الەمدەگى ەڭ كوپ ساتىلىمداعى كىتاپتار
استانا. قازاقپارات - كىتاپ تۋرالى كوپشىلىك بىلە بەرمەيتىن قىزىقتار كوپ. ەڭ العاشقى كىتاپتار قالاي جاسالدى؟ بۇگىندە ەڭ ۇلكەن كىتاپحانا قاي ەلدە ورنالاسقان؟ وقىرماندار ىزدەپ ءجۇرىپ وقيتىن شىعارمالار قانداي؟
ەڭ العاشقى كىتاپ ەجەلگى ەگيپەتتە شامامەن ءتورت جارىم مىڭ جىل بۇرىن پايدا بولدى. ونى ءنىلدىڭ باتپاقتى جاعالاۋلارىندا وسەتىن قامىس پاپيرۋسىنان جاساعان. ارنايى ادىسپەن وڭدەلگەن سوڭ وسىمدىك تالشىقتارى جۇقا جازبا پاراقتارىنا اينالعان. ال جازۋ كەزىندە قامىس تاياقشاسى قولدانىلعان. وسىلايشا، VII عاسىردان باستاپ قامىسقا كىتاپ جازۋ ءىسى گرەكيا مەن ريمدە كەڭ ءورىس الىپ، كىتاپتى كوشىرىپ جازۋعا ماشىقتانعان ادامدار مەن قولجازبانى كوركەمدەۋشى سۋرەتشىلەر پايدا بولدى.
الەمدەگى ەڭ كوپ ساتىلىمداعى كىتاپتار
تاريحتاعى ەڭ تانىمال كىتاپ - «كيەلى كىتاپ» سانالعان. ول العاش رەت XV عاسىردىڭ ورتاسىندا جارىق كورىپ، ءالى كۇنگە دەيىن وقىرمان قولىنان تۇسپەي كەلەدى. بۇگىنگە دەيىن ول الەمنىڭ 2000 تىلىنە ءتارجىمالانىپ، 5 ميللياردتان استام داناسى ساتىلعان. رەيتينگتىڭ ەكىنشى ساتىسىندا تانىمال جازۋشى اگاتا كريستيدىڭ شىعارمالى تۇر. ونىڭ تانىمال دەتەكتيۆتى تۋىندىسىن 2 ميللياردتان استام ادام وقىپتى.
الەمدەگى ەڭ ۇلكەن كىتاپ
ەڭ ۇلكەن كىتاپ 2012 -جىلى دۋبايدا جارىق كوردى. ونىڭ سالماعى ءبىر جارىم مىڭ كەلى. ەنى 5-تەن 8 مەترگە دەيىن. ءدىني مازمۇنداعى ەڭبەكتى جاساۋعا 50 شاقتى ادام قاتىسقان. وقىرماندارعا ساتىپ الۋعا تيىم سالىنعان. جيناق ساۋدا ورتالىقتارىنىڭ بىرىندە قويىلعان. سول جەردەن الىپ ۇستاپ كورۋگە، قىزىقتاۋعا رۇقسات بەرىلگەن.
الەمدەگى ەڭ ۇلكەن كىتاپحانا
ۆاشينگتوندا كونگرەسس كىتاپحاناسى - جەر جاھانداعى ەڭ ۇلكەن كىتاپحانا. ا ق ش كونگرەسىنىڭ عىلىمي كىتاپحاناسى ۆاشينگتوندا ورنالاسقان. مۇندا جالپى كىتاپ قورى 470 تىلدەگى 38 ميلليوننان استام ەڭبەك بار. ونى كەز كەلگەن قاراپايىم تۇرعىن الىپ وقي المايدى. 1899-1939 -جىلدارى ارالىعىندا كىتاپحانانى گەربەرت پاتنەم باسقاردى. ول كىتاپتاردى سۇرىپتاۋدىڭ ىڭعايلى جۇيەسىن ەنگىزدى.
الەمدەگى ەڭ العاشقى كىتاپحانا
پەرگام كىتاپحاناسى ب. ز. ب. III عاسىردا سالىنعان. قازىرگى تۇركيانىڭ اۋماعىندا ورنالاسقان تانىمدىق نىسان ءبىر كەزدەرى 200000 شيىرشىقتان تۇراتىن قازىنا قورىنا يە بولعان. جازبا دەرەكتەردە بۇل تاريحي ورىن گرەكتەردىڭ دانالىق قۇدايى افيناعا ارنالعان عيباداتحانا كەشەنىندە ورنالاسقان دەلىنەدى. 4 بولمەگە بولىنگەن اۋماقتىڭ ۇشەۋى كىتاپحانانىڭ قاجەتى ءۇشىن، ال بىرەۋى جيىن- باسقوسۋلار ءۇشىن كەزدەسۋ ورنى سانالعان. پەرگام كىتاپحاناسى ءوز داۋىرىندە جۇرت اراسىندا اسا تانىمال بولعان.
24.kz
