الەۋمەتتىك ماڭىزى بار ازىق-تۇلىك تاۋارلارىنىڭ باعاسى ارزاندادى

استانا. قازاقپارات - ءا م ا ت تاۋارلارىنا ەنەتىن ونىمدەردىڭ كوپشىلىگىنىڭ باعاسى بىلتىرعىعا قاراعاندا ەداۋىر تۇسكەن.

ساۋدا كوميتەتى الەۋمەتتىك ماڭىزى بار ازىق-تۇلىك تاۋارلارىنىڭ ۇلتتىق ستاتيستيكا بيۋروسىنداعى بىلتىرعى جانە بيىلعى تامىز ايىنداعى باعالارىنا تالداۋ جۇرگىزدى.

كۇنباعىس ماي: ەلدە جىل باسىنان كۇنباعىس مايىنىڭ باعاسى %15 ارزانداعان. بىلتىر تامىزدا كۇنباعىس مايىنىڭ 1 ليترى 781 تەڭگە بولعان بولسا، بيىل بۇل باعا 626 تەڭگەگە دەيىن ارزانداعان.

پياز: پياز باعاسى بىلتىر 177 تەڭگە بولسا، بيىل دۇكەن سورەلەرىنە 129 تەڭگەدەن ساتىلۋدا.

قىرىققابات: قىرىققابات وسىدان 1 جىل بۇرىن 159 تەڭگەدەن ساتىلعان بولسا، قازىر رەسپۋبليكا بويىنشا ورتاشا باعاسى 124 تەڭگەنى قۇراپ تۇر.

قانت: بىلتىر قانتتىڭ 1 كەلىسى 434 تەڭگەگە دەيىن جەتسە، قازىر ونىڭ باعاسى 415 تەڭگەگە ارزانداعان.

ءسابىز: ءسابىزدىڭ كەلىسى ءبىر جىل بۇرىن 198 تەڭگەدەن ساۋدالانسا، بيىل 188 تەڭگەنى قۇراپ وتىر.

قاراقۇمىق جارماسى: قاراقۇمىق جارماسىنىڭ قۇنى تۋرا 1 جىل بۇرىن 338 تەڭگە بولسا، قازىر رەسپۋبليكا بويىنشا ورتاشا باعا 222 تەڭگەگە ارزانداعان.

بيداي ۇنى: ءبىرىنشى سورت بيداي ۇنىنىڭ 1 كەلىسى 2023 -جىلدىڭ تامىزىندا 232 تەڭگە تۇرسا، بيىل 228 تەڭگەگە تۇسكەن.

1 جىل ىشىندە تۇز بەن روجكي باعاسى ەش وزگەرىسسىز قالعان.