«التىن حانىم»: قازاقستاندا مىقتى ايەلدەر كوپ

استانا. KAZINFORM - بىرنەشە كۇن بۇرىن «التىن حانىم» بايقاۋىنىڭ جەڭىمپازى انىقتالعان ەدى. جوباعا بيىل مىڭداعان ايەل قاتىسىپ، 35 مىڭنان استام ادام داۋىس بەردى. حالىقتىڭ شىنايى ىقىلاسىنا بولەنىپ، ۇزدىك اتانعان سامال اسانوۆا جوبادان العان اسەرىمەن ءبولىستى.

- ءبىز كۇندەلىكتى جۇمىسىمىزدى ىستەپ جاتقان كەزدە وقىرماندارىم «التىن حانىم» بايقاۋىنا بارىڭىزشى، ءسىز لايىقسىز» دەپ جازدى. سول وقىرماندارىمنىڭ حاتى ارقىلى ءوز باعىمدى سىناپ كورەيىن دەگەن شەشىمگە كەلدىم. مەنىڭ قانداي دا ءبىر ونەرىم جوق. جالپى بۇل جوبا شىعارماشىلىقتى سىنايتىن سايىس ەمەس. سەنىڭ قوعامعا قانداي پايداڭ، سەپتىگىڭ ءتيىپ جاتىر، وسى جاعىنان باق سىنايسىڭ. بەلگىلى ءبىر جەتىستىكتەرگە جەتىپ، قازاقستاندىق ايەلدەرگە شابىت بەرە الاتىنداي جان جەڭىمپاز اتانۋى كەرەك بولعان. سول ءۇشىن بۇل جوبا مەنىڭ جۇرەگىمە جاقىن بولدى. مەن سول ءۇشىن عانا قاتىسقىم كەلدى. سەبەبى مەنىڭ بولىسەرىم وتە كوپ. مەن وسى جولدارمەن ءجۇرىپ وتكەننەن كەيىن، نەگە ءوز ءومىر جولىممەن، تاجىريبەممەن ءبولىسىپ، قازاقستاننىڭ ايەلدەرىنە شابىت بەرمەسكە دەگەن ويعا كەلدىم، - دەيدى جارىس جەڭىمپازى Jibek Joly ارناسىنىڭ «بۇگىنE LIV» باعدارلاماسىنا بەرگەن سۇحباتىندا.

بايقاۋعا قاتىسۋعا ءوتىنىش بىلدىرگەن 400-دەن استام ادامنىڭ اراسىنان 26 ايەل ىرىكتەلىپ شىققان.

- جوبادا ەڭ باستى تالاپ - 30 جاستان اسقان بولۋى كەرەك. جانە وتتان دا، سۋدان دا وتكەن، ومىردە قانداي دا ءبىر جەتىستىككە، جەڭىسكە جەتكەن جانە سول جەتىستىگىن وزگەلەرمەن بولىسە الاتىن وقيعاڭ بولۋى كەرەك دەدى. جانە بايان حانىم ارنايى كاستينگ جاريالاعان ەدى. كاستينگتە 400-دەن استام وقيعانى وقىپ، ءوزى دە قاتتى قينالىپ كەتكەن ءتارىزدى. ويتكەنى قازاقستاندا سونداي مىقتى ايەلدەر وتە كوپ ەكەن. سولاردىڭ اراسىنان 26 ايەلدى تاڭداپ، ىرىكتەدى. جانە ءبىزدى جيناپ، شوۋ جاسايتىنىن ايتىپ، بىزگە بارلىق ونەرلەرىڭىزدى كورسەتىڭىزدەر دەپ تالاپ قويدى، - دەيدى سامال اسانوۆا.

بايقاۋ جەڭىمپازى ستۋديادا ءوزىن ۇزدىك بولۋعا جەتەلەگەن وقيعاسىمەن ءبولىستى.

- مەن 0 دەن باستاپ، 5 جىلدىڭ ىشىندە 600 دەن اسا ادامعا جۇمىس بەرىپ وتىرمىن. ارينە، مۇنىڭ ءبارى ۇلكەن ەڭبەك. العاشىندا اقتوبە قالاسىنان باستادىم. قازىرگى تاڭدا 3 قالادا 50 دەن اسا دۇكەنىم جۇمىس ىستەپ جاتىر. مەن كونديتەرلىك ونىمدەر دايىنداپ، ساتامىن. مەن اجىراسىپ، 2 جاسار ۇلىممەن اقتوبەگە قايتىپ كەلىپ وتىرعان كەزىم ەدى. قاراجات جاعىنان قينالىپ ءجۇردىم. العاشقى تورتىمدى 30 جاسىمدا ءپىسىرىپ، وزىمە سول ءىس ۇناپ، حوببي رەتىندە عانا 1- 2 جىل جاساپ ءجۇردىم.

نەگىزى ءوزىم ]قازتەلەراديو} كومپانياسىندا باس مامان بولىپ جۇمىس ىستەيتىنمىن. ءبالىش ءپىسىرۋ دەگەن دۇنيەنى ءتىپتى تۇسىنبەيتىنمىن دە. سولاي جاساپ باستاعان سوڭ، سونىڭ قىزىعىنا ءتۇسىپ، 32 جاسىمدا العاشقى دۇكەنىمدى اشتىم. ءوزىم نەسيە الىپ، جوقتان بار جاسادىم دەسەم دە بولادى. كىشكەنتاي پەشپەن، كىشكەنتاي ميكسەرمەن بىرتىندەپ باستادىم. بۇل جەردە قارجىلىق ساۋاتتىلىق اسا ماڭىزدى. مەن فيزيكا-ماتەماتيكا سالاسىن بىتىرگەنمىن. سول ءبىلىمىمنىڭ سەپتىگى ءتيدى. اقشانى از كەزىنەن باستاپ دۇرىس قولدانۋ، جيناۋ ارقىلى ارى قاراي ءوسىرىپ وتىردىم. سولاي دۇكەندەرىم دە كوبەيە ءتۇستى، - دەيدى كاسىپكەر.

سامال اسانوۆا جوبادا جەڭىمپاز اتانۋ ءۇشىن 100 پايىز دايىندىقپەن كەلگەنىن ايتادى.

- مەن قانداي دا ءبىر ءىستى قولىما السام، 100 پايىز جاساماي توقتاي المايتىن قاسيەتىم بار. مەندە جاۋاپكەرشىلىك سەزىمى بالا كەزىمنەن وتە جوعارى. ارينە، ءار قاتىسۋشى ءوزىن جەڭىمپاز كورىپ قاتىسادى عوي. سوندىقتان بۇل جۇلدەگە بارلىعى دا لايىقتى. ءبىراق مەن دە ىشتەي وزىمە قالاي بولعاندا دا ءبارىن 100 پايىز جاسايمىن دەگەن ۇستانىم قويدىم، - دەيدى ول.

ستۋديا قوناعى وزگە قاتىسۋشىلاردىڭ دا وقيعاسى وزىنە قاتتى اسەر ەتكەنىن جەتكىزدى.

- ءار انا، وزگە ءبىر انانى تۇسىنەدى. سول جوبادا 25 جىل بالاسىن كورمەگەن انانىڭ وقيعاسى جۇرەگىمە اۋىر ءتيدى. جانە بالالارىنان ايىرىلعان 2 كەلىنشەك بولدى. ول از دەسەڭىز، جولداستارى دا سول كەزدە تاستاپ كەتكەن ەكەن. ناعىز قينالعان ساتتەرىندە ەشقانداي قولداۋسىز قالىپ قويعان ايەلدەر قاتىستى. سول وقيعالار جۇرەگىمە قاتتى ءتيدى. سەبەبى بالا دەسە ءار ايەل تۇسىنەدى دەپ ويلايمىن. سوعان قاراماستان، ول ايەلدەر اياققا نىق تۇرىپ، جەتىستىككە جەتىپ وتىر، - دەيدى بايقاۋ جەڭىمپازى.

كاسىپكەر وسى جوبادان سوڭ ءوزىنىڭ دە وزگەلەرگە شابىت بەرە الاتىنىن تۇسىنگەن ەكەن.

- مەنىڭ وسى بايقاۋ ارقىلى تۇسىنگەنىم - مەن وزگەلەردى دە شابىتتاندىراتىن بەينەماتەريالدار تۇسىرە باستادىم. وعان دەيىن تەك قانا جۇمىس تۋرالى ۆيدەو جاريالايتىنمىن. بۇعان دەيىن مەندە «مەن ادامدارعا شابىت بەرەمىن بە؟» دەگەن سۇراق بولماعان. ال جوبا بارىسىندا بىزگە الەۋمەتتىك جەلىدە بەلسەندى بولىپ، وسىنداي روليكتەر تۇسىرىڭىزدەر دەگەننەن كەيىن مەن ايەلدەردىڭ رۋحىن كوتەرەتىن كوپتەگەن كونتەنتتەر ءتۇسىردىم. سول كەزدە كوپ ايەلدەردەن حاتتار كەلىپ جاتتى. ولار ماعان قينالىپ، نە ىستەرىن بىلمەي جۇرگەندەرىن ايتىپ، مەنىڭ پودكاستىمدى كورگەننەن جىگەر العاندارىن جەتكىزدى. سول حاتتاردى العاننان كەيىن مەن دە قايتا شابىتتانا باستادىم. نەگە تاعى دا وسىنداي ماستەر- كلاسستار، ترەنينگتەر وتكىزىپ، ءوز تاجىريبەممەن بولىسپەسكە دەگەن ويعا كەلدىم، - دەيدى سامال اسانوۆا.

«التىن حانىم» بايقاۋىنىڭ باس جۇلدەسى - Chery ماركالى اۆتوكولىك. جەڭىمپاز بۇل سىيلىقتى اناسىنا تابىستاپتى.

- ءبىزدىڭ ەڭ باستى قولداۋشىمىز - انامىز عوي. مەن اتا-انامىزدى ءاردايىم قولداپ جۇرەيىك دەپ ايتقىم كەلەدى. ءبىز ەشقانداي دۇنيەنى انا ومىرگە الىپ كەتپەيمىز. سوندىقتان قاسىمىزدا جۇرگەن جاقىندارىمىزدى باعالايىق. ءبىزدىڭ وسىلاي جۇرگەنىمىز - انامىزدىڭ باتاسىنىڭ ارقاسى. مەن قۋانىشىمدى ەڭ اۋەلى اناممەن بولىسكىم كەلدىم. سول ءۇشىن «التىن حانىم» جوباسىنان جەڭىپ العان كولىگىمدى اناما سىيلادىم. انام قاتتى قۋاندى. بۇل ول ءۇشىن ۇلكەن ماقتانىش قوي. مەن ەڭ ءبىرىنشى انامنىڭ ەل اراسىنداعى ابىرويىن كوتەرگىم كەلدى. ءبىراق، ەندى انامدى كولىك جۇرگىزۋگە ۇيرەتۋگە تۋرا كەلەدى، - دەيدى ستۋديا قوناعى.

سامال اسانوۆا «قازىرگى قازاق ايەلدەرى قانداي بولۋ كەرەك؟ » دەگەن ساۋالعا دا جاۋاپ بەردى.

- وكىنىشكە قاراي، مەن اجىراسقان ايەلمىن. ءبىراق مەن وتباسىن ساقتاپ قالعان ايەلدەردى وتە قاتتى قۇرمەتتەيمىن. قازىرگى قازاق ايەلى تەك ءۇي شارۋاسىمەن وتىرا بەرمەي، ءبىلىم دە الا ءبىلۋ كەرەك. سەن ءبىلىمدى بولساڭ، سەنىڭ وسى قاسيەتىڭ بالالارىڭا دا بەرىلەدى. قازىرگى زامانعا لايىقتى ايەل - وتباسى مەن كاسىبىن قاتار الىپ جۇرە الاتىن ايەل دەپ ەسەپتەيمىن، - دەيدى ول.

اۆتور

ارۋجان ماحمۋت