الەۋمەتتىك كاسىپكەرلىك گرانتى كىمدەرگە بەرىلەدى
استانا. KAZINFORM - الەۋمەتتىك كاسىپكەرلىكتى قولداۋ ماقساتىندا مەملەكەتتىك گرانتتار بولىنەدى. گرانتتار بايقاۋى بيىل قازاندا وتەدى.
بۇل تۋرالى استانا قالاسىنىڭ ينۆەستيتسيالار جانە كاسىپكەرلىكتى دامىتۋ باسقارماسى باسشىسىنىڭ ورىنباسارى قۋانىش ساپاروۆ ءمالىم ەتتى.
- گرانتتار «الەۋمەتتىك كاسىپكەرلىك سۋبەكتىلەرىنە مەملەكەتتىك گرانتتار بەرۋ قاعيدالارىن بەكىتۋ تۋرالى» ۇكىمەتتىڭ 2024 -جىلعى 17-قىركۇيەكتەگى № 754 قاۋلىسىنا سايكەس وتەۋسىز نەگىزدە بەرىلەدى. نەگىزگى شارتتارى گرانت سوماسىنىڭ كەمىندە %20- ىن كاسىپكەر ءوزى قارجىلاندىرۋى ءتيىس، مىندەتتى تۇردە جۇمىس ورنىن قۇرىپ، ەڭبەك پورتالىنا تىركەۋ قاجەت، سونداي-اق ينفراقۇرىلىمنىڭ بولۋى تالاپ ەتىلەدى. وسى ورايدا، گرانت بايقاۋىنا قاتىسۋ ءۇشىن الەۋمەتتىك كاسىپكەرلەر تىزىلىمىنە ەنۋى قاجەت. قارجىلىق قولداۋ شارالارى اياسىندا الەۋمەتتىك كاسىپكەرلەردىڭ رەەسترى جۇرگىزىلەدى، - دەدى قۋانىش ساپاروۆ استانا قالاسى كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
الەۋمەتتىك كاسىپكەرلەردىڭ ءتىزىلىمىن جۇرگىزۋ قاعيداسى 4 ساناتقا بولىنگەن:
- 1 -سانات - حالىقتىڭ الەۋمەتتىك وسال توبىنان شىققان ازاماتتاردى جۇمىسپەن قامتۋعا ىقپال ەتەتىن الەۋمەتتىك كاسىپكەرلەر (كەمىندە 2 ادام، قىزمەتكەرلەردىڭ جالپى سانىنىڭ %50 كەم بولماۋى ءتيىس). حالىقتىڭ الەۋمەتتىك وسال توبى ساناتىنا كەلەسىدەي ازاماتتار جاتادى، ەرەكشە قاجەتتىلىگى بار ازاماتتار، ەرەكشە بالا تاربيەلەپ وتىرعان اتا-انا، كوپبالالى وتباسى وكىلدەرى، زەينەتكەرلەر مەن زەينەت الدى جاستاعى ازاماتتار، 16 مەن 23 جاس ارالىعىنداعى بالالار ءۇيىنىڭ تاربيەلەنۋشىلەرى، قانداستار.
- 2 -سانات - حالىقتىڭ الەۋمەتتىك وسال توبى ساناتىنا جاتاتىن ازاماتتار وندىرەتىن تاۋارلاردى، ورىندايتىن جۇمىستى، كورسەتەتىن قىزمەتتى وتكىزۋدى قامتاماسىز ەتەتىن الەۋمەتتىك كاسىپكەرلەر.
- 3 -سانات - فيزيكالىق مۇمكىندىگى شەكتەۋلى جاندارعا ارناپ تاۋار وندىرۋمەن، جۇمىس اتقارۋمەن، قىزمەت كورسەتۋمەن اينالىساتىن الەۋمەتتىك كاسىپكەرلەر. بۇل قىزمەت ءتۇرى ولاردىڭ ءومىر ءسۇرۋ شەكتەۋلەرىن ەڭسەرۋگە جاعداي جاساۋعا باعىتتالعان (الەۋمەتتىك-مەديتسينالىق، الەۋمەتتىك-پسيحولوگيالىق قىزمەت، وڭالتۋ جانە الەۋمەتتىك بەيىمدەۋ).
- 4- سانات - الەۋمەتتىك سالادا جۇمىس ىستەيتىن الەۋمەتتىك كاسىپكەرلەر (پسيحولوگيالىق- پەداگوگيكالىق قىزمەت، بالالاردىڭ دەمالىسى مەن ساۋىقتىرۋ ۇيىمداستىرۋ، جالپى ءبىلىم بەرۋ، مادەني-اعارتۋشىلىق قىزمەت، قورشاعان ورتانى قورعاۋ).
— بىلتىر ماۋسىمداعى جاعداي بويىنشا الەۋمەتتىك كاسىپكەرلەردىڭ تىزىلىمىنە رەسپۋبليكا بويىنشا 1094 كاسىپكەردىڭ ىشىنەن 215 كاسىپكەر ەنگىزىلگەن، ونىڭ ىشىندە 1 سانات بويىنشا — 13 كاسىپكەر، 2 سانات — 1, 3 سانات — 40, 4 سانات — 161 كاسىپكەر بار. اتالعان تىزىمگە ەنگەن كاسىپكەرلەر مەملەكەتتىك گرانتتار الۋ كونكۋرسىنا جانە «دامۋ» قورى ارقىلى %11,3 مولشەرلەمەمەن جەڭىلدەتىلگەن نەسيەلەۋ باعدارلاماسىنا قاتىسا الادى، - دەپ قورىتىندىلادى باسقارما باسشىسىنىڭ ورىنباسارى.
ونىڭ ايتۋىنشا، ءوتىنىم ءار توقسان سايىن ايدىڭ 1-ىنەن 15-ىنە دەيىن وفلاين فورماتتا بەيبىتشىلىك كوشەسى، 11 ءۇي، 113-كابينەت مەكەنجايدا قابىلدانادى.
كاسىپكەرلىكتى قولداۋ بويىنشا تولىق اقپاراتتى استانا قالاسىنىڭ ينۆەستيتسيالار جانە كاسىپكەرلىكتى دامىتۋ باسقارماسىنان كەلەسى تەلەفون نومىرلەرى ارقىلى الۋعا بولادى: 556910، 550181، 556921.
ايتا كەتەيىك، بيىل شىلدەدە بيزنەس سۋبسيديانى كەپىلدەندىرۋدىڭ جاڭا تەتىكتەرى كۇشىنە ەنەدى.
بۇگىندە استانادا شاعىن جانە ورتا بيزنەس سۋبەكتىلەرى 8,3 پايىزعا كوبەيدى. ەلوردادا وتكەن جىلى شاعىن جانە ورتا بيزنەس سۋبەكتىلەرى 15,8 تريلليون تەڭگەگە تاۋار ءوندىرىپ، قىزمەت كورسەتكەن.
اۆتور
داۋلەت ىزتىلەۋ
