الەمدىك ب ا ق- تاعى قازاقستان: دەۆيد كەمەروننىڭ ساپارى، بيۋدجەتتى ۇنەمدەۋ رەجيمى

Коллаж: Kazinform
Коллаж: Kazinform

وسى اپتادا ءبىرقاتار شەتەلدىك ب ا ق- تا قازاقستان تۋرالى كوپتەگەن ماقالا جاريالاندى. الەمدىك باسپا ءسوز بەتتەرىندە ۇلى بريتانيا سىرتقى ىستەر ءمينيسترى دەۆيد كەمەروننىڭ استاناعا ساپارى جانە مۇنايدى ارتىق ءوندىرۋ تۋرالى ەنەرگەتيكا مينيسترلىگىنىڭ مالىمدەمەسى جاريالاندى. حالىقارالىق باسپا ءسوز قازاقستان تۋرالى تاعى نە جازدى - Kazinform ءتىلشىسىنىڭ شولۋىنان وقىڭىز.

Anadolu agency: قازاقستان مەن ۇلىبريتانيا ستراتەگيالىق ارىپتەستىك جانە ىنتىماقتاستىق تۋرالى كەلىسىمگە قول قويدى

تۇركيالىق Anadolu agency اقپارات اگەنتتىگى ۇلى بريتانيانىڭ باس ديپلوماتى دەۆيد كەمەروننىڭ استاناعا رەسمي ساپارى بارىسىندا قازاقستان مەن ۇلى بريتانيا اراسىندا ستراتەگيالىق سەرىكتەستىك پەن ىنتىماقتاستىق تۋرالى كەلىسىمگە قول قويىلعانىن حابارلادى.

ماقالادا كەلىسىمگە قازاقستان رەسپۋبليكاسىنىڭ سىرتقى ىستەر ءمينيسترى مۇرات نۇرتىلەۋ مەن ۇلى بريتانيا سىرتقى ىستەر ءمينيسترى دەۆيد كەمەرون اراسىنداعى كەلىسسوزدەر ناتيجەسىندە قول قويىلعانى اتاپ وتىلگەن.

بۇل جان-جاقتى كەلىسىم استانا مەن لوندون اراسىنداعى ساياسي، ساۋدا جانە ينۆەستيتسيالىق قاتىناستاردى جاڭا دەڭگەيگە شىعارۋداعى ماڭىزدى قادام بولماق، - دەپ كەلتىردى باسىلىم قازاقستاننىڭ سىرتقى ىستەر ءمينيسترىنىڭ ءسوزىن.

سونىمەن قاتار، اگەنتتىك دەۆيد كەمەروننىڭ قازاقستان پرەزيدەنتى قاسىم-جومارت توقايەۆپەن كەلىسسوزدەر جۇرگىزگەنىن جازدى. كەلىسسوزدەر بارىسىندا قازاقستان باسشىسى ءوز ەلى مەن ۇلى بريتانيا اراسىنداعى ەكىجاقتى ىنتىماقتاستىقتىڭ قارقىندى دامىپ كەلە جاتقانىن اتاپ وتكەن. ال، ۇلى بريتانيالىق ساياساتكەر ءبىرقاتار سالادا ارىپتەستىكتى نىعايتۋعا نيەتىن مالىمدەگەن.

ەنەرگەتيكا، ءبىلىم، بيزنەس جانە مادەنيەت سالالارىنداعى ىنتىماقتاستىقتى نىعايتۋعا جانە حالىقتار اراسىنداعى بايلانىستاردى وركەندەتۋگە نيەتتىمىز، - دەپ كەلتىرەدى Anadolu اگەنتتىگى دەۆيد كەمەروننىڭ ءسوزىن.

The Times of Central Asia: قازاقستان ەتنيكالىق قازاقتاردى تاريحي وتانىنا ورالۋعا شاقىرادى

حالىقارالىق The Times of Central Asia اگەنتتىگى ەلىمىزگە قانداستارىمىزدىڭ قونىس اۋدارىپ جاتقانىن حابارلادى. باسىلىم ەڭبەك جانە حالىقتى الەۋمەتتىك قورعاۋ مينيسترلىگىنە سۇيەنىپ، وسى جىلدىڭ قاڭتار-ءساۋىر ارالىعىندا 4351 ەتنيكالىق قازاق تاريحي وتانىنا ورالىپ، «قانداس» مارتەبەسىن العانىن جازدى.

1991-جىلدان بەرى 1132700 ەتنيكالىق قازاق ەلگە ورالدى. 2023-جىلدان باستاپ «ءبىر تەرەزە» قاعيداتى بويىنشا «قانداس» مارتەبەسىن بەرۋدىڭ پيلوتتىق سحەما بويىنشا قازاقستاننىڭ شەتەلدەگى ەلشىلىكتەرى ارقىلى 7518 ەتنيكالىق قازاقتىڭ ءوتىنىشى قابىلداندى. بيىل ورالعانداردىڭ 51,1 پايىز قىتايدان؛ 31,9 پايىز وزبەكستاننان؛ 6,4 پايىز تۇرىكمەنستاننان؛ 5,4 پايىز موڭعوليادان؛ 3,7 پايىز رەسەيدەن، 1,5 پايىز باسقا ەلدەردەن كەلگەن. ەڭبەككە جارامدى جاستاعىلار - 59,1 پايىز، كامەلەتكە تولماعاندار - 31,7 پايىز، زەينەتكەرلەر - 9,2 پايىز، - دەپ جازدى باسىلىم.

سونداي-اق، اگەنتتىكتىڭ جازۋىنشا، ەل ۇكىمەتى ەتنيكالىق قازاقتاردى ەلدىڭ سولتۇستىگى مەن شىعىسىنداعى جۇمىس تاپشى وڭىرلەرگە، اتاپ ايتقاندا، اقمولا، اباي، قوستاناي جانە پاۆلودار وبلىستارىنا كوشىرىپ جاتىر.

Eureporter: قازاقستاننىڭ كومەك الۋشىدان دونورعا دەيىنگى جولى: قازاقستاننىڭ دامۋ ءۇشىن بولەتىن كومەگى ايماقتىڭ قاۋىپسىزدىگىنە قالاي ىقپال ەتەدى

Eureporter جاڭالىقتار پورتالى KazAid ءتوراعاسى اركەن ارىستانوۆتىڭ قازاقستاننىڭ ءوزى كومەككە مۇقتاج ەلدەن دونورعا دەيىنگى جولى جانە رەسپۋبليكانىڭ كومەگى ايماقتاعى قاۋىپسىزدىككە قالاي ىقپال ەتىپ جاتقانى تۋرالى پىكىرىن جاريالادى.

ءبىر ەلدەگى داعدارىس ونىڭ كورشىلەرىنە، ءتىپتى بۇكىل جەر شارىنا اسەر ەتۋى مۇمكىن. ب ۇ ۇ- نىڭ 2030-جىلعا دەيىنگى تۇراقتى دامۋ جونىندەگى كۇن ءتارتىبى وسى اقيقاتقا نەگىزدەلەدى، وندا دامۋ ماقساتىندا ىنتىماقتاستىقتاعى ارىپتەستىك قاجەت ەكەنىنە باسا نازار اۋدارىلادى. مەن KazAid ءتوراعاسى رەتىندە قازاقستان كومەككە مۇقتاج ەلدەن دونور ەلگە اينالعان ساتىنەن بەرى وسى جاھاندىق قاعيداتتى ۇستانىپ كەلە جاتقانىن ماقتانىشپەن ايتا الامىن، - دەپ كەلتىردى باسىلىم اركەن ارىستانوۆتىڭ ءسوزىن.

ماقالادا ەكونوميكالىق ءوسىم دامۋعا ىقپال ەتەتىن باستى كۇش ەكەنى اتاپ وتىلگەن. قازاقستان 1991-جىلى تاۋەلسىزدىك العاننان بەرى ايتارلىقتاي ەكونوميكالىق وسىمگە قول جەتكىزدى.

Daryo: قازاقستان وپەك+ كەلىسىمى اياسىندا 2024-جىلى ارتىق وندىرگەن مۇنايدى وتەۋگە ۋادە بەردى

وزبەكستاننىڭ Daryo اگەنتتىگىنىڭ حابارلاۋىنشا، ق ر ەنەرگەتيكا مينيسترلىگى 2024-جىلدىڭ 1-توقسانىندا ارتىق مۇناي ءوندىرۋدى جويۋ جوسپارىن جاريالادى. بۇل مىندەتتەمە وپەك+ بىرلەسكەن مينيسترلىك مونيتورينگ كوميتەتىنىڭ (بممك) 53-وتىرىسىنىڭ ديرەكتيۆالارىنا سايكەس كەلەدى. ەنەرگەتيكا مينيسترلىگى ەل وپەك+ ۋاعدالاستىعى اياسىندا كەلىسىلگەن ءوندىرۋ كولەمىنە سايكەس كەلتىرۋ ءۇشىن 2024-جىلى وتەماقى تولەۋدىڭ ەگجەي-تەگجەيلى جوسپارىن ۇستاناتىنىن ايتتى.

ءبىز ءاربىر ەلدىڭ ءوز مىندەتتەمەلەرىن ساقتاۋى جانە مۇناي نارىعىن تۇراقتاندىرۋ ءۇشىن ىنتىماقتاستىقتى ساقتاۋدىڭ ماڭىزدىلىعىن تۇسىنەمىز، - دەپ كەلتىرەدى Daryo ەنەرگەتيكا مينيسترلىگىنىڭ حابارلاماسىن.

ماقالا اۆتورى قازاقستان ۇكىمەتى ارتىق ءوندىرىستى باسقارۋدىڭ ستراتەگيالىق ءتاسىلىن ازىرلەدى، ول كەلەسى جىلى كەزەڭ-كەزەڭىمەن جۇزەگە اسىرىلادى دەپ اتاپ ءوتتى. بۇل باستاما - 2024-جىلعى ناۋرىزدا تىركەلگەن ارتىق وندىرۋگە جاۋاپ بولىپ وتىر. ول كەزدە مۇناي ءوندىرۋ كولەمى شەكتەن تاۋلىگىنە 131000 باررەلگە اسىپ كەتكەن جانە ول اۋا رايىنىڭ قولايسىزدىعى مەن جىلىتۋ ماۋسىمىنىڭ ۇزاققا سوزىلۋىمەن بايلانىستى بولعان. مينيسترلىك بولاشاقتا ءوندىرىس كولەمىن تۇزەتىپ وتىرىپ، وسى مىندەتتەمەنى ورىندايتىنىن حابارلادى.

The Times of Central Asia: قازاقستاندا تاسقىن ءقاۋپى ءالى دە بار، ءبىراق كەيبىر تۇرعىندار ۇيلەرىنە ورالىپ جاتىر

حالىقارالىق The Times of Central Asia جاڭالىقتار پورتالى قازاقستان الاپات سۋ تاسقىنىمەن كۇرەسىپ جاتقانىن حابارلادى.

بىرنەشە اپتا بويى قازاقستاندا تۇرعىنداردى ەۆاكۋاتسيالاۋ، سۋ سورۋ جانە بوگەتتەردى نىعايتۋ جۇمىستارى جۇرگىزىلىپ جاتىر. قاۋىپ ءالى دە سەيىلگەن جوق، دەگەنمەن كەيبىر ايماقتاردا سۋ دەڭگەيى تومەندەدى جانە ەل ۇكىمەتى تابيعي اپاتتان زارداپ شەككەندەرگە كومەك كورسەتۋ ءۇشىن جۇمىس ىستەپ جاتىر، - دەپ جازدى The Times of Central Asia ماقالاسىندا.

ماقالادا ۇكىمەتتىڭ مالىمەتىنە سىلتەمە جاساي وتىرىپ جازىلعانداي، قازىردىڭ وزىندە توپان سۋعا بايلانىستى ەۆاكۋاتسيالانعان 22700 گە جۋىق ادام ۇيلەرىنە ورالدى، اقتوبە سياقتى سۋ تاسقىنىنان ەڭ كوپ زارداپ شەككەن وڭىرلەردە جاعداي تۇراقتالدى. دەگەنمەن، ەۆاكۋاتسيالاۋ ورتالىقتارىندا مىڭداعان ادام قالىپ وتىر، ولاردىڭ كوبى - بالالار. 2024-جىلدىڭ ناۋرىزىندا باستالعان سۋ تاسقىنىندا 100 مىڭنان اسا ادام قاۋىپسىز جەرگە كوشىرىلدى.

اقتوبە وبلىسىندا جاڭا ۇيلەردىڭ قۇرىلىسى باستالىپ تا كەتتى. قوستاناي وبلىسىنىڭ ارقالىق قالاسىندا زارداپ شەككەن 27 ادامعا پاتەر ساتىپ الىندى. باسقا وڭىرلەردە دە جاڭا تۇرعىن ۇيلەر بەرىلدى، - دەپ تولىقتىردى باسىلىم.

Trend: قازاقستان بيۋجەتتى قاتاڭ ۇنەمدەۋ رەجيمىن ەنگىزەدى - قاسىم-جومارت توقايەۆ

قازاقستاندا مەملەكەتتىك قاراجاتتى ۇنەمدەۋ رەجيمى ەنگىزىلەدى. ەل پرەزيدەنتى قاسىم-جومارت توقايەۆ قازاقستان حالقى اسسامبلەياسىنىڭ XXXIII سەسسياسىندا وسىنداي مالىمدەمە جاسادى. بۇل تۋرالى ازەربايجاننىڭ Trend جاڭالىقتار پورتالى حابارلادى.

ەلىمىزدەگى كومپانيالار، جەكە كاسىپكەرلەر ءتۇرلى كومەك قورلارىنا قوماقتى قارجى اۋداردى. قاراجات كۇن سايىن ءتۇسىپ جاتىر، كومەك قورى ۇلعايادى دەپ سەنەمىن. كاسىپكەرلەرگە زور العىس ايتامىن. بولاشاقتا دا حالقىمىزدىڭ يگىلىگى ءۇشىن بىرگە جۇمىس ىستەيمىز دەپ سەنەمىن. جينالعان قاراجات ەلدى مەكەندەردى قالپىنا كەلتىرۋگە جۇمسالادى. سونداي- اق اپاتتىڭ كەسىرىنەن قيىن جاعدايعا تاپ بولعان ازاماتتارعا كومەك رەتىندە بەرىلەدى. ەشكىم ەلەۋسىز قالمايدى. مەملەكەت شىعىندى تۇگەل وتەيدى. تاسقىننىڭ زاردابىن جويۋ ءۇشىن بيۋدجەت شىعىستارى قىسقارتىلاتىن بولدى. مەملەكەت قارجىسىن قاتاڭ ۇنەمدەۋ رەجيمى ەنگىزىلەدى، - دەپ كەلتىرەدى قاسىم-جومارت توقايەۆتىڭ ءسوزىن Trend.

سوڭعى جاڭالىقتار