الەمدىك ب ا ق- تاعى قازاقستان: ب ۇ ۇ باس حاتشىسى استاناعا كەلەدى، سينگاپۋر، تۇركيا، ا ق ش- پەن سەرىكتەستىك

وسى اپتادا الەمنىڭ بۇقارالىق اقپارات قۇرالدارى ەلىمىزگە قاتىستى كوپ ماتەريال جازدى. اسىرەسە، مالايزيا پرەمەر- ءمينيسترى انۋار يبراگيمنىڭ استاناعا رەسمي ساپارى جانە ەكونوميكانى ىرىقتاندىرۋ تۋرالى جارلىق كوپتەگەن ب ا ق- تىڭ نازارىندا بولدى. شەتەلدەگى باسىلىمدار قازاقستان تۋرالى باسقا قانداي حابار تاراتقانىن Kazinform ءتىلشىسىنىڭ شولۋىنان وقىڭىز.

The Straits Times: سينگاپۋر فيرمالارى تەحنولوگيا جانە يننوۆاتسيا سالاسىندا قازاقستاندىق كاسىپورىندارمەن بىرلەسە جۇمىس ىستەيدى

23-مامىردا قازاقستان-سينگاپۋر بيزنەس فورۋمى ءوتتى. قازاقستان پرەزيدەنتى قاسىم- جومارت توقايەۆ پەن سينگاپۋر پرەمەر-ءمينيسترىنىڭ ورىنباسارى حەنگ سۋي كەاتتىڭ قاتىسۋىمەن وتكەن جيىندا ەكى ەل اراسىنداعى تاۋار اينالىمى 2023 -جىلى 50 پايىزعا ءوسىپ، 600 ميلليون ا ق ش دوللارىنان اسقانى ايتىلدى. سوندىقتان قازاقستان سينگاپۋردىڭ ورتالىق ازياداعى باستى ساۋدا سەرىكتەسى سانالادى. بۇل جايىندا سينگاپۋرلىق The Straits Times باسىلىمى جازدى.

سونداي- اق باسىلىم قازاقستان پرەزيدەنتى قاسىم-جومارت توقايەۆتىڭ بايانداماسىن ايرىقشا اتاپ وتكەن. مەملەكەت باسشىسى ەكى ەل ساياسي جانە ەكونوميكالىق تۇرعىدان ارىپتەس ەكەنىن، الداعى كەزەڭدە بۇل ىنتىماقتاستىق ارتا تۇسەتىنىن جەتكىزگەن.

- ءبىز سينگاپۋرلىق كومپانيالارمەن تازا ەنەرگيا ءوندىرۋ، سونداي- اق تەحنولوگيالار مەن تاجىريبە الماسۋ سالاسىنداعى سەرىكتەستىكتى كەڭەيتۋگە مۇددەلىمىز. مىسالى، سينگاپۋر قوقىس جاعۋ ارقىلى قۋات وندىرەتىن وزىق قوندىرعىلارىمەن جانە قالدىقتاردى باسقارۋ جونىندەگى يننوۆاتسيالىق تەحنولوگيالارىمەن تانىمال، - دەپ كەلتىردى توقايەۆتىڭ ءسوزىن The Straits Times.

ماقالا سوڭىندا باسىلىم قازاقستان مەن سينگاپۋر تاراپى ساۋدا مۇمكىندىكتەرى، سيفرلى ەكونوميكا مەن بيزنەستىڭ وركەندەۋى باعىتىندا جاڭا باستامالارعا جول اشقانىن كورسەتكەن.

Anadolu Agency: قازاقستان پرەزيدەنتى تۇركيا ۇلتتىق ءماجىلىسىنىڭ ءتوراعاسىن قابىلدادى

تۇركيا ۇلتتىق ءماجىلىسىنىڭ ءتوراعاسى نۋمان كۋرتۋلمۋشتىڭ استاناعا ساپارى جونىندە Anadolu اگەنتتىگى جازدى.

اگەنتتىكتىڭ مالىمەتىنشە، قازاقستان پرەزيدەنتى قاسىم- جومارت توقايەۆپەن كەزدەسۋىندە قوس تاراپ حالىقارالىق ۇيىمدار مەن ەكى ەل اراسىنداعى ىنتىماقتاستىقتى نىعايتۋ جايلى ءسوز قوزعاپ، تۇركى مەملەكەتتەرى ۇيىمىنا مۇشە باۋىرلاس ەلدەردىڭ ءوزارا ىنتىماعىن نىعايتۋ جونىندە پىكىر الماستى. سونىمەن قاتار قازاقستان مەن تۇركيا اراسىنداعى كەڭەيتىلگەن ستراتەگيالىق سەرىكتەستىكتى ودان ءارى نىعايتۋ ماسەلەسى تالقىلاندى.

كەزدەسۋدە تۇركيا ۇلتتىق ءماجىلىسىنىڭ ءتوراعاسى تۇركى حالىقتارىنا ورتاق تۇلعا قوجا احمەت ياسساۋي اتىنداعى قازاق- تۇرىك حالىقارالىق ۋنيۆەرسيتەتىندە وتەتىن كونفەرەنتسياعا قاتىساتىنىن ايتقان. ودان ءارى ول قازاقستاندا تابىستى ساياسي، ەكونوميكالىق جانە الەۋمەتتىك رەفورمالار ءجۇرىپ جاتقانىن، مۇنىڭ ءبارى ەل دامۋىنا وڭ ىقپال تيگىزەتىنىنە سەنىم ءبىلدىردى.

ءوز كەزەگىندە باسىلىم قازاقستان پرەزيدەنتى قاسىم- جومارت توقايەۆتىڭ ەكى ەل اراسىنداعى پارلامەنتتىك ديپلوماتيانىڭ الەۋەتىن جوعارى باعالاپ، نۋمان كۋرتۋلمۋشتىڭ ساپارى تۇركيا مەن قازاقستان اراسىنداعى دوستىق پەن ىنتىماقتاستىق تۋرالى كەلىسىمنىڭ 30 جىلدىعى قارساڭىندا ءوتىپ جاتقانىنا ەرەكشە زەر سالعانىن اتاپ وتكەن. ماقالا سوڭىندا تۇركيا - قازاقستاننىڭ ەڭ ءىرى بەس ساۋدا سەرىكتەسىنىڭ ءبىرى ەكەنى، سونىمەن قاتار باستى 10 ينۆەستوردىڭ قاتارىنا كىرەتىنى، كەلەشەكتە ءوزارا ساۋدا اينالىمى 10 ميلليارد دوللارعا جەتەتىنى تۋرالى جازىلعان.

Daryo: قازاقستان مەن سينگاپۋر ءوزارا ساۋدا كولەمىن 2 ميلليارد ا ق ش دوللارىنا جەتكىزۋدى جوسپارلاپ وتىر

قازاقستان پرەزيدەنتىنىڭ سينگاپۋرعا ساپارى بۇل اپتادا الەم ب ا ق- تارىنىڭ نازارىنان تۇسكەن جوق. Daryo باسىلىمى قاسىم- جومارت توقايەۆ پەن سينگاپۋر پرەزيدەنتى تارمان شانمۋگاراتنامنىڭ كەزدەسۋىنە توقتالعان. ەكى ەل باسشىلارى ءتيىمدى ينۆەستيتسيالىق جوبالاردى تالقىلاپ، سونىڭ ىشىندە ەكى جاقتى قارىم- قاتىناستاردىڭ قۇقىقتىق نەگىزىن نىعايتۋعا كەلىسكەن.

باسىلىمنىڭ جازۋىنشا، قازاقستاندا 140 تان استام سينگاپۋرلىق كومپانيا مەن بىرلەسكەن كاسىپورىن جۇمىس ىستەيدى. سينگاپۋردىڭ قازاقستان ەكونوميكاسىنا سالعان ينۆەستيتسياسىنىڭ جالپى كولەمى 1,7 ميلليارد ا ق ش دوللارىنان اسقان. سونىمەن قاتار قوس تاراپ ءبىلىم بەرۋ جانە ادامي كاپيتالدى دامىتۋ سالالارىنداعى ىنتىماقتاستىقتى جانداندىرۋ جايىن ءسوز ەتتى.

The Times of Central Asia: قازاقستان مەن ا ق ش وكىلدەرى ادام قۇقىقتارى جانە دەموكراتيالىق رەفورمالاردى تالقىلادى

20 -مامىر كۇنى استانادا قازاقستان مەن ا ق ش اراسىنداعى ادام قۇقىقتارى جانە دەموكراتيالىق رەفورمالار بويىنشا جوعارى دەڭگەيدەگى جىل سايىنعى ديالوگتىڭ ءۇشىنشى وتىرىسى ءوتتى. قازاقستان دەلەگاتسياسىن قازاقستان پرەزيدەنتىنىڭ حالىقارالىق ىستەر جونىندەگى كومەكشىسى، ەلشى ەرجان قازىحان باسقارسا، ا ق ش دەلەگاتسياسىن مەملەكەتتىك حاتشىنىڭ ازاماتتىق قاۋىپسىزدىك، دەموكراتيا جانە ادام قۇقىقتارى ماسەلەلەرى جونىندەگى ورىنباسارى ۋزرا زەيا باستاپ كەلدى. بۇل جونىندە The Times of Central Asia باسىلىمى اقپارات تاراتتى.

باسىلىمنىڭ جازۋىنشا، ەكى ەل، بۇعان دەيىنگى ديالوگتارداعىداي، ادام قۇقىقتارىن، زاڭ ۇستەمدىگىن، ءسوز بوستاندىعىن جانە حالىقتىڭ وسال توپ وكىلدەرىن قورعاۋدى ىلگەرىلەتۋ جونىندەگى ورتاق مىندەتتەرىن تالقىلادى. سونداي- اق ا ق ش دەلەگاتسياسى قازاقستان پرەزيدەنتى قاسىم- جومارت توقايەۆتىڭ ادام قۇقىقتارىن قورعاۋ، ازاماتتىق قوعام قۇرۋداعى رەفورمالارى مەن تۇرمىستىق زورلىق- زومبىلىق جاساعاندارعا جازانى كۇشەيتۋ جونىندەگى زاڭعا قول قويۋى سەكىلدى شارالاردى جوعارى باعالادى.

بۇعان قوسا دەلەگاتسيا مۇشەلەرى زاڭ ۇستەمدىگى، ءسوز جانە باق بوستاندىعى، ءدىن نەمەسە سەنىم بوستاندىعى، مۇگەدەكتىگى بار ادامداردىڭ قۇقىقتارى، ب ۇ ۇ- نىڭ بوسقىندار ءىسى جونىندەگى جوعارعى كوميسسارى مەن س5+1 پلاتفورماسى اياسىنداعى كوپجاقتى ىنتىماقتاستىق ماسەلەلەرىن ءسوز ەتكەن.

Trend: ب ۇ ۇ باس حاتشىسى قازاقستانعا كەلەدى

بىرىككەن ۇلتتار ۇيىمىنىڭ باس حاتشىسى انتونيو گۋتەريش قازاقستاننىڭ سىرتقى ىستەر ءمينيسترىنىڭ ءبىرىنشى ورىنباسارى اقان راحمەتۋللينمەن كەزدەسۋى بارىسىندا شىلدەدە استانادا وتەتىن ش ى ۇ- عا مۇشە ەلدەردىڭ مەملەكەت باسشىلارى كەڭەسىنىڭ وتىرىسىنا قاتىساتىنىن حابارلادى. گۋتەريشتىڭ قازاقستان استاناسىنا كەلۋى ازيا ەلدەرىنە ساپارى اياسىندا وتەدى. بۇل جايلى Trend اگەنتتىگى جازدى.

سونداي- اق اقان راحمەتۋللين قازاقستاننىڭ ب ۇ ۇ جانىنداعى تۇراقتى وكىلى رەتىندەگى ميسسياسىن اياقتاپ، قازىر سىرتقى ىستەر ءمينيسترىنىڭ ءبىرىنشى ورىنباسارى قىزمەتىن اتقارۋدا. ۇيىمنىڭ باس حاتشىسى راحمەتۋلليندى جاڭا تاعايىندالۋىمەن قۇتتىقتاپ، ونىڭ بىرلەسكەن جۇمىس پەن ورتاق ماقساتتارعا قول جەتكىزۋگە قوسقان ەلەۋلى ۇلەسىن اتاپ ءوتتى.

باسىلىمنىڭ جازۋىنشا، انتونيو گۋتەريش قازاقستان پرەزيدەنتى قاسىم- جومارت توقايەۆتىڭ ءتيىمدى سىرتقى ساياسات جۇرگىزۋدەگى رولىنە توقتالىپ، الەم ەلدەرىمەن ۇنەمى بايلانىستا بولعانىنا ريزاشىلىعىن جەتكىزگەن. ءوز كەزەگىندە اقان راحمەتۋللين دە ب ۇ ۇ باس حاتشىسىنا قازاقستانعا تۇراقتى قولداۋ كورسەتكەنى ءۇشىن العىس ايتقان.

اۆتور

ماديار تولەۋوۆ