الەمدەگى ەڭ قىمبات شىعارما

استانا. قازاقپارات - الەمدە 130 ميلليونعا جۋىق كىتاپ بار. بۇل بارلىق ادەبي، پۋبليتسيستيكالىق، عىلىمي شىعارمالاردى ەسەپتەپ شىققان Google-ءدىڭ دەرەگى. كىتاپ - قاشان دا قۇندى دۇنيە. ءتىپتى قازىردە ءتۇرلى ءباسساۋدالاردا ەجەلگى كىتاپتار ميللياردتاعان قاراجاتقا ساتىلىپ تا ءجۇر.

 پريسس پاپيرۋستارى - ب. ز. ب 3 350 ج.

الەمدەگى ەڭ ەجەلگى كىتاپ - پريسس پاپيرۋستارى. ب. ز. ب. 3350 -جىلى جازىلعان. بۇل قولجازبا، ونى 1839 -جىلى ەجەلگى مىسىر قالاسى فيۆادان تاپقان ەميل پريسستىڭ قۇرمەتىنە وسىلاي اتالعان. وندا - جاستاردىڭ تاربيەسى، مىنەز- قۇلىقتارى تۋرالى جازىلعان.

 ەترۋسكتاردىڭ التىن كىتابى - ب. ز. د 660 ج.

 ەڭ كونە ءارى كوپ بەتتىك تاعى ءبىر كىتاپ - ەترۋسكتاردىڭ التىن كىتابى. ب. ز. د. 660 -جىلى پايدا بولعان. ۇزىندىعى 5، ەنى 4,5 سانتيمەترلىك پلاستينالاردا ەترۋس تىلىندە جازىلعان ماتىندەر، سونداي-اق جىلقىنىڭ، سالت اتتىنىڭ، سيرەنانىڭ، ليرانىڭ جانە اسكەري ادامداردىڭ بەينەلەرى سۋرەتتەلگەن.

ناگ-حاممادي كودەكستەرى - 1945 -جىلى تابىلعان

 ناگ-حاممادي كودەكستەرى 1945 -جىلى مىسىردىڭ ناگ-حاممادي اۋىلىندا تابىلعان. ول 13 بىلعارى پاپيرۋستان تۇرادى. كوپت تىلىندە جازىلعان جانە گرەك تىلىندەگى ءتۇپنۇسقاسىنان كوشىرىلگەن. قازىردە اتالعان تۋىندى مىسىردىڭ كاير قالاسىنداعى كوپتس مۇراجايىندا ساقتاۋلى.

كۋتبەرت ەۆانگەليە - ەۋروپاداعى ەڭ ەسكى كىتاپ

كۋتبەرت ەۆانگەليە. ەۋروپاداعى ەڭ ەسكى كىتاپ. 2012 -جىلى بريتاندىق كىتاپحانا 9 ميلليون فۋنت ستەرلينگكە ساتىپ العان. بۇل تەڭگەمەن 6 ميللياردتاي.

كىتاپ ۇرلاۋ - قىلمىسپەن تەڭ

 ال الەمدەگى ەڭ ەجەلگى كىتاپحانا - اششۋربانيپال كىتاپحاناسى. بۇل جادىگەر ءبىزدىڭ زامانىمىزعا دەيىنگى VII عاسىردا ىرگەتاسى قالاعان. قازىرگى يراكتىڭ نينيەۆە قالاسىندا ورنالاسقان. بۇل كىتاپحانادا 30000 عا جۋىق ماتەريال ساقتالعان. ماڭىزدىسى، بۇل جەردە 4000 جىلدىق تاريحى بار «گيلگامەش داستانى» جانە بىرنەشە ادەبي شىعارمانىڭ ءتۇپنۇسقاسى ساقتالىپتى.

تاريحي دەرەكتەرگە قاراعاندا، كىتاپقۇمار اسسيريا بيلەۋشىسى اشۋربانيپال ۆاۆيلوننان جانە باسقا جاۋلاپ العان ايماقتاردان قۇندى شىعارمالاردى تالاۋ ارقىلى ءوزىنىڭ كىتاپحاناسىنىڭ كوپ بولىگىن جاساقتاعان. ولاردىڭ كوپشىلىگى قازىر لوندونداعى بريتان مۋزەيىندە ساقتاۋلى.

ءبىر قىزىعى، بيلەۋشى اشۋربانيپال كەزىندە كوپتەگەن كىتاپتى زورلىقپەن جيناپ العان كورىنەدى. ال عىلىمدا كىتاپ ۇرلاۋشىلاردى بيبليوكلەپتومان دەپ اتايدى. الەمدەگى ەڭ اتاقتى كىتاپ ۇرىسى - ستيۆەن بلۋمەرگ. ول 270 كىتاپحانادان 23 مىڭعا جۋىق تاڭداۋلى شىعارمالاردى ۇرلاعان. ونىڭ كىتاپحانا قورىنىڭ قۇنى 20 ميلليون دوللاردان اسادى.

 جالپى كىتاپ ۇرلاۋ - كوپ ەلدە قىلمىسپەن تەڭ. ا ق ش- تىڭ سولتۇستىك كارولينا شتاتىندا قوعامدىق كىتاپحانالاردان كىتاپ ۇرلاۋ نەمەسە ءبۇلدىرۋ اۋىر قىلمىس. ەگەر ۇرلانعان مۇلىكتىڭ قۇنى 26 مىڭ تەڭگەدەن از بولسا، ايىپتالۋشى 1-ساناتتاعى قۇقىق بۇزۋشى رەتىندە جازالانادى. ەگەر كىتاپ قۇنى اتالعان سومادان اساتىن بولسا، ايىپتى تۇرمەگە قامالادى. ۇلى بريتانيادا كىتاپ ۇرلاۋ نەمەسە كىتاپتاردى ءبۇلدىرۋ قىلمىس بولىپ سانالادى. مىسالى، 2009 -جىلى يراندىق عالىم فارحاد حاكيمزادە  XVI عاسىرداعى كىتاپتاردىڭ بەتتەرىن كەسىپ العانى ءۇشىن ەكى جىلعا باس بوستاندىعىنان ايىرىلدى.

 ەڭ اۋىر كىتاپ

 دۇنيەدەگى ەڭ اۋىر كىتاپ بريتانيا مۋزەيىندە ساقتالعان 17- عاسىرعا تيەسىلى گەوگرافيالىق اتلاس ەكەنىن بىلەسىز بە؟ ول كىتاپتىڭ ۇزىندىعى - 190 س م، ال سالماعى - 320 كەلى.

ەڭ قىمبات شىعارما

 الەمدەگى ەڭ قىمبات شىعارما لەوناردو دا ۆينچيدىڭ ءوز قولىمەن كوشىرىپ جازعان «لەيچەستەر كودەكسى» كىتابى. ونى «مايكروسوفتىڭ» نەگىزىن سالۋشى بيلل گەيتس 1994 -جىلى نيۋ-يوركتاعى «سوتبيس» اۋكسيونىندا 30,8 ميلليون دوللارعا ساتىپ العان.

 ەڭ كوپ قالاماقى

دۇنيەدەگى ەڭ كوپ قالاماقى ريم يمپەراتورى مارك اۆرەلي تاراپىنان وپپيان اتتى اقىنعا بەرىلگەن. ونىڭ بالىق اۋلاۋ مەن اڭشىلىق تۋرالى داستانىنىڭ ءاربىر جولى 1 التىنعا باعالانعان. ەكى داستانى 20 مىڭ بايىتتەن تۇرادى.

 ەڭ تانىمال كىتاپ

 كەيىپكەرى گيننەستىڭ رەكودتار كىتابىنا ەنگەن ەڭ تانىمال كىتاپ ءارى فيلم كەيىپكەرى - شەرلوك حولمس. اتاقتى ءىز كەسۋشى تۋرالى 4 رومان جانە 56 قىسقا اڭگىمە جازىلعان. ال كينو سالاسىندا شەرلوكتى 75-كە تارتا اكتەر سومداعان.

24.kz