«التىن دالا» باستاماسى 2024 -جىلعى The Earthshot Prize ەكولوگيالىق سىيلىعىن جەڭىپ الدى
استانا. KAZINFORM -قازاقستاننىڭ دالا ەكوجۇيەلەرىن قورعاۋعا باعىتتالعان «التىن دالا» باستاماسى 2024 -جىلعى The Earthshot Prize ەكولوگيالىق سىيلىعىنىڭ «تابيعاتتى قورعاۋ جانە قالپىنا كەلتىرۋ» نوميناتسياسىندا جەڭىسكە جەتتى.
ق ر ەكولوگيا جانە تابيعي رەسۋراستار مينيتسرلىگى باسپا ءسوز قىزمەتىنىڭ حابارلاۋىنشا، بۇل ماراپات قازاقستانداعى كيىكتەردىڭ پوپۋلياتسياسىن قالپىنا كەلتىرۋ مەن ەرەكشە قورعالاتىن ايماقتارىن كەڭەيتۋ سالاسىنداعى ەلەۋلى جەتىستىكتەردى مويىندادى.
«التىن دالا» باستاماسى 2005-جىلى قازاقستان رەسپۋبليكاسى ەكولوگيا جانە تابيعي رەسۋرستار مينيسترلىگى، قازاقستان بيوالۋانتۇرلىلىكتى ساقتاۋ اسسوتسياتسياسى (ا س ب ك)، «Fauna Flora International» ۇيىمى، فرانكفۋرت زوولوگيالىق قوعامى (FZS) جانە كورولدىك قۇستاردى قورعاۋ قوعامى (RSPB) اراسىندا ۇزاق مەرزىمدى سەرىكتەستىك رەتىندە قۇرىلدى. سەرىكتەستەردىڭ نەگىزگى ماقساتى- كيىكتەردىڭ پوپۋلياتسياسىن قالپىنا كەلتىرۋ جانە قازاقستان دالالارىن ساقتاۋ.
قورىق ايماقتارىن قۇرۋ مەن كەڭەيتۋ، سيرەك كەزدەسەتىن تۇرلەردىڭ پوپۋلياتسيالارىن قالپىنا كەلتىرۋ جانە براكونەرلىككە قارسى كۇرەس بويىنشا اۋقىمدى شارالار قولعا الىنعان. ناتيجەسىندە، 2003 -جىلى 21000 باستى قۇراعان قازاقستانداعى كيىك پوپۋلياتسياسى 2024 -جىلى 2,8 ميلليونعا جەتىپ، الەمدەگى سۇتقورەكتىلەردى قالپىنا كەلتىرۋدىڭ ەڭ تابىستى مىسالدارىنىڭ بىرىنە اينالدى.
قازاقستان رەسپۋبليكاسى ەكولوگيا جانە تابيعي رەسۋرستار مينيسترلىگى ورمان شارۋاشىلىعى جانە جانۋارلار دۇنيەسى كوميتەتىنىڭ ءتوراعاسى دانيار تۇرعامبايەۆ: «مينيسترلىك پەن سەرىكتەستەرىمىزدىڭ ورتاق كۇش-جىگەرى الەمدىك دەڭگەيدە تانىلعانىنا قۋانىشتىمىز. بۇل ماراپات قازاقستانداعى تابيعاتتى قورعاۋ باستامالارىن كەڭەيتۋگە دەگەن ءبىزدىڭ ۇستانىمىمىزدى نىعايتادى»، - دەدى.
«التىن دالا» باستاماسىنىڭ تاعى ءبىر ماڭىزدى جەتىستىگى - سيرەك جانە جويىلىپ بارا جاتقان تۇرلەردىڭ، سونىڭ ىشىندە دالا بۇركىت، اقسۇڭقار جانە قۇلاننىڭ پوپۋلياتسيالارىن قالپىنا كەلتىرۋ بويىنشا جۇرگىزىلىپ جاتقان جۇمىستار. بۇل جۇمىس قازاقستاننىڭ ورتالىق وڭىرىندەگى قورىق ايماقتارىندا بەلسەندى تۇردە جۇرگىزىلۋدە. 2024 -جىلى قۇلاننىڭ وسى وڭىرگە قايتا اكەلىنۋى بويىنشا جوبانىڭ ءساتتى اياقتالعانىن حابارلاندى.
