الەمدەگى مەگاپوليستەردە كەپتەلىس: دجاكارتا، بانگكوك پەن مەحيكو جاعدايى

استانا. قازاقپارات - الەمدەگى ءىرى قالالاردا كولىك كەپتەلىسى ۇيرەنشىكتى جاعدايعا اينالعان. اسىرەسە، دجاكارتا، بانگكوك پەن مەحيكو قالالارى جول قوزعالىسىنىڭ تىعىزدىعى بويىنشا ۇنەمى جاھاندىق رەيتينگتەردىڭ كوشىن باستاپ تۇرادى.

 ماسەلەنى شەشۋ ءۇشىن ءار قالادا مەترو جەلىلەرىن كەڭەيتۋ جانە اقىلى جولداردى ەنگىزۋ سياقتى شارالار قاراستىرىلۋدا. يندونەزيا استاناسى بۇگىندە ەڭ كوپ كەپتەلىس بولاتىن قالالاردىڭ قاتارىندا. حالىقارالىق زەرتتەۋلەرگە سايكەس، جەرگىلىكتى جۇرگىزۋشىلەر جىل سايىن ورتا ەسەپپەن 108 ساعاتقا دەيىن ۋاقىتىن جولدا جوعالتادى. كەپتەلىستىڭ نەگىزگى سەبەپتەرى - حالىق سانىنىڭ ارتۋى، جول ينفراقۇرىلىمىنىڭ جەتكىلىكسىزدىگى جانە قوعامدىق كولىكتىڭ تيىمسىزدىگى. وسى ماسەلەلەردى شەشۋ ماقساتىندا بيلىك تاراپىنان مەترو جەلىلەرىن كەڭەيتۋ جانە جۇكتەمەسى جوعارى اۋماقتاردا اقىلى جول جۇيەسىن ەنگىزۋ شارالارى قاراستىرىلۋدا. الايدا قازىرگى ۋاقىتتا قالا تۇرعىندارى ءۇشىن ۇزاق ۋاقىتتىق كەپتەلىس ءالى دە قالىپتى جاعداي بولىپ تۇر.

 وڭتۇستىك- شىعىس ازياداعى تاعى ءبىر ءىرى مەگاپوليس - بانگكوك تا كولىك تىعىنى بويىنشا الەمدەگى جەتەكشى قالالاردىڭ ءبىرى. مۇندا كولىك قوزعالىسى تاڭعى ساعاتتاردان باستالىپ، كەشكە دەيىن ۇزدىكسىز جالعاسادى. بىرنەشە شاقىرىمدىق جولدى ءجۇرىپ وتۋگە كەي كەزدەرى ءبىر ساعاتتان استام ۋاقىت كەتەدى. كەپتەلىستىڭ تۋىنداۋىنا حالىق تىعىزدىعى، كولىك سانىنىڭ ءوسۋى جانە قوعامدىق كولىك جۇيەسىنىڭ جەتكىلىكسىز دامۋى اسەر ەتۋدە. قالالىق اكىمدىك كولىك جۇكتەمەسىن ازايتۋ ءۇشىن مەترو جەلىلەرىن كەڭەيتىپ، تەمىرجول باعىتتارىن جەتىلدىرۋ جۇمىستارىن جۇرگىزۋدە. دەگەنمەن، جول قوزعالىسىنداعى كۇردەلى جاعداي تۇرعىندار ءۇشىن كۇندەلىكتى قالىپتى كورىنىسكە اينالعان.

مەكسيكا استاناسى مەحيكو قالاسى دا بىرنەشە رەت «الەمدەگى كولىك قوزعالىسى ەڭ تىعىز قالا» رەتىندە تانىلعان. تاڭعى جانە كەشكى قاربالاس ساتتەردە ۇزىن-سونار كەپتەلىستەر ءجيى بايقالادى. ساراپشىلاردىڭ مالىمەتىنشە، مۇنداي كەزدەردە جول ءجۇرۋ ۇزاقتىعى ەكى ەسەگە دەيىن ارتۋى مۇمكىن. قالا تۇرعىندارى اي سايىن كولىكتە ونداعان ساعات ۋاقىتىن جوعالتىپ، جۇمىسقا بارىپ-قايتۋدا ايتارلىقتاي قيىندىقتارعا تاپ بولۋدا. بۇل جاعداي حالىق سانىنىڭ ارتۋى، كوشەلەردىڭ تارلىعى جانە كەيبىر اۋدانداردا قوعامدىق كولىك جەلىلەرىنىڭ جەتىسپەۋشىلىگىمەن بايلانىستى. جەرگىلىكتى بيلىك ينفراقۇرىلىمدى جەتىلدىرۋ ماقساتىندا جاڭا مەترو باعىتتارىن سالۋ جانە اۆتوبۋس جەلىلەرىن ارتتىرۋ بويىنشا جۇمىستار جۇرگىزۋدە. الايدا قازىرگى كەزدە ماسەلە تولىق شەشىمىن تاپقان جوق.

 24.kz