الەۋمەتتىك كومەك الۋشىلار سانى ءۇش ەسەگە ازايدى

استانا. KAZINFORM - قازاقستاندا اتاۋلى الەۋمەتتىك كومەك الۋشىلار سانى كەيىنگى جىلدارى ايتارلىقتاي قىسقاردى. بۇل تۋرالى ق ر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى باحتيار جازىقپايەۆ مالىمدەدى.

ونىڭ ايتۋىنشا، جاڭا سيفرلىق تاسىلدەر مەن جاساندى ينتەللەكت تەحنولوگيالارىن ەنگىزۋ ناتيجەسىندە كومەكتى تاعايىنداۋ جۇيەسىنىڭ دالدىگى ارتقان.

- ەگەر 2023-جىلى اتاۋلى الەۋمەتتىك كومەكتى 114 مىڭ وتباسى السا، 2026-جىلى بۇل كورسەتكىش 30 مىڭعا دەيىن تومەندەدى. سونىمەن قاتار تولەمدەر كولەمى 57 ميلليارد تەڭگەدەن 5 ميلليارد تەڭگەگە دەيىن ازايدى، - دەدى ول.

ۆيتسە-ءمينيستردىڭ سوزىنشە، مۇنداي وزگەرىس مۇقتاجدىقتى باعالاۋ جۇيەسىنىڭ جاڭارۋىمەن بايلانىستى.

- قازىرگى تاڭدا ءوتىنىش بەرۋشىلەردىڭ ماتەريالدىق جاعدايى اۆتوماتتى تۇردە تەكسەرىلەدى. جۇيە مەملەكەتتىك دەرەكقورلار نەگىزىندە تابىسىن، مۇلكىن، جۇمىسپەن قامتىلۋىن جانە باسقا دا الەۋمەتتىك كورسەتكىشتەرىن تالدايدى، - دەدى باحتيار جازىقپايەۆ.

سونىمەن قاتار تۇرعىن ءۇي جاعدايىن باعالاۋ ءۇشىن فوتوسۋرەتتەردى تالدايتىن تەحنولوگيا دا قولدانىلىپ جاتىر. بۇل ازاماتتاردىڭ ءومىر ءسۇرۋ دەڭگەيىن ناقتىراق انىقتاۋعا مۇمكىندىك بەرەدى.

جينالعان دەرەكتەر نەگىزىندە جۇيە شەشىم قابىلداۋعا ۇسىنىمدار قالىپتاستىرادى. ال تۇپكىلىكتى شەشىم ماماننىڭ قۇزىرەتىندە قالادى. وسى ءتاسىل ارقىلى بۇگىنگى كۇنى شامامەن 48 مىڭ ءوتىنىش قارالعان.

- جاڭا تەحنولوگيالار نەگىزسىز تولەمدەردى بولدىرماۋعا جانە الەۋمەتتىك كومەكتىڭ اتاۋلىلىعىن ارتتىرۋعا مۇمكىندىك بەرىپ وتىر، - دەپ تۇيىندەدى باحتيار جازىقپايەۆ.

ايتا كەتەيىك، بۇعان دەيىن ەڭبەك مينيسترلىگى ارناۋلى الەۋمەتتىك قىزمەتتەردىڭ اشىقتىعىن ارتتىرۋ ءۇشىن دەرەكقورلاردى بىرىكتىرۋ بويىنشا پيلوتتىق جوبا باستاعان ەدى.