەرىن جانە ماي اۋدانىن مەكەندەيدى. كيىكتى اتۋعا رۇقسات جوق. قازىرگى ۋاقىتتا تەك ءسىبىر ەلىگى، قابان، بايباق سۋىرى، اق قويان، سۇر قويان، تۇلكى، قارساق، بورسىق، ۇيرەكتەر مەن قازداردىڭ بارلىق تۇرىنە، سۇر كەكىلىك، قاسقالداق، بودەنە، قۇمسالعىش، كوگەرشىن، قاراقۇيرىقتارعا اڭشىلىق جاساۋعا بولادى، - دەپ حابارلادى Kazinform تىلشىسىنە ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ ءبولىم باسشىسى دياس قابدوللا.
پاۆلودار وبلىسىندا سيرەك كەزدەسەتىن جانە جوعالىپ كەتۋ قاۋپى بار جانۋارلاردىڭ 16 ءتۇرى مەكەندەيدى. ولار - تاۋ ارقارى، ورمان سۋسارى، قارا دەگەلەك، اق باس تىرنا، تازتىرنا، بەزگەلدەك، قاراباس وگىز شاعالا، سۇڭقىلداق اققۋ، بالىقشى تۇيعىن، دالا قىرانى، قاراقۇس، بۇركىت، اقيىق سۋبۇركىت، اق قۇيرىقتى سۋبۇركىت، يتەلگى، ۇكى، سۋسارى. بۇلاردى جالپى سانى 2200 دەن اسادى. ونىڭ شامامەن 771 ءى ارقارلار.
ەسكە سالا كەتەيىك، باياناۋىل ۇلتتىق پاركىندە بۇلان كوبەيە تۇسكەن.
ەرتىس بويى ورمان شارۋاشىلىقتارىنىڭ ورتكە قارسى الەۋەتى ءالسىز.
