التىن باعاسى تومەندەپ، قورى ارتتى

استانا. KAZINFORM - قازاقستان ۇلتتىق بانكىنىڭ مالىمەتىنشە، 31-شىلدە كۇنى ءبىر گرام التىن 58524,25 تەڭگە تۇرادى، دەپ جازدى Kazinform ءتىلشىسى.

وتكەن بەيسەنبى، 24-شىلدە كۇنى، قىمبات مەتالدىڭ قۇنى شامامەن 59402 تەڭگە بولعان.

دۇنيەجۇزىلىك التىن كەڭەسىنىڭ (World Gold Council) حابارلاۋىنشا، قازاقستاننىڭ التىن قورى 7,4 تونناعا ارتقان. وسىلايشا، ەلدىڭ رەزەرۆىندەگى جالپى التىن كولەمى 298 توننادان استى. حالىقارالىق ۆاليۋتا قورى مەن ەۋروپالىق ورتالىق بانكتى ەسەپكە الماعان كەزدە، قازاقستان التىن قورى بويىنشا الەمدە 18-ورىندا تۇر.

ايتا كەتەيىك، ونەركاسىپ جانە قۇرىلىس مينيسترلىگى ەلدىڭ پايدالى قازبالارمەن قامتاماسىز ەتىلۋ مەرزىمدەرى تۋرالى جاڭارتىلعان مالىمەتتەردى جاريالادى. سوڭعى دەرەكتەرگە سايكەس، قازىرگى ءوندىرىس كولەمىن ەسكەرە وتىرىپ، قازاقستانداعى التىن قورى 30 جىلعا جەتەدى.

استانادا بانكتىك التىننىڭ قالاي وندىرىلەتىنى تۋرالى مىنا سىلتەمەدەن وقىڭىز.

بۇعان دەيىن 2025 -جىلدىڭ ءبىرىنشى توقسانىندا قازاقستاندا مىس، نيكەل، كومىر، التىن جانە سيرەك جەر مەتالدارى بار 38 پەرسپەكتيۆالى ۋچاسكە انىقتالعانى حابارلانعان بولاتىن.

دۇنيەجۇزىلىك التىن كەڭەسىنىڭ (World Gold Council) دەرەكتەرىنە سايكەس، 2025 -جىلدىڭ العاشقى توقسانىندا التىنعا جالپى سۇرانىس جىلدىق كورسەتكىش بويىنشا %1 عا ارتىپ، 1206 تونناعا جەتتى - بۇل 2016 -جىلدان بەرگى ءبىرىنشى توقسانداعى ەڭ جوعارى كورسەتكىش.

ورتالىق بانكتەر العاشقى توقساندا 244 توننا التىن ساتىپ العان - بۇل الدىڭعى توقسانعا قاراعاندا از.

سونداي-اق، التىننان جاسالعان زەرگەرلىك بۇيىمدارعا دەگەن سۇرانىس رەكوردتىق باعالارعا بايلانىستى كۇرت تومەندەدى: كولەمى 2020 -جىلدان بەرگى ەڭ تومەن دەڭگەيگە جەتتى. الايدا، اقشالاي ماندە التىن زەرگەرلىك بۇيىمدارعا تۇتىنۋشىلىق شىعىندار جىلدىق ەسەپپەن %9 عا ءوسىپ، $35 ميللياردتى قۇرادى.

قازاقستاندا ۇلتتىق ستاتيستيكا بيۋروسىنىڭ دەرەكتەرىنە سايكەس، 2024 -جىلى التىن بۇيىمداردىڭ باعاسى %8,3 عا قىمباتتاعان.