الەمدىك ۋنيۆەرسيتەتتەر قالاي وقىتادى؟

استانا. قازاقپارات - الەمدىك وقۋ ورىندارى بۇگىنگى جاهاندانۋ داۋىرىندە ىرگەلى ءبىلىم كەمەل تابىسقا، مەملەكەتتىڭ الەمدىك ساحناداعى يميدجىنە اسەر ەتەدى. ءبىز تومەندە قىتاي، يتاليا جانە ا ق ش سىندى دامىعان مەملەكەتتەردىڭ ءبىلىم بەرۋ جۇيەسىنىڭ ەرەكشەلىكتەرىنە توقتالىپ وتىرمىز.

تالانتتى جاستار وقۋعا وڭاي تۇسەدى

ا ق ش ۋنيۆەرسيتەتتەرى الەمنىڭ ۇزدىك وقۋ ورىندارىنا جاتاتىنى بەلگىلى. 200 -جىلعى ساناق بويىنشا، مۇندا 4352 ج و و (جوعارى وقۋ ورىندارى) تىركەلگەن. وقۋ ورىندارىنىڭ جىلدىق تولەماقىسى 5000 دوللاردان باستالىپ، 40 مىڭ دوللار (گارۆارد) ارالىعىن قامتيدى. ستۋدەنتتەرگە ايىنا 800-1200 دوللار كولەمىندە شاكىرتاقى تولەنەدى. تاعى ءبىر ايتا كەتەتىن جايت، امەريكالىقتار ۋنيۆەرسيتەتتى كوللەدج دەپ تە اتاي بەرەدى.

مەملەكەتتىك جانە جەكەمەنشىك ج و و-لار جىل سايىن اككرەديتاسيادان وتەدى. دەگەنمەن، تىركەلۋدى قاجەت ەتپەيتىن وقۋ ورىندارى دا بار. ماسەلەن، «ديپلوم ديىرمەنى» دەپ اتالاتىن ج و و-دا ديپلوم ەرىكتى، زاڭدى تۇردە ساتىلادى. سول سياقتى بەلگىلى ءبىر باعىتتا وقىتاتىن - شىركەۋ قىزمەتكەرلەرىن عانا دايىندايتىن بيبليالىق كوللەدجەر مەن ۋنيۆەرسيتەتتەر، سونىمەن قاتار وقىتۋشىلاردىڭ بىلىكتىلىگى مەن ساعات سانى بويىنشا ج و و تالاپتارىنا ساي كەلمەيتىن كەشكى مەكتەپتەرگە تىركەلۋ مىندەتتى ەمەس.

جالپى ا ق ش-تاعى ءبىلىم بەرۋ جۇيەسىنىڭ ەرەكشە بەلگىسى رەتىندە عىلىمي-زەرتتەۋ باعدارلامالارىن ايتۋعا بولادى. كوللەدجدەردە كوبىنە ستۋدەنتتەرگە تەوريالىق ءبىلىم بەرۋ ءبىرىنشى ورىنعا قويىلادى. ۋنيۆەرسيتەتتەر - جەكەمەنشىك جانە شتاتتىق بولىپ بولىنەدى. شتاتتىق ۋنيۆەرسيتەتتەر بەلگىلى ءبىر شتاتتىق دەڭگەيدە قارجىلاندىرىلاتىندىقتان، وقۋ ورنىنا سول شتاتتىڭ تۇرعىندارى عانا تۇسە الادى. ال باسقا شتاتتان كەلىپ وقىعىسى كەلەتىندەر تەك اقىلى نەگىزدە وقي الادى. ولار ءۇشىن وقۋ اقىسى ەداۋىر قىمبات.

جەرگىلىكتى كوللەدجدەر وقۋعا تالابى بار كەز كەلگەن تالاپكەردى قابىلداۋعا مىندەتتى. ال ج و و-عا ءتۇسۋ كوللەدجگە تۇسكەندەي وپ-وڭاي ەمەس. تالاپكەردىڭ ءبىلىم دەڭگەيى ءجىتى تەكسەرىلىپ، ۇزاق-سونار اڭگىمەلەسۋدەن وتەدى. ۋنيۆەرسيتەتتەردىڭ كوپشىلىگى تالاپكەردىڭ قوعامدىق جۇمىستاعى بەلسەندىلىگىنە باسا نازار اۋدارادى. ياعني، تالاپكەر سپورت، ونەر سالاسىندا زور تابىستارعا جەتسە، ونىڭ ج و و-عا ءتۇسۋ مۇمكىندىگى دە ۇلعايادى.

سونداي-اق، مۇعالىمنىڭ بەرگەن مىنەزدەمەسى مەن ۇسىنىس حاتى دا ماڭىزدى رول اتقارادى. تالاپكەر العاشىندا ج و و-عا تۇسەردە بىزدەگىدەي تەك ءبىر فاكۋلتەتتى تاڭداپ، سونى عانا وقىمايدى. ول جاقتا ستۋدەنت بەلگىلى ءبىر فاكۋلتەتكە ەمەس، جالپى ۋنيۆەرسيتەتكە تۇسەدى. ءبىرىنشى نەمەسە ەكىنشى كۋرستىڭ سوڭىنا قاراي ستۋدەنت مامانداناتىن سالانى ءوزى تاڭدايدى. كەيبىر ستۋدەنتتەر ەكى نەمەسە ءۇش سالانى بىردەي تاڭداي الادى. ءبىراق، فاكۋلتەتتەن فاكۋلتەتكە اۋىسۋ وتە قيىن. ستۋدەنتتەردى باعالاۋ سەمەستر نەمەسە تريمەستر بويىنشا جۇرگىزىلەدى. جىل سوڭىندا بارلىعى قورىتىندى ەمتيحان تاپسىرادى.

يتاليادا وقۋ «پرەستيج» (پرەستيج- اتاق، داڭىق)

يتالياندىق ءبىلىم بەرۋ جۇيەسى ا ق ش-قا قاراعاندا جەڭىلدەۋ. يتاليادا وقيتىن ستۋدەنتتەر ساپالى ءبىلىم الىپ قانا قويماي، الەمدىك وركەنيەتپەن جاقىنىراق تانىسۋعا دا مۇمكىندىك الادى. قازىرگى زاماندا ادامزاتتىڭ مادەني تاريحىن پەتراركا، لەوناردو دا ۆينچي، ميكەلاندجەلو سىندى تانىمال تۇلعالاردىڭ ەسىمدەرىنسىز ەلەستەتۋ مۇمكىن ەمەس. سوندىقتان مادەنيەتتانۋ، ءان-اۋەز سالاسى نەمەسە ساۋلەت ونەرىنە ءبىر تابان جاقىن ستۋدەنتتەردىڭ يتاليادا وقىعانى وزدەرىنە ءتيىمدى.

يتالياندىق ءبىلىم بەرۋ جۇيەسى الۋان تۇرلىلىگىمەن تاڭعالدىرادى. بۇل جۇيە ەكى تيپتەن تۇرادى: ۋنيۆەرسيتەتتىك جانە ۋنيۆەرسيتەتتىك ەمەس سەكتور. قازاقستاندىق ءبىلىم بەرۋ جۇيەسىنە قاراعاندا، يتاليادا وقۋ اناعۇرلىم جەڭىل. ويتكەنى يتالياندىق جۇيەدە بىزدەگىدەي مىندەتتى وقۋ جوق. ياعني، يتالياندىق ستۋدەنتتەرگە سەمەستر سايىن ەمتيحان تاپسىرىپ، ساباققا مىندەتتى تۇردە قاتىسۋ قاجەت ەتىلمەيدى. ستۋدەنتتەر وزدەرىنە وڭتايلى ۋاقىتتا عانا لەكسياعا قاتىسىپ، ەمتيحاندارىن تاپسىرادى.

تاعى ءبىر ەرەكشەلىگى - مەكتەپ بىتىرگەن تۇلەكتەر ج و و-عا بىردەن تۇسۋگە اسىقپايدى. كوپشىلىگى بىرەر جىل جۇمىس ىستەپ، وقۋعا قاجەتتى قاراجات جينايدى. ويتكەنى، مۇندا بارلىعىنا بىردەي گرانت بولىنبەيدى. گرانت تەك ۇزدىك وقيتىن جاستارعا عانا قاراستىرىلعان. ال شەتەلدىك ستۋدەنتتەرگە قويىلاتىن باستى تالاپ - يتاليان ءتىلىن ءبىلۋى.

جاسىراتىنى جوق، بۇگىندە جاستاردىڭ يتاليادا وقۋعا دەگەن قىزىعۋشىلىعى باسىم. سەبەبى، يتاليادا ءبىلىم الۋ ولار ءۇشىن - «پرەستيج».

قىتايدا ستۋدەنت اتانۋ ناعىز مەرەكە

قىتايداعى اعارتۋ سالاسى قىتايلىق وركەنيەتتىڭ دامۋىنا عانا ىقپال ەتكەن جوق. سونىمەن قوسا، الەمدىك وركەنيەتتىڭ دامۋىنا دا زور ۇلەسىن قوستى. ءبىلىم جۇيەسى قالىپتاسا باستاعان كەزەڭدە قىتايلىق ۇكىمەت وقۋ-اعارتۋ ىسىنە كوپ كوڭىل ءبولىپ، جاڭا سوسياليستىك جۇيە قالىپتاستىردى. يۋنەسكو جۇرگىزگەن ساناق بويىنشا، 2003 - جىلدىڭ وزىندە قىتاي حالىق رەسپۋبليكاسى الەمدىك ج و و ماسشتابى بويىنشا ءبىرىنشى ورىندى يەلەنگەن.

وقۋ جۇيەسىنىڭ باستى ەرەكشەلىگى - ج و و-لار تەحنيكالىق، جاراتىلىستانۋ عىلىمدارى جانە مەديسيناعا كوپ كوڭىل بولەدى. سوندىقتان دا مۇندا گۋمانيتارلىق سالادا ءبىلىم الاتىندار از. تەك بۇكىل ستۋدەنتتەردىڭ 20 پايىزىن عانا قۇرايدى. ج و و-عا ءتۇسۋ - ستۋدەنت ءۇشىن ناعىز مەرەكە. سەبەبى ءبىر ورىنعا 200-300 ادامنان كەلەدى. دارىندى جاستارعا جەڭىلدىكتەر قاراستىرىلعان. مۇندا ۋنيۆەرسيتەتتە وقىپ ءجۇرىپ جۇمىسقا ورنالاسقان ستۋدەنتتەردىڭ تولەماقىسىن جۇمىس ورنى تولەيدى.

ءبىر قىزىعى - تالاپكەردىڭ قانداي ج و و-عا تۇسەتىنى ونىڭ ءبىرىڭعاي ۇلتتىق ەمتيحاننان العان بالى بويىنشا انىقتالادى. ۋنيۆەرسيتەتكە تۇسەر الدىندا تاپسىراتىن ەمتيحان كەستەسى دە قىزىق. ماسەلەن، گۋمانيتارلىق سالانى تاڭداعان تالاپكەر جاراتىلىستانۋ، تەحنيكا عىلىمدارى بويىنشا ەمتيحان تاپسىرسا، جاراتىلىستانۋ عىلىمىنا مامانداناتىن جاستار گۋمانيتارلىق پاندەردەن سىناق تاپسىرادى. ستۋدەنت 6 جىلدىڭ ىشىندە وقۋىن اياقتاۋى ءتيىس.

ونەگە باتىر قىزى

«نۇر استانا» گازەتى. 2013