الەمدىك ب ا ق-تاعى قازاقستان: دۇنيەجۇزىلىك كوشپەندىلەر ويىندارى، تۋريزم، گيدروەنەرگەتيكا

وسى اپتادا شەتەلدىك ب ا ق قازاقستاندى بىرنەشە رەت اتاپ ءوتتى. الەمدىك باسىلىمدار ەۋروپالىق وداقتىڭ ترانسكاسپي باعىتىنا، ەنەرگەتيكالىق جوبالارعا، تۋريزمگە جانە دۇنيەجۇزىلىك كوشپەندىلەر ويىندارىنا دەگەن قىزىعۋشىلىعى تۋرالى جازدى. Kazinform ءتىلشىسىنىڭ قازاقستان تۋرالى الەمدىك باسپا سوزگە شولۋىن ۇسىنامىز.

Trend: يتاليا قازاقستانداعى جاڭا ەنەرگەتيكالىق جوبالارعا قاتىسۋ مۇمكىندىگىن قاراستىرۋدا

يتاليا قازاقستانداعى مۇناي- حيميا جوبالارىنا قاتىسۋ جانە وتىن زاۋىتتارىن سالۋ مۇمكىندىگىن قاراستىرۋدا. بۇل تۋرالى ازەربايجاندىق Trend اقپارات اگەنتتىگىنە بەرگەن ەكسكليۋزيۆ سۇحباتىندا يتاليا- قازاقستان ساۋدا قاۋىمداستىعىنىڭ (ACIK) پرەزيدەنتى ماركو بەرەتتا ايتتى.

قازاقستاننىڭ ەۋروپالىق ەنەرگەتيكالىق نارىقتاعى قاتىسۋىن ارتتىرۋداعى الەۋەتى ايتارلىقتاي جوعارى. بۇل ەل ەنەرگەتيكالىق رەسۋرستارعا، اسىرەسە يتاليانىڭ نەگىزگى ەكسپورتتىق تاۋارى - شيكى مۇنايعا باي. يتاليا قازاقستاننان تۇراقتى جانە ءارتاراپتاندىرىلعان قۋات كوزدەرىنەن پايدا كورە الادى، بۇل ەنەرگەتيكالىق قاۋىپسىزدىكتى قامتاماسىز ەتۋگە كومەكتەسەدى.

سونىمەن قاتار، ەنەرگەتيكا سالاسىنداعى ىنتىماقتاستىق ەكى ەلدىڭ تۇراقتى دامۋعا دەگەن ۇمتىلىسىن كۇشەيتە وتىرىپ، جاڭارتىلاتىن ەنەرگيا جوبالارىن قامتۋ ءۇشىن كەڭەيتىلۋى مۇمكىن. بولاشاق جوبالار رەتىندە ءبىز مۇناي- حيميا، قالدىقتاردان ەنەرگيا ءوندىرۋ جانە وتىن زاۋىتتارىن سالۋ بويىنشا جوبالارعا قاتىسۋ مۇمكىندىگىن قاراستىرۋدامىز، - دەدى ماركو بەرەتتا.

اگەنتتىكتىڭ حابارلاۋىنشا، ول بۇل جوبالاردىڭ قازاقستاندا ەنەرگيا ءوندىرۋدى ءارتاراپتاندىرۋ بويىنشا تاڭدالعان كۇن تارتىبىنە سايكەس كەلەتىنىن اتاپ وتكەن.

كولىك سالاسىنداعى ىنتىماقتاستىق تۋرالى ايتا وتىرىپ، ماركو بەرەتتا قازاقستاننىڭ قىتاي مەن ەۋروپا اراسىنداعى ترانزيت حاب رەتىندە، اتاپ ايتقاندا ورتا ءدالىز ارقىلى دامۋى ەۋروپاعا، سونىڭ ىشىندە يتالياعا جۇك تاسىمالداۋدى ارتتىرۋ ءۇشىن ايتارلىقتاي الەۋەتكە يە ەكەنىن اتاپ ءوتتى، - دەپ جازدى Trend.

تاسس: ەو قازاقستانمەن ترانسكاسپي باعىتىن دامىتۋعا مۇددەلى ەكەنىن راستادى

ەۋروپالىق وداق قازاقستانمەن بىرگە ترانسكاسپي حالىقارالىق كولىك باعىتىن دامىتۋعا مۇددەلى ەكەنىن راستادى، دەپ حابارلايدى رەسەيلىك تاسس اگەنتتىگى ق ر پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇرات نۇرتىلەۋگە سىلتەمە جاساپ.

بۇل تۋرالى مۇرات نۇرتىلەۋ استانادا ەۋروپالىق وداقتىڭ سىرتقى ىستەر جانە قاۋىپسىزدىك ساياساتى جونىندەگى جوعارعى وكىلى جوزەپ بوررەلمەن وتكەن كەلىسسوزدەن كەيىن ايتتى.

ترانسكونتينەنتالدى تەمىرجول، اۋە جانە اۆتوموبيل كولىگى دالىزدەرىن دامىتۋدىڭ ماڭىزى اتاپ ءوتىلدى. ەۋرووداق ترانسكاسپي حالىقارالىق كولىك باعىتىن بىرلەسىپ دامىتۋعا مۇددەلى ەكەنىن راستايدى، - دەپ حابارلادى اگەنتتىك مۇرات نۇرتىلەۋدىڭ سوزىنە سىلتەمە جاساپ.

سونىمەن قاتار، باسىلىمنىڭ مالىمەتىنشە، كەزدەسۋ بارىسىندا تاراپتار وڭىرلىك جانە حالىقارالىق ماسەلەلەردى تالقىلادى.

Anadolu: قازاقستانعا 2023-جىلى 9,2 ميلليون تۋريست كەلگەن

وتكەن جىلى قازاقستانعا 9,2 ميلليون شەتەلدىك تۋريست كەلدى، قىتايدان، ءۇندىستاننان، گەرمانيادان، وڭتۇستىك كورەيادان جانە بىرىككەن اراب امىرلىكتەرىنەن كەلۋشىلەر ارتتى. بۇل تۋرالى تۇركيانىڭ Anadolu اقپارات اگەنتتىگى قازاقستاننىڭ تۋريزم جانە سپورت مينيسترلىگىنە سىلتەمە جاساپ حابارلادى.

ۆيزاسىز رەجيم تۋرالى كەلىسىمنىڭ ارقاسىندا ەلگە كەلەتىن قىتايلىق تۋريستەردىڭ سانى شامامەن 20 ەسە ءوستى. وتكەن جىلى قازاقستانعا ءۇندىستاننان 78 مىڭ، گەرمانيادان 85 مىڭ ادام كەلگەن. ولاردان كەيىن 36600 اداممەن وڭتۇستىك كورەيا جانە 10500 تۋريستىمەن ب ا ء ا تۇر.

وزبەكستان ازاماتتارى دا - قازاقستانعا ءجيى كەلەتىن قوناقتار. 2023 -جىلى ەلگە وزبەكستاننان 3,6 ميلليون، رەسەيدەن 2 ميلليون، قىرعىزستاننان 1,6 ميلليون جانە تاجىكستاننان 700 مىڭ ادام كەلگەن، دەپ حابارلايدى Anadolu.

The Times of Central Asia: قازاقستان تۋريزمدى دامىتۋعا ۇمتىلۋدا

قازاقستاندا الماتى اگلومەراتسياسىن، بۋراباي، قاتونقاراعاي جانە بۇقتىرما كۋرورتتارىن، كاسپي جاعالاۋىنداعى كۋرورتتاردى جانە ەجەلگى تۇركىستان قالاسىن قوسا العاندا، وننان استام تۋريستىك كلاستەر دامىپ كەلەدى، دەپ حابارلايدى The Times of Central Asia.

مامىردا قازاقستان دۇنيەجۇزىلىك ەكونوميكالىق فورۋمنىڭ (ساياحات پەن تۋريزمدى دامىتۋ يندەكسى) جاھاندىق تۋريزم رەيتينگىندە 14 پوزيتسياعا كوتەرىلىپ، قاتار، ازەربايجان، وزبەكستان، ۆەتنام، مىسىر جانە لاتۆيانى باسىپ وزىپ، 119 ەلدىڭ ىشىندە 52-ورىنعا يە بولدى، - دەپ جازادى باسىلىم.

اگەنتتىكتىڭ مالىمەتىنشە، تۋريزم جانە سپورت مينيسترلىگى بيىل قازاقستانعا 10 ميلليوننان استام شەتەلدىك تۋريست كەلەدى دەپ كۇتۋدە.

Daryo: ا د ب مەن قازاقستان گيدروەنەرگەتيكانى دامىتۋعا جاردەمدەسۋ تۋرالى كەلىسىمگە قول قويدى

ازيا دامۋ بانكى (ا د ب) مەن قازاقستان سۋ ەنەرگەتيكاسىن دامىتۋ باعدارلاماسىن كونسالتينگتىك قولداۋ تۋرالى كەلىسىمگە قول قويدى. بۇل ستراتەگيالىق سەرىكتەستىك گيدروەنەرگەتيكالىق جوبالاردى دامىتۋعا جاردەمدەسۋگە باعىتتالعان، دەپ حابارلادى وزبەكستاننىڭ Daryo ينتەرنەت- باسىلىمى.

باسىلىم كەلىسىم اياسىندا ادب قازاقستانعا بىرنەشە نەگىزگى باعىتتار بويىنشا: الدىن الا تەحنيكالىق- ەكونوميكالىق نەگىزدەمەلەردى جۇرگىزۋ، اۋكتسيوندىق قۇجاتتاما مەن ەلەكتر قۋاتىن ساتىپ الۋ تۋرالى كەلىسىمنىڭ جوباسىن دايىنداۋ، ينۆەستورلاردى تارتۋ ءۇشىن باسەكەگە قابىلەتتى وتىنىمدەردى تارتۋعا كومەك كورسەتەتىنىن جازدى.

ANI: دۇنيەجۇزىلىك كوشپەندىلەر ويىندارى قازاقستاندا 8-قىركۇيەكتە باستالادى

قازاقستاندا ورتالىق ازيانىڭ كوشپەلى حالىقتارىنىڭ داستۇرلەرىنە نەگىزدەلگەن ەتنيكالىق سپورت تۇرلەرىنەن جارىستار وتەتىن بىرەگەي حالىقارالىق سپورتتىق شارا - بەسىنشى دۇنيەجۇزىلىك كوشپەندىلەر ويىندارى وتەدى، دەپ حابارلايدى ءۇندىستاننىڭ Asian News International (ANI) اقپارات اگەنتتىگى.

ويىندارعا 100-گە جۋىق ەلدەن قاتىسۋشىلار كەلەدى دەپ كۇتىلۋدە. سونداي- اق سپورتتىق جارىستار مەن مادەني شارالاردى 100 مىڭنان استام تۋريست تاماشالايدى دەگەن جوسپار بار.

الدىڭعى قاتارلى سپورت نىساندارىندا ات بايگەسى، ۇلتتىق كۇرەس، ءداستۇرلى ينتەللەكتۋال ويىندارى، جەكپە-جەك، ​​ساداق اتۋ جانە حالىق ويىندارى سىندى سپورتتىڭ 21 تۇرىنەن جارىس ۇيىمداستىرىلادى.

كوشپەندىلەر ويىندارى قازاقستاننىڭ ەلورداسى استانادا «ۇلى دالاداعى كەزدەسۋ» ۇرانىمەن وتەدى.

اۆتور

راحيلا تلەۋوۆا