الەۋمەتتىك سالانىڭ شىعىستارى ارتادى: ستۋدەنتتەردىڭ شاكىرتاقىسى وسەدى

استانا. قازاقپارات - 2025 -جىلى الەۋمەتتىك سالانىڭ شىعىستارى بيىلعا قاراعاندا 794 ميلليارد تەڭگەگە ارتادى. بۇل تۋرالى ماجىلىستە «2025-2027 -جىلدارعا ارنالعان رەسپۋبليكالىق بيۋدجەت تۋرالى» زاڭ جوباسىنىڭ تانىستىرىلىمىندا ق ر قارجى ۆيتسە-ءمينيسترى ابزال بەيسەنبەك ۇلى ءمالىم ەتتى.

«زاڭ جوباسى بيۋدجەت كودەكسىنە سايكەس، ەلىمىزدىڭ 2029 -جىلعا دەيىنگى الەۋمەتتىك- ەكونوميكالىق دامۋ بولجامى نەگىزىندە ازىرلەندى. بيۋدجەتتىڭ پارامەترلەرى - كەپىلدەندىرىلگەن ترانسفەرت، شىعىستاردىڭ ءوسۋ قارقىنى جانە بيۋدجەت تاپشىلىعىنا قاتىستى قاعيدالارعا ساي كەلەدى. 2025 -جىلعا تۇسىمدەر 21,7 تريلليون تەڭگە دەڭگەيىندە قاراستىرىلىپ وتىر. ترانسفەرتتەردى ەسەپتەمەگەندە، 2025 -جىلعا ارنالعان كىرىستەر 15,6 تريلليون تەڭگە نەمەسە تۇسىمدەردىڭ %73- ىن قۇرايدى. 2025 -جىلى بيۋدجەت تاپشىلىعى جالپى ىشكى ونىمگە شاققاندا % 2,7 دەڭگەيىندە ەسەپتەلگەن، ال 2027 -جىلعا قاراي بۇل كورسەتكىش %1,9- عا دەيىن تومەندەيدى»، - دەدى ا. بەيسەنبەك ۇلى.

ونىڭ ايتۋىنشا، بيۋدجەتتىڭ 2025 -جىلعا ارنالعان شىعىستارى - تۇسىمدەر مەن بيۋدجەت تاپشىلىعىن ەسكەرە وتىرىپ، 25,8 تريلليون تەڭگەنى قۇرايدى، ياعني بيىلمەن سالىستىرعاندا 1,7 تريلليون تەڭگەگە ۇلعايىپ وتىر.

«مەملەكەتىمىز ءۇشىن الەۋمەتتىك ساياسات باسىم باعىت بولىپ قالىپ وتىر. 2025 -جىلى الەۋمەتتىك سالانىڭ شىعىستارى بيىلعا قاراعاندا 794 ميلليارد تەڭگەگە ۇلعايىپ، 9,8 تريلليون تەڭگەنى قۇرادى. كەلەسى جىلى بيۋدجەت شىعىستارىنداعى كوپ ۇلەسى، ياعني 38 پايىزى وسى الەۋمەتتىك سالاعا تيەسىلى»، - دەدى ۆيتسە-مينيستر.

ونىڭ سوزىنە قاراعاندا، 2025 -جىلعا الەۋمەتتىك تولەمدەرگە ارنالعان شىعىستار - يندەكستەۋ مەن تولەمدەردى الۋشىلار سانىنىڭ ۇلعايۋىن ەسكەرە وتىرىپ، 6 تريلليون تەڭگە سوماسىندا قاراستىرىلعان. الەۋمەتتىك تولەمدەردى يندەكستەۋگە جانە ونى الۋشىلار كونتينگەنتىن ۇلعايتۋعا 626 ميلليارد تەڭگە باعىتتالادى.

«ەكىنشى باسىمدىق - ءبىلىم بەرۋدى دامىتۋ. 2025 -جىلى بۇل باعىتقا شىعىستار 2024 -جىلدىڭ دەڭگەيىنە قاراعاندا 116 ميلليارد تەڭگەگە ارتىپ، 1 تريلليون تەڭگەنى قۇرايدى. شىعىستاردىڭ ءوسۋىنىڭ نەگىزگى فاكتورلارىنا توقتالساق، جوعارى وقۋ ورنىنىڭ ستۋدەنتتەرىنە ورتا ەسەپپەن 15-20 پايىزعا شاكىرتاقى مولشەرى ۇلعايتىلادى. ناتيجەسىندە، باكالاۆريات ستۋدەنتتەرى ءۇشىن شاكىرتاقىنىڭ ورتاشا مولشەرى 52372 تەڭگەنى، ماگيستراتۋراعا 117098 تەڭگەنى قۇرايدى. «Amanat» پارتياسىنىڭ سايلاۋالدى باعدارلاماسىن ىسكە اسىرۋ اياسىندا 78 مىڭعا جۋىق جاس قازاقستاندىقتىڭ تەگىن جوعارى ءبىلىم الۋىنا شىعىستار قاراستىرىلدى. جوعارى وقۋ ورىندارىندا ءبىلىم الۋشىلاردىڭ جەڭىلدىكپەن جول ءجۇرۋ قۇنىن ۇلعايتۋ ەسكەرىلگەن. ءبىر ستۋدەنتكە جەڭىلدىكپەن جول ءجۇرۋ 15728 تەڭگەنى قۇرايدى. بۇدان بولەك، عىلىمي اتاقتار ءۇشىن قوسىمشا اقىلار بەلگىلەنۋىنە بايلانىستى عالىمداردىڭ ەڭبەكاقىسى وسەدى»، - دەدى ابزال بەيسەنبەك ۇلى.

اۆتور

رۋسلان عابباسوۆ