التىن باعاسى رەكوردتىق دەڭگەيگە جەتتى

استانا. KAZINFORM - التىن باعاسى تاعى دا رەكورد جاڭارتىپ، 3100 دوللاردان استى، دەپ حابارلايدى Reuters.

دۇيسەنبىدە التىننىڭ باعاسى ءبىر ۋنتسيا ءۇشىن 3106,50 دوللاردى قۇراپ، رەكوردتىق دەڭگەيگە جەتتى.

ا ق ش پرەزيدەنتى دونالد ترامپتىڭ تاريفتەرىنە جانە گەوساياسي تۇراقسىزدىقپەن بىرگە ىقتيمال ەكونوميكالىق قۇلدىراۋعا قاتىستى الاڭداۋشىلىق ينۆەستيتسيانىڭ بۇل اكتيۆكە جاڭا تولقىنىنا اكەلدى، دەپ جازدى Reuters.

التىن جىل باسىنان بەرى 18 پايىزدان استام قىمباتتادى. وسى ايدىڭ باسىندا باعا العاش رەت ۋنتسيا ءۇشىن 3 مىڭ دوللاردان استى. ساراپشىلار بۇنى ەكونوميكالىق تۇراقسىزدىق، گەوساياسي شيەلەنىس پەن ينفلياتسياعا قاتىستى ءوسىپ كەلە جاتقان الاڭداۋشىلىقپەن بايلانىستىرىپ وتىر.
سونىمەن قاتار، التىن باعاسىنىڭ كوتەرىلۋى ءبىرقاتار بانكتەردى ءوز بولجامدارىن كوتەرۋگە يتەرمەلەدى.

Goldman Sachs, Bank of America جانە UBS وسى ايدا التىننىڭ ماقساتتى باعالارىن كوتەردى.

Goldman بولجامىنشا، جىل سوڭىنا دەيىن باعا ۋنتسيا ءۇشىن 3300 دوللارعا جەتەدى، بۇل ونىڭ بۇرىنعى 3100 دوللار بولجامىنان جوعارى. Bank of America 2025 -جىلى ۋنتسيا ءۇشىن باعا 3063 دوللار جانە 2026 -جىلى 3350 دوللار بولادى دەپ بولجايدى، ونىڭ بۇرىنعى باعالاۋى سايكەسىنشە 2750 جانە 2625 دوللار بولعان ەدى.

ترامپ بيلىككە كەلگەننەن بەرى امەريكالىق ونەركاسىپتى قورعاۋ جانە ساۋدا تاپشىلىعىن ازايتۋ ءۇشىن جاڭا تاريفتەردى ەنگىزۋ جوسپارلارىن العا تارتتى.

ول 2-ساۋىردە جاۋاپ تاريفتەرىنىڭ جاڭا پاكەتىن جاريالايدى دەپ كۇتىلىپ وتىر، دەپ حابارلايدى Reuters.

ەسكە سالايىق، اقش اكىمشىلىگى ەلدەن تىس جەردە شىعارىلاتىن بارلىق كولىككە 25 پايىزدىق يمپورتتىق باج سالىعىن ەنگىزەدى.

التىن باعاسىنىڭ كوتەرىلۋىنە ءىشىنارا «ترامپ فاكتورى» دەپ اتالاتىن سەبەپ تۇرتكى بولعانى بۇرىن حابارلانعان بولاتىن. سونداي-اق اسىل مەتالدار باعاسىنىڭ جاڭا رەكوردى جەكەلەگەن ەلدەردەگى ىشكى ساياسي جاعدايعا بايلانىستى.

بۇعان دەيىن ا ق ش كولىك يمپورتىنا %25 باج سالىعىن ەنگىزگەنىن جازعان بولاتىنبىز.