التى كۇندىك جۇمىس اپتاسى ەنگىزىلمەك

استانا. قازاقپارات - ەۋروپا وداعىندا ءبىرىنشى بولىپ گرەكيا التى كۇندىك جۇمىس اپتاسىن ەنگىزدى، - دەپ حابارلايدى Massaget.kz ءتىلشىسى Deutsche Welle باسىلىمىنا سىلتەمە جاساپ.

1-شىلدەدەن باستاپ گرەكيادا التى كۇندىك جۇمىس اپتاسى ەنگىزىلدى. وزگەرىس ونەركاسىپتە، بولشەك ساۋدادا، اۋىل شارۋاشىلىعىندا جانە كەيبىر قىزمەت تۇرلەرىندە جۇمىس ىستەيتىن جۇمىسشىلارعا اسەر ەتەدى.

جۇمىس كەستەسى تۋرالى شەشىمدى جۇمىس بەرۋشى قابىلدايدى. التىنشى كۇنى قىزمەتكەرلەرگە كۇندەلىكتى جالاقىنىڭ 40 پايىز مولشەرىندە ۇستەمەاقى تولەنەدى.

گرەكيا بيلىگى جاڭا زاڭ كومپانيالاردى باسقارۋدى جەڭىلدەتەتىنىن، التى ايعا دەيىن سىناق مەرزىمىن قىسقارتاتىنىن (12 اي بولعان) مالىمدەدى.

زاڭ كۇشىنە ەنگەنگە دەيىن دە گرەكتەر ەۋروپاداعى ەڭ كوپ جۇمىس ىستەيتىن حالىق بولدى، ولار اپتاسىنا ورتا ەسەپپەن 41 ساعات جۇمىس ىستەيدى. دەرەكتەرگە سۇيەنسەك، ولاردىڭ تابىسى وتە تومەن. گرەكتەردىڭ ورتاشا ايلىق جالاقىسى شامامەن 1250 ەۋرو بولادى.