الەمدەگى جۇمىس ورىندارىنىڭ شامامەن 25 پايىزى جاساندى ينتەللەكتتىڭ ىقپالىنا ۇشىراۋى مۇمكىن

استانا. KAZINFORM - حالىقارالىق ەڭبەك ۇيىمى (ح ە ۇ) مەن پولشانىڭ ۇلتتىق زەرتتەۋ ينستيتۋتىنىڭ (NASK) جاڭا بىرلەسكەن زەرتتەۋىنە سايكەس، جاساندى ينتەللەكتىنى قولدانۋدىڭ ەڭ ىقتيمال ناتيجەسى - ادامدى تولىقتاي كومپيۋتەرمەن الماستىرۋ ەمەس، جۇمىس سيپاتىنىڭ وزگەرۋى بولادى، دەپ حابارلايدى ب ۇ ۇ جاڭالىقتارى.

- ءبىز تەوريا شەڭبەرىنەن شىعىپ، ناقتى جۇمىس ورىندارى تۋرالى دەرەكتەرگە نەگىزدەلگەن قۇرال جاسادىق. ادام تاجىريبەسىن، ساراپتامالىق تالداۋدى جانە گەنەراتيۆتى جاساندى ينتەللەكت مودەلدەرىن بىرىكتىرە وتىرىپ، ءبىز ەلدەرگە تاۋەكەلدەردى باعالاپ، بولىپ جاتقان وزگەرىستەرگە ءتيىمدى ارەكەت ەتۋگە كومەكتەسەتىن ءادىستى جاسادىق، - دەدى حالىقارالىق ەڭبەك ۇيىمىنىڭ اعا عىلىمي قىزمەتكەرى جانە زەرتتەۋدىڭ جەتەكشى اۆتورى پاۆەل گمىرەك.

ەسەپكە سايكەس، ماماندىقتاردى گەنەراتيۆتى جاساندى ينتەللەكتىنىڭ ىقپال ەتۋ دەڭگەيىنە قاراي توپتاستىرۋعا بولادى.

جاساندى ينتەللەكت ەڭبەك نارىعىندا ايەلدەر مەن ەرلەرگە ءارتۇرلى اسەر ەتۋى مۇمكىن

الەمدەگى جۇمىس ورىندارىنىڭ شامامەن 25 پايىزى جي ىقپالىنا ۇشىراۋى مۇمكىن، ال دامىعان ەلدەردە بۇل كورسەتكىش 34 پايىزعا جەتەدى. سونىمەن قاتار، ايەلدەردىڭ جۇمىسىنا ج ي اسەر ەتۋ ىقتيمالدىعى الدەقايدا جوعارى.

ەسەپتە ايتىلعانداي، دامىعان ەلدەردە اۆتوماتتاندىرۋ قاۋپى ەڭ جوعارى جۇمىس ورىندارى ايەلدەردىڭ جۇمىسپەن قامتىلۋىنىڭ 9,6 پايىزىن قۇرايدى، ال ەرلەر اراسىندا بۇل كورسەتكىش نەبارى 3,5 پايىز.

قاي ماماندىقتارعا ەڭ كوپ قاۋىپ تونەدى

ەسەپكە سايكەس، كەڭسە جۇمىستارى جاساندى ينتەللەكتىنىڭ ەڭ كوپ ىقپالىنا ۇشىرايدى، ويتكەنى گەنەراتيۆتى ج ي كوپتەگەن تاپسىرمانى اۆتوماتتاندىرا الادى. دەگەنمەن، ج ي-دىڭ كەڭەيىپ كەلە جاتقان مۇمكىندىكتەرى ب ا ق، باعدارلامالىق قامتاماسىز ەتۋ جانە قارجى سالاسىنداعى ءبىرقاتار تانىمدىق ماماندىقتارعا دا اسەر ەتەدى.

سونىمەن قاتار، ساراپشىلار كوپتەگەن تاپسىرماعا ءالى دە ادام قاتىسۋى قاجەت ەكەنىن ايتىپ، تولىعىمەن اۆتوماتتاندىرىلاتىن ماماندىقتار سانى شەكتەۋلى ەكەنىن اتاپ ءوتتى.

ينكليۋزيۆتى ستراتەگيالار قۇرۋعا شاقىرۋ

ساراپشىلار ۇكىمەتتەردى، كاسىپوداقتاردى جانە باسقا ۇيىمداردى الەۋمەتتىك ديالوگقا قاتىسۋعا جانە ونىمدىلىكتى ارتتىراتىن، جۇمىس ساپاسىن جاقسارتاتىن ءارى جۇمىس ورىندارىن ساقتاپ قالۋعا مۇمكىندىك بەرەتىن ينكليۋزيۆتى ستراتەگيالار ازىرلەۋگە شاقىرادى.

- جاساندى ينتەللەكت توڭىرەگىندەگى ۋ-شۋدىڭ اراسىندا اداسىپ كەتۋ وڭاي. بىزگە ناقتىلىق پەن كونتەكست قاجەت، - دەدى حالىقارالىق ەڭبەك ۇيىمىنىڭ اعا ەكونوميسى جانين بەرگ.

ول ۇيىم ەلدەرگە ەڭبەك نارىعىن ادىلەتتى سيفرلىق بولاشاققا دايىنداۋعا قولداۋ كورسەتەتىنىن اتاپ ءوتتى.

ايتا كەتەلىك ساربازداردىڭ پسيحيكالىق جاعدايىن جاساندى ينتەللەكتىنىڭ كومەگىمەن انىقتايتىنىن جازعان ەدىك.