الەمدىك ب ا ق- تاعى قازاقستان: توقايەۆتىڭ ا ە س تۋرالى پىكىرى، پەرزەنتحانالار مەن سۋ رەسۋرستارى

ماۋسىمنىڭ سوڭعى اپتاسىندا حالىقارالىق باسىلىمدار ەلىمىز تۋرالى ءبىرقاتار ماتەريال جازدى. مەملەكەت باسشىسى قاسىم- جومارت توقايەۆتىڭ اەس سالۋعا قاتىستى رەفەرەندۋم وتەتىنىن ايتقانىن، ەكى زاڭعا قول قويىپ، ونىڭ حالىقارالىق ىنتىماقتاستىقتى نىعايتۋعا باعىتتالعانى تۋرالى ماقالالار جاريالادى. ادەتتەگىدەي Kazinform ءتىلشىسى وسى اپتادا الەمدىك ب ا ق- تا ەلىمىز جايلى باسقا قانداي ماتەريال شىققانىنا شولۋ ازىرلەدى.

Anadolu Agenсy: توقايەۆ: بيىل كۇزدە قازاقستاندا اتوم ەلەكتر ستانتسياسىن سالۋ بويىنشا رەفەرەندۋم وتەدى

بيىل كۇزدە قازاقستاندا اتوم ەلەكتر ستانتسياسىن سالۋ بويىنشا رەفەرەندۋم وتەدى. ەل پرەزيدەنتى قاسىم-جومارت توقايەۆ ب ا ق قىزمەتكەرلەرىن ماراپاتتاۋ راسىمىندە وسىلاي ايتتى، دەپ حابارلايدى Anadolu Agenсy.

وزدەرىڭىز جاقسى بىلەسىزدەر، ەكونوميكانى دامىتۋ ءۇشىن تۇراقتى ەنەرگيا كوزى كەرەك. سوندىقتان مەن اتوم ەلەكتر ستانساسىن سالۋ ماسەلەسىن پىسىقتاۋ تۋرالى ناقتى تاپسىرما بەردىم. قازىر جان-جاقتى تالقىلاۋ بولىپ جاتىر. ءارتۇرلى پىكىر ايتىلۋدا. بۇل ۇدەرىسكە بۇقارالىق اقپارات قۇرالدارى دا بەلسەنە اتسالىسۋى كەرەك، - دەپ كەلتىردى باسىلىم مەملەكەت باسشىسىنىڭ ءسوزىن.

اگەنتتىك توقايەۆ قازاقستاندا، شىن مانىندە، اتوم ەنەرگەتيكاسىن دامىتۋ ءۇشىن زور مۇمكىندىكتەر بار دەگەنىن جانە شەشىمدى حالىق شىعاراتىنىن اتاپ وتكەن.

شىن مانىندە، ەلىمىزدە اتوم ەنەرگەتيكاسىن دامىتۋعا زور مۇمكىندىك بار. ونى دۇرىس، ياعني ءتيىمدى پايدالانعان ءجون. وسى ماسەلەگە قاتىستى سوڭعى شەشىمدى حالىق قابىلدايدى. رەفەرەندۋم بيىل كۇزدە وتەدى. ۇكىمەت ناقتى داتانى ايقىندايدى، - دەپ جازدى باسىلىم پرەزيدەنتتىڭ ايتقانىن.

Trend: قازاقستان پرەزيدەنتى حالىقارالىق ىنتىماقتاستىقتى نىعايتۋعا باعىتتالعان ەكى زاڭعا قول قويدى

27 ماۋسىمدا قازاقستان پرەزيدەنتى قاسىم-جومارت توقايەۆ حالىقارالىق ىنتىماقتاستىقتى نىعايتۋعا باعىتتالعان ەكى زاڭعا قول قويدى. بۇل تۋرالى Trend ءتىلشىسى ءالي گاسىموۆ حابارلادى.

ءتىلشىنىڭ مالىمدەۋىنشە، ءبىرىنشى زاڭ - «قازاقستان رەسپۋبليكاسىنىڭ ۇكىمەتى مەن قىتاي حالىق رەسپۋبليكاسىنىڭ ۇكىمەتى اراسىنداعى مادەني ورتالىقتاردى ءوزارا قۇرۋ تۋرالى كەلىسىمدى راتيفيكاتسيالاۋ تۋرالى» . بۇل كەلىسىم مادەني-گۋمانيتارلىق سالاداعى دوستىق قارىم-قاتىناستى، الماسۋ مەن ىنتىماقتاستىقتى دامىتۋعا باعىتتالعان. وعان سايكەس، ەكى مەملەكەتتىڭ مادەني ورتالىقتارى جىبەرۋشى تاراپ اككرەديتتەگەن جانە قابىلداۋشى ەلدىڭ زاڭناماسىنا سايكەس جۇمىس ىستەيتىن كوممەرتسيالىق ەمەس ۇيىمدار بولادى.

ەكىنشى زاڭ - «تۇركى مەملەكەتتەرى ۇيىمىنا مۇشە مەملەكەتتەردىڭ ۇكىمەتتەرى اراسىنداعى حالىقارالىق قۇرامداستىرىلعان جۇك تاسىمالدارى تۋرالى كەلىسىمدى راتيفيكاتسيالاۋ تۋرالى».

Сentralasia.news: قازاقستاندا پەرزەنتحانالارعا بولىنەتىن قارجى ۇلعايدى

ق ر دەنساۋلىق ساقتاۋ مينيسترلىگى پەرزەنتحانالار مەن نەوناتولوگياداعى مەديتسينالىق قىزمەتتەردىڭ ساپاسىن ارتتىرۋ ماقساتىندا ولاردىڭ تاريفتەرىن قايتا قارادى. بۇل تۋرالى Сentralasia.news حابارلادى.

1-ماۋسىمنان باستاپ كۇردەلى بوسانۋ، ونىڭ ىشىندە كەسار تىلىگى بويىنشا تاريفتەر %60 عا، ال جاڭا تۋعان نارەستەلەردى كۇتۋ بويىنشا تاريفتەر %35 عا كوتەرىلدى، - دەپ كەلتىردى باسىلىم ۆەدومستۆو باسشىسى اقمارال ءالنازاروۆانىڭ پىكىرىن.

اگەنتتىكتىڭ مالىمەتىنشە، بۇل وزگەرىستەر مەديتسينالىق قىزمەتتەردى كوبەيتۋ مەن ولاردىڭ ساپاسىن جاقسارتۋعا، سونداي-اق بىلىكتى مامانداردى تارتۋعا باعىتتالعان.

سوڭعى جىلدارى تاريفتەر مەديتسينالىق ۇيىمداردىڭ انا مەن نارەستەلەرگە كۇتىم كورسەتۋگە جۇمساعان شىعىندارىن وتەي الماي كەلدى. قارجىنىڭ ازدىعى وسى ۇيىمداردا كرەديتورلىق بەرەشەكتىڭ قالىپتاسۋىنا سەبەپ بولدى. تاريفتەردى قايتا ەسەپتەۋ كەزىندە مەديتسينالىق مەكەمەلەردىڭ قىزمەت كورسەتۋگە كەتكەن ناقتى شىعىندارى ەسكەرىلدى.

Report: كاسپي تەڭىزى ماسەلەلەرى بويىنشا جوعارى دەڭگەيدەگى جۇمىس توبىنىڭ VIII وتىرىسى ءوتتى

2024-جىلعى 24-26-ماۋسىمدا يران استاناسى تەگەراندا كاسپيي تەڭىزى ماسەلەلەرى بويىنشا جوعارى دەڭگەيدەگى جۇمىس توبىنىڭ 8-وتىرىسى ءوتتى. بۇل تۋرالى Report ازەربايجان سىرتقى ىستەر مينيسترلىگىنە سىلتەمە جاساپ حابارلادى.

اگەنتتىكتىڭ مالىمەتىنشە، كەلىسسوزگە قازاقستاننىڭ كاسپيي تەڭىزى ماسەلەلەرى جونىندەگى ارنايى وكىلى ءزۇلفيا امانجولوۆا قاتىسقان. كەزدەسۋ بارىسىندا تاراپتار كاسپي تەڭىزىنە تىكەلەي شىعۋ جەلىلەرىن سالۋ ادىستەمەسىن تالقىلاۋدى جالعاستىردى.

باسىلىم كەلەسى كەزدەسۋ قازاقستاندا وتەتىنىن اتاپ ءوتتى.

كەلىسسوز بارىسىندا كاسپيي تەڭىزىندەگى ىنتىماقتاستىققا شولۋ جاسالدى. دەلەگاتسيالار يران تاراپىنا كەزدەسۋدى جوعارى دەڭگەيدە ۇيىمداستىرعانى ءۇشىن العىس ءبىلدىردى. ءسوجت كەلەسى وتىرىسى قازاقستاندا وتەدى، ونىڭ كۇندەرى ديپلوماتيالىق ارنالار ارقىلى كەلىسىلەدى، - دەپ جازدى Report.

Daryo: قازاقستان سۋ رەسۋرستارىن باسقارۋ جۇيەسىن جاڭعىرتۋعا $1 ميلليارد تارتۋدى كوزدەپ وتىر

پرەمەر- ءمينيستردىڭ ورىنباسارى - ۇلتتىق ەكونوميكا ءمينيسترى نۇرلان بايبازاروۆ قازاقستاننىڭ سۋ شارۋاشىلىعى جۇيەسىن قالپىنا كەلتىرۋ بويىنشا اۋقىمدى جوبانىڭ باستالعانىن مالىمدەدى. بۇل تۋرالى Daryo ۇكىمەتتىڭ باسپا ءسوز قىزمەتىنە سىلتەمە جاساپ حابارلادى.

باسىلىم كوكتەمگى سۋ تاسقىنى اۋقىمدى جاڭارتۋ باعدارلاماسىنىڭ كاتاليزاتورى بولعانىن اتاپ ءوتتى. ەل ۇكىمەتى پروبلەمالاردى جويۋ جانە سۋدى پايدالانۋدىڭ قاۋىپسىزدىگى مەن تيىمدىلىگىن قامتاماسىز ەتۋ ءۇشىن 500 ميلليارد تەڭگەدەن (1 ميلليارد دوللار) استام ينۆەستيتسيانى قاجەت ەتەتىن 16 باسىم جوبانى انىقتادى.

يسلام دامۋ بانكىنەن جەڭىلدەتىلگەن قارجى تارتۋ پىسىقتالىپ جاتىر. قاراجات ۇزاق مەرزىمگە جانە وتە تومەن مولشەرلەمەمەن بەرىلەدى، بۇل وسى سالاداعى قوردالانعان ماسەلەلەردى شەشۋگە كومەكتەسەدى، - دەپ جازدى باسىلىم.