الەمنىڭ قىزىقتى قۇدا ءتۇسۋ سالتتارى

استانا. قازاقپارات - سيگارەت ۇسىنىپ قۇدا ءتۇسۋ

سۋرينامداعى ۇندىستەردە ەگەر جىگىت ءبىر قىزدى ۇناتىپ قالسا، اكەسى ءساتتى كۇندى تاڭداپ، قىزدىڭ ۇيىنە سالەم بەرە بارادى، ءارى سيگارەت ۇسىنىپ قۇدالاسپاقشى بولعانىن بىلدىرەدى. بۇل قۇدالاسۋعا بولعان شىن نيەتىن ءبىلدىرۋدىڭ جولى بولىپ تابىلادى. قىزدىڭ اكەسى سيگاردى السا، قۇدالاسۋعا قوسىلعان ەسەپتەلىنەدى.

كوفە سىيلاپ قۇدا ءتۇسۋ

يۋگوسلاۆيانىڭ ورتا وڭىرىندە ەگەر جىگىت ءبىر قىزدى ۇناتىپ قالسا، ۇيىنە بارىپ قىزعا كوڭىلىن بىلدىرۋىنە بولادى. ەگەر قىز جىگىتكە قانت قوسىلعان ءتاتتى كوفە اكەلىپ بەرگەن بولسا، وندا ونىڭ ماقۇل بولعانى، ەگەر كوفە اششى بولسا، رەنجىمەڭىز، ماقۇل بولا المايمىن دەگەندى بىلدىرەدى ەكەن.

شاقىرۋ قاعازى ارقىلى قۇدالاسۋ

گەرمانيانىڭ الىس اۋىلدارىندا قىزدىڭ اكە-شەشەسى اسەمدەلگەن شاقىرۋ قاعازىنا قىز جاقتىڭ قۇدالاسۋ شارتتارىن جازىپ، سوسىن ونى دوستارى مەن تانىستارىنا پوشتا ارقىلى جىبەرەدى ەكەن. قابىل الۋشى بولسا، قوناق كيىمىن، قالپاعىن كيىپ، قولىنا گۇل ۇستاپ، الگى شاقىرۋ قاعازىن الىپ قوناققا كەلەدى ەكەن. سودان باستاپ قۇدا بولىپ، توي قامىنا كىرىسەدى.

قول الىسىپ قۇدا ءتۇسۋ

ماروككوداعى بارباري تايپاسى ءار جىلى قىركۇيەك ايىندا ءبىر رەت بولاشاق كەلىندەرگە ارنالعان ءدىني جارمەڭكە وتكىزەدى. جىگىت ءبىر قىزدى ۇناتىپ قالسا، وڭ قولىن قىزعا سوزىپ يشارا جاسايدى، ەگەر قىز دا جىگىتتى جاقتىرسا وڭ قولىن سوزىپ جىگىتتىڭ قولىن ۇستايدى. قىزدىڭ وعان كوڭىلى بولماسا، وڭ قولىن بەرمەيدى. ەگەر قىز قوسىلعان بولسا: «سەن مەنىڭ باۋىرىمدى الىپ كەتتىڭ»، - دەپ ءتىل قاتادى ەكەن.

ساداق اتىپ قۇدا ءتۇسۋ

افريكاداعى تايپالاردىڭ بىرىندە قىزدار سۋ قۇيىلعان كۇبىنى توبەسىنە قويىپ، ءبىر قولىمەن سۇيەپ جۇرەدى. جىگىت قىزدىڭ سوڭىنان ەرىپ ءجۇرىپ، ساداق اتىپ، جەبەسىن قىزدىڭ الدىنا تۇسىرەدى. ەگەر قىز جىگىتتى ۇناتاتىن بولسا، جەبەنى اياعىمەن ءىلىپ الىپ، كوككە لاقتىرىپ، ونى ەكى قولىمەن ۇستاپ الادى، ءارى توبەسىندە تۇرعان سۋدى شايقالتىپ، توكپەۋى كەرەك ەكەن.

دايىنداعان: سۇڭقار اقبوز

massaget.kz