الەمدىك حالال نارىعى 5 تريلليون دوللاردان استى
استانا. قازاقپارات - حالالعا ەۋروپا دا نازار اۋدارا باستادى. ۇلى بريتانيا ۇلتتىق ستاتيستيكا باسقارماسىنىڭ مالىمەتىنە سۇيەنسەك، بىرىككەن كورولدىكتەگى يسلام ءدىنىن ۇستانۋشىلار قاتارى 4 ميلليونعا جۋىقتاعان.
وسىعان بايلانىستى، بريتانيانىڭ حالال مونيتورينگ كوميتەتى بىلتىر ايىنا 104 ميلليون تاۋىقتىڭ سويىلعانىن جانە ولاردىڭ %20- ءى حالال ستاندارتقا ساي ەكەنىن ەسەپتەپ شىعارعان. حالال ستاندارت تاعام سالاسىنا عانا ەمەس، كوسمەتيكا كاسىبىنە دە دەندەپ ەنىپ جاتىر.
عالامدا حالال وپا- دالاپ نارىعى 2026-جىلعا قاراي 22 ميلليارد دوللاردان اسۋى مۇمكىن. بۇعان حالىقارالىق Ocean Market زەرتتەۋ ورتالىعىنىڭ ساراپتاماسى دالەل. حالالدى رەتتەيتىن حالىقارالىق ۇيىمدار الەمدە حالال ونىمدەردى تىركەپ، جۇيەسىن رەتتەيتىن بىرنەشە ۇيىم بار. سونىڭ ءبىرى - حالال بويىنشا دۇنيەجۇزىلىك قور. شتاب- پاتەرى گەرمانيانىڭ مالتس قالاسىندا. بۇلاردىڭ تۇپكى ماقساتى - وسى مەكەمەنى بىرىككەن ۇلتتار ۇيىمىنا تىركەتىپ، حالال تاعام تۇرلەرىنىڭ دۇنيەجۇزىنە ورتاق ستاندارتىن دايىنداۋ.
تاعى ءبىر ۇيىم، حالال بويىنشا دۇنيەجۇزىلىك كەڭەس 1999-جىلى يندونەزيا استاناسى دجاكارتادا قۇرىلدى. العاشقى حالال ستاندارتتاردى وسى مەكەمە ازىرلەگەن. وعان بۇگىندە 25 ەل مۇشە. جالپى الەمدە حالال تاعامعا ارنايى كۋالىك بەرگەن العاشقى ەل - مالايزيا. بۇل مەملەكەتتە ۇكىمەت جانىنان قۇرىلعان يسلام دامۋى دەپارتامەنتى حالال تاعام تۇرلەرىن زەرتتەپ، ۇنەمى قاداعالاپ وتىرادى. حالقىنىڭ %60- ءىن مۇسىلماندار قۇرايتىن مالايزيادا حالال سەرتيفيكات الۋ جەرگىلىكتى جانە حالىقارالىق كومپانيالارعا ارتىقشىلىق بەرەدى.
الەمدىك حالال نارىعى $5 تريلليوننان استى
ساپا ماماندارىنىڭ پىكىرىنشە، حالال ونىمگە دەگەن سۇرانىستىڭ ارتۋى مۇسىلمانداردىڭ كوبەيۋىمەن عانا بايلانىستى ەمەس. بۇل جەردە تاۋاردىڭ ادال جولمەن وندىرىلگەنى، دەنساۋلىق ءۇشىن زيانسىز بولۋى دا ماڭىزعا يە. سوندىقتان ءدىنى باسقا نەمەسە قۇدايسىز بولسا دا، حالال ءونىمنىڭ تۇتىنۋشىسىنا اينالعانداردىڭ قاتارى ۇزدىكسىز ءوسىپ جاتىر. سەرتيفيكاتتالعان حالال ونىمدەر مەن قىزمەت كورسەتۋگە سۇرانىس ارتىپ كەلەدى. ويتكەنى بۇل ءونىم تازا جانە دەنساۋلىق ءۇشىن پايدالى. وعان كوبىنە مۇسىلماندار باسىمدىق بەرەدى.
بۇگىندە الەمدىك حالال ونىمدەر نارىعى 5 تريلليون دوللارعا جەتتى. حالال ستاندارتتى تاماقتانۋ، تۋريزم، كوسمەتيكا جانە قارجى سالاسىنان كوپتەپ كەزدەستىرۋگە بولادى، - تاييپ رەجەپ ەردوعان، تۇركيا پرەزيدەنتى.
ەۋروپادا حالال ونىمگە سۇرانىس جوعارى
ەۋروپادا حالال تاماق نارىعى جىل ساناپ كەڭەيىپ كەلەدى. ا ق ش-تىڭ ورتالىق بارلاۋ باسقارماسىنىڭ ەسەبى بويىنشا «كارى قۇرلىقتا» حالال ونىمدەر نارىعىنىڭ بيىلعى كولەمى 15 ميلليارد 480 ميلليون دوللاردى قامتيدى. ال 2029-جىلعا قاراي بۇل كورسەتكىش 20 ميلليارد دوللاردان اسادى دەگەن بولجام بار. سوندا كەيىنگى 5 جىلداعى ءوسىم 5 ەسە ارتپاق.
مۇسىلماندار سانى وسكەن سايىن حالال ونىمگە دەگەن سۇرانىستىڭ ارتاتىنى ءسوزسىز. الىسقا بارماي- اق، كورشىلەس رەسەيدى الايىق. وندا مۇمىندەر حالىقتىڭ %13,5-ءىن قۇرايدى. ال ەۋروپادا مۇسىلمان سانى بويىنشا فرانسيا كوش باستاپ تۇر. قالعان ەلدەر دە قاتارى كوبەيمەسە، ازايىپ جاتقان جوق. زامانعا بەيىمدەلگەن ءىرى سۋپەرماركەتتەردىڭ ەۋروپالىق جەلىلەرى حالال-ستاندارتقا باسىمدىق بەرەتىن بولعان. قالاي دەگەنمەن دە ازىرگە حالال-ستاندارتتى ايقىندايتىن جانە قاداعالايتىن الەمدىك بىرەگەي جۇيە جوق. بۇل ماسەلەنى يسلام ىنتىماقتاستىعى ۇيىمىنىڭ كوتەرىپ كەلە جاتقانىنا بىرنەشە جىلدىڭ ءجۇزى بولدى. الەم مۇسىلماندارى الداعى ۋاقىتتا بۇعان دا قول جەتكىزىپ قالۋى مۇمكىن. ەۋروپاداعى حالال تاماق پەن سۋسىن نارىعى $15,48 ميلليارد 2024 -جىلى $20,34 ميلليارد 2029-جىلعا قاراي. مۇسىلمانداردىڭ پايىزدىق ۇلەسى رەسەي %13,5 فرانسيا %8,8 ۇلى بريتانيا %6,3 گەرمانيا %5,7 يتاليا %4,8.
www.24.kz
