التى ايدا ەكى مىڭ اۋىل ينتەرنەتپەن قامتىلادى

 يلون ماكس كومپانياسى الداعى جارتى جىلدىڭ ىشىندە ەلىمىزدەگى شالعايدا ورنالاسقان 2 مىڭ اۋىلدى ينتەرنەتپەن قامتاماسىز ەتەدى. بۇل تۋرالى سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين ايتتى، دەپ حابارلايدى Kazinform. 

«فورۋمعا SpaceX ءتوراعاسىنىڭ ورىنباسارى (SpaceX Starlink بيزنەس-وپەراتسيالارى جونىندەگى ديرەكتورى لورەن درەيەر) كەلگەن بولاتىن. ونىمەن ەكىجاقتى كەزدەسۋلەر ءوتتى. ول پرەزيدەنت مىرزامەن كەزدەسۋى بارىسىندا پيلوت رەتىندە شالعايداعى 2 مىڭ اۋىل مەكتەبىن SpaceX Starlink تەحنولوگياسى ارقىلى ينتەرنەتكە قوسۋعا كەلىسىمىن بەردى. ءبىز كوپ ۇزارتپاي، جارتى جىلدىڭ ىشىندە 2 مىڭ اۋىلداعى مەكتەپتى Starlink ارقىلى جىلدامدىعى جوعارى ينتەرنەتكە قوسامىز»، - دەدى مينيستر «Digital Bridge 2023» حالىقارالىق تەحنولوگيالىق فورۋمى اياسىنداعى بريفينگتە.

ونىڭ اتاپ وتۋىنشە، SpaceX Starlink تەحنولوگياسىنىڭ يگىلىگىن تەك مۇعالىمدەر مەن وقۋشىلار عانا ەمەس، سونىمەن قاتار اۋىل تۇرعىندارى دا كورەدى.

«مەنىڭشە، ول جالپى اۋىلداعى ينتەرنەتكە قوسىلام دەۋشىلەرگە ۇلكەن مۇمكىندىك بەرەدى. ويتكەنى، ول اۋىلداردا 200 دەن 500 گە دەيىن ادام تۇرادى. ولاردىڭ ىشىندە ينتەرنەت مۇلدەم جوق اۋىلدار دا بار. سول اۋىلدارعا 100-200 مبيت-تىك ينتەرنەت جەتكىزىلگەن كەزدە تۇرعىندار مەكتەپتەگى ينتەرنەتتى پايدالانىپ، وزدەرىنە قاجەتتى سەرۆيستەردى جۇكتەي الاتىن بولادى»، - دەدى باعدات مۋسين.