الەمدىك يادرولىق يندۋستريا وكىلدەرى قازاقستانمەن تاجىريبەسىن بولىسپەك
استانا. KAZINFORM - قازاقستاندا اتوم ەلەكتر ستانتسيالارى سالىنعان جاعدايدا الەمدىك يادرولىق يندۋستريا وكىلدەرى جان- جاقتى قولداۋعا ءازىر. بۇل تۋرالى دۇنيەجۇزىلىك يادرولىق قاۋىمداستىقتىڭ باس ديرەكتورى مالىمدەدى، دەپ حابارلايدى Kazinform ءتىلشىسى.
ساما بيلباو- ي- لەوننىڭ پىكىرىنشە، بۇل سالادا ابدەن ىسىلعان مەملەكەتتەرمەن ارىپتەستىك ورناتۋ وتە ماڭىزدى. ول ەلدەر ينفراقۇرىلىمدى جوسپارلاۋ، نورماتيۆتى- قۇقىقتىق بازا قۇرۋ جانە قارجىلاندىرۋ سياقتى ماسەلەلەر بويىنشا باي تاجىريبەلەرىمەن بولىسۋگە ءازىر.
حالىقارالىق ساراپشى قازاقستانمەن قاتار وزبەكستان، قىرعىزستان سياقتى ورتالىق ازيا مەملەكەتتەرىنىڭ تازا ەنەرگيا وندىرىسىنە ەرەكشە قىزىعۋشىلىق تانىتىپ وتىرعانىن ايتادى.
“وسى جىلى ءبىز قازاقستاندا بولىپ، دۇنيەجۇزىلىك يادرولىق فورۋم وتكىزدىك. الەمنىڭ تۇكپىر- تۇكپىرىنەن ساراپشىلاردى شاقىرىپ، سالانىڭ قاي باعىتتا دامىپ جاتقانى جايلى اقپارات بەردىك. قازاقستان تازا ەنەرگيانى اەس ارقىلى تابۋعا نيەتتەنگەن جاعدايدا ءبىز وزىق تاجىريبەلەرىمىزبەن بولىسۋگە ءاردايىم ءازىرمىز”، - دەدى دۇنيەجۇزىلىك يادرولىق قاۋىمداستىقتىڭ باس ديرەكتورى ساما بيلباو- ي- لەون.
