الەمدەگى ەڭ ءبيشى حالىق

استانا. قازاقپارات - ءار ەلدىڭ ءبي ونەرى ءوزىنىڭ ەرەكشە تاريحى مەن مادەنيەتىنىڭ اجىراماس بولىگى. الەم ەلدەرىندە بي مەن قوزعالىس ونەرى بەلگىلى ءبىر داستۇرلەرمەن، ادەت-عۇرىپتارمەن جانە قۇندىلىقتارمەن بايلانىستى. سالسا، سامبا، چا-چا-چا تىزە بەرسەك ءبيدىڭ ءتۇرى كوپ... 

جالپى، ءبىر عانا ءبي ارقىلى سول ۇلتتىڭ بولمىسىن تانۋعا بولادى. نەعۇرلىم كەدەي ەل بولعان سايىن، توي تويلاعىش كەلەتىن ۇندىلەر - الەمدەگى ناعىز ءبيشى حالىق. ءۇندى فيلمىنىڭ تەڭ جارتىسىندا كەيىپكەرلەردىڭ بيلەيتىنىن بايقايمىز. ويتكەنى ۇندىلەر تەك سوزبەن ەمەس، ءبي ارقىلى تىلدەسەدى. ءار قيمىلى ءبىر ءسوز. ماسەلەن، ولار بيلەگەندە، اۋەلى ەكى الاقىنىن بىرىكتىرىپ امانداسادى. بۇل «ناماستە» ياعني، «سالەم» دەگەن ءسوز. ءۇندى ءبيىنىڭ تاعى ءبىر ەرەكشەلىگى جۇرت جالاڭاياق بيلەيدى. بۇل ەجەلدە ۇندىستەردىڭ جالاڭاياق جۇرۋىمەن بايلانىستى. ەڭ تانىمال ءبي كاتحاك - ءۇندىستاننىڭ كلاسسيكالىق ءبيى، 5-عاسىردان بەرى دامىپ كەلەدى. بۇل - كوبىنە اڭگىمە ايتىپ، درامالىق كورىنىستەردى بەينەلەيتىن ءبي.

سونداي-اق گيننەسستىڭ رەكوردتار كىتابىنا ەنگەن ەڭ ۇزاق ءبيدى بيلەگەن دە ءۇندى ازاماتى. 123 ساعات، 15 مينۋت شىر اينالىپ بيلەگەن ءبيشىنىڭ رەكوردىن 2011 -جىلدان بەرى ءالى ەشكىم جاڭارتقان جوق.

ءبي - قارىم-قاتىناس قۇرالى

ءبي ونەرى اۋەلدە ونەر نەمەسە كوڭىل كوتەرۋدىڭ نەگىزى بولعان جوق. بۇل ادامدارمەن قارىم-قاتىناس قۇرالى، ءوزىن-ءوزى تانىستىرۋ، ءتىپتى كوتەرىلىس سيپاتى بولعان. ەجەلدە ادامدار ومىرىندەگى ماڭىزدى جايتتاردى ءبي ءراسىمى ارقىلى كورسەتكەن. جانۋارلاردىڭ قيمىلىن كوشىرۋ ارقىلى بيلەپ، ءبي سيۋجەتى قۇدايعا تابىنۋدان باستالىپ، اڭشىلىق نە سوعىس الدىندا رۋحتى كوتەرۋ ماقساتىندا قۇرىلعان. سونداي-اق لاتىن امەريكاسىندا، ءبي حالىقتىڭ نارازىلىعىن ءبىلدىرۋ قۇرالى رەتىندە پايدالانىلدى. مىسالى كۋباداعى سون نەمەسە سالسا بيلەرى، ادامداردىڭ ساياسي جانە الەۋمەتتىك تاۋەلدىلىكتەن قۇتىلۋ ماقساتىندا ورىندالدى. سونىمەن قاتار الەۋمەتتىك ادىلەتسىزدىككە قارسى قارسىلىق ءبىلدىرۋ ماقساتىندا ورىندالعان بيلەردىڭ ءبىرى - گايتي ءبيى، ول قۇلدىققا قارسى كوتەرىلىستىڭ ءبىر بولىگى رەتىندە تانىمال. ال تايپالاردا ءبي باسقارۋ قۇرالى رەتىندە پايدالانىلدى. وعان باقسىلار مەن افريكالىق بيلەردى الۋعا بولادى.

كاسىبي بيشىلەر زەينەتكە ەرتە شىعادى

بيمەن حوببي رەتىندە اينالىسۋ، ايتارلىقتاي قاۋىپتى بولماۋى مۇمكىن. ءبىراق كاسىبي ماماندار ءجيى جاراقات الادى. ونىڭ ۇستىنە اعزاعا ۇلكەن كۇش تۇسەتىندىكتەن ولار 35-36 جاستا «زەينەتكە» شىعادى. سونداي-اق ءبي - تەك مادەني نەمەسە ونەر ءتۇرى ەمەس، بۇل ادامنىڭ ميى، دەنەسى جانە ەموتسيالارى اراسىندا تەرەڭ بايلانىس ورناتاتىن عىلىمدىق تۇرعىدان ماڭىزدى ءىس-ارەكەت. ءبي - مي مەن دەنە اراسىنداعى كۇردەلى ۇيلەسىم. نەيروبيولوگيا بويىنشا، ءبي ادامنىڭ ميىندا موتورلى cortex، قوزعالىس ورتالىقتارى، جۇيكە تالشىقتارى مەن جۇلىن اراسىنداعى بايلانىستى جاقسارتادى. بۇل فيزيكالىق جاتتىعۋلار ادامدى دەنە مەن ويدى ۇيلەستىرۋگە، قوزعالىستاردى قاداعالاۋعا ۇيرەتەدى. National Library Of Medicine:

- ءبي كۇيزەلىستى ازايتۋعا قابىلەتتى، سەبەبى ول ەندورفين گارمونىنىڭ جۇمىسىن جاقسارتادى. بيدە كەزدەسەتىن ىرعاقتى قوزعالىستار، ورگانيزمنىڭ سترەسسكە جاۋاپ بەرۋ جۇيەسىن رەتتەۋگە كومەكتەسەدى.

 24.kz