التىن وردا داۋىرىنە ءتان سيرەك كەزدەسەتىن كونە كۇمىس تيىندار تابىلدى
اقتوبە. KAZINFORM - ح. دوسمۇحامەدوۆ اتىنداعى اتىراۋ ۋنيۆەرسيتەتىنىڭ ارحەولوگتارى قازبا جۇمىستارى بارىسىندا ورتا عاسىرعا ءتان كونە كۇمىس تيىندار تاپتى. ارحەولوگيالىق قازبا اتىراۋ قالاسى ماڭىنداعى «اقتوبە- لاەتي» قالاشىعىنا جۇرگىزىلگەن. بۇل تۋرالى عىلىم جانە جوعارى ءبىلىم مينيسترلىگى ءمالىم ەتتى.
كونە تيىن جوشى ۇلىسىندا قۇرىلعان التىن وردا مەملەكەتىنىڭ بيلەۋشىسى مەڭگۋ-تەمىر حان تۇسىندا قۇيىلعان اقشالار توبىنا جاتادى. رەسەيلىك نۋميزماتيكا پروفەسسورى مونەتانىڭ بەدەرلى تاڭبالارىن وقىپ، قۇندىلىعىن اسا جوعارى باعالاعان.
- بۇل تيىندار بەلگىلى نۋميزماتيك عالىم پاۆەل نيكولايەۆيچ پەتروۆتىڭ پايىمداۋىنشا ⅩⅢعاسىردىڭ ەكىنشى جارتىسىنا سايكەس كەلەدى. قۇيما اقشانىڭ ءبىر بەتىندە مەڭگۋ- تەمىر حاننىڭ تاڭبالارى، ەكىنشى جاعىندا قىتاي يەروگليفتەرى بەينەلەنگەن. ونىڭ سەبەبى شىڭعىسحاننان تاراعان قۇبىلاي ۇرپاقتارى مەن شاعاتاي ۇلىسى اراسىندا قاقتىعىستاردا قولعا تۇسكەن ساياسي تۇتقىن نومۋحانمەن بايلانىستىرادى، - دەيدى ارحەولوگ امانگەلدى مۇعاۋ ۇلى.
سونىمەن قاتار ارحەولوگ قازبادان تاعى كورنەكتى ارتەفاكت «تاعارا» ىدىسى دا ءبۇتىن كۇيىندە تابىلعانىن ايتادى.
- بيىل تاريحي قالاشىقتى قازۋعا اتىراۋ وبلىستىق تاريحي-مادەني مۇرالاردى زەرتتەۋ ورتالىعى تاپسىرىس بەرگەن. «سوڭعى ەكى- ءۇش جىلدىقتا بۇل جەرگە ەرەكشە كوڭىل ءبولىپ جاتىرمىز. قالاشىقتىڭ 53 گەكتار اۋماعى تولىقتاي قورشالدى. بولاشاقتا اشىق اسپان استىنداعى مۋزەيگە اينالدىرۋدى جوسپارلاپ وتىرمىز، - دەيدى وبلىستىق تاريحي-مادەني مۇرالاردى زەرتتەۋ ورتالىعىنىڭ باسشىسى تولىباي دوستىبايەۆ.
ارحەولوگيالىق زەرتتەۋگە اتىراۋ ۋنيۆەرسيتەتىنىڭ تاريحشى ماماندىعىندا وقيتىن ستۋدەنتتەر دە قاتىسقان. بۇگىندە كونە قالاشىقتىڭ 500 شارشى مەتر اۋماعىنان ارشىپ العان ارتەفاكتىلەر وقۋ ورداسىنىڭ زەرتحاناسىندا تەرەڭ زەرتتەلەدى دەپ جوسپارلانىپ وتىر.
ەسكە سالا كەتەيىك، بۇعان دەيىن ارحەولوگيا جانە قازبا جۇمىستارىمەن 20 جىلدان استام اينالىسىپ جۇرگەن الكەي مارعۇلان اتىنداعى ارحەولوگيا ينستيتۋتى ەرتە مەتالل ارحەولوگيا ءبولىمىنىڭ باسشىسى، Phd، اعا عىلىمي قىزمەتكەر ءارى تراسولوگ البينا ەرجانوۆا زاماۋاني ارحەولوگيا مەن ونداعى ايەلدەردىڭ ورنى تۋرالى ايتىپ بەرگەن ەدى. تولىعىراق مىنا سىلتەمەدەن وقي الاسىز.
اۆتور
باقىتگۇل اباي قىزى
