الەمدەگى ەڭ قارت ماريا برانياس 117 جاسىندا قايتىس بولدى

استانا. KAZINFORM - الەمدەگى ەڭ قارت ادام اتانعان يسپانياداعى ماريا برانياس 117 جاسىندا قارتتار ۇيىندە قايتىس بولدى، دەپ جازادى Reuters.

- ماريا برانياس بۇل فانيمەن قوشتاستى. ول ءوزى قالاعانداي قايتىس بولدى: تىنىش ۇيقىدا، ەش اۋىرتپالىقسىز، - دەپ جازدى ونىڭ X الەۋمەتتىك جەلىسىندەگى اككاۋنتى.

دۇيسەنبى كۇنى ول ءوزىنىڭ قاتتى السىرەگەنىن، ءومىرىنىڭ سوڭى تاياپ كەلە جاتقانىن ايتقان.

ونىڭ X - تەگى اككاۋنتىن قىزى جۇرگىزەدى، دەپ جازادى Reuters.

ماريا برانياس گيننەستىڭ رەكوردتار كىتابىنا سايكەس 4 -ناۋرىزدا ءوزىنىڭ 117 جاسىن اتاپ ءوتتى جانە 2023 -جىلدىڭ قاڭتارىندا الەمدەگى ەڭ قارت ادام اتاندى.

ول 1907 -جىلى سان-فرانسيسكودا (كاليفورنيا) دۇنيەگە كەلدى، سودان كەيىن جەتى جاسىندا وتباسىمەن يسپانياعا كوشىپ كەلدى.

ول ءومىرىنىڭ قالعان بولىگىن سول جەردە وتكىزدى، 1936-39 -جىلدارداعى ازاماتتىق سوعىستان جانە ءبىر عاسىرمەن بولىنگەن ەكى پاندەميادان - 1918 -جىلعى يسپان تۇماۋى مەن 2020-2021 -جىلدارداعى COVID-19-دان امان قالدى.

برانياس عالىمدارعا ونىڭ ەرەكشە ۇزاق ءومىر ءسۇرۋىن زەرتتەۋگە رۇقسات بەردى. ول ۇزاق ءومىر ءسۇرۋدىڭ سىرىنا ءارقاشان ساتتىلىكتە، ءتارتىپ پەن تىنىشتىققا، وتباسىمەن جانە دوستارىمەن جاقسى قارىم-قاتىناسقا، تابيعاتپەن بايلانىسقا، ەموتسيونالدى تۇراقتىلىققا، ۋايىم مەن وكىنىشتىڭ بولماۋىنا، كوپ پوزيتيۆتىلىككە جانە ۋلى زاتتاردان اۋلاق بولۋدى جاتقىزدى.

117 جاسقا تولعاننان كەيىن برانياس تاريحتاعى جاسى رەسمي تۇردە راستالعان 12- ەڭ قارت ادام بولدى.

ال ەڭ قارت ادام 122 جىل 164 كۇن ءومىر سۇرگەن فرانسۋز ايەلى جاننا كالمان بولدى.

اۆتور

ەركەجان سماعۇلوۆا