الەمدە اليۋميني تاپشىلىعى باستالدى
استانا. قازاقپارات - ءبىر كەزدەرى اياققا وراتىلىپ، كورىنگەن جەردە جاتاتىن الليۋميني قازىر قات. قاجەت بولسا اقشاڭدى شىتىرلاتىپ ساناپ بەرەسىڭ. ءتىپتى بۇل ەلەمەنت جىل سايىن قىمباتتاپ بارادى. ويتكەنى سۇرانىس كوپ.
ءىرى وندىرۋشىلەر بولسا جەر انانىڭ قوينىنان الاتىنىن الىپ، سارقىپ تاۋىسقان. ونىڭ ۇستىنە ەكولوگيالىق تالاپتار قاتايدى. ەندى الەمدە وسى اليۋميني نارىعى قالاي قۇبىلۋى مۇمكىن؟ الەمدىك نارىقتا اليۋميني كوپ جىلدار بويى مولىنان ءوندىرىلىپ كەلدى. الايدا بۇگىندە جاعداي تۇبەگەيلى وزگەردى. ساراپشىلار امبەباپ ءارى ستراتەگيالىق ماڭىزى زور اليۋميني كەيىنگى جيىرما جىلداعى ەڭ ءىرى تاپشىلىققا جاقىنداعانىن ايتادى. بۇل ەڭ الدىمەن مەتالعا دەگەن سۇرانىستىڭ كۇرت وسۋىنەن تۋىنداپ وتىر.
مارك سمايت، اۆتوموبيل جۋرناليسى:
- كەيىنگى جىلدارى اليۋميني اۆتوموبيل وندىرىسىندە كەڭىنەن پايدالانىلا باستادى. بۇل العاش رەت 1970 -جىلدارى قولدانىلعان مەتال. الايدا ۋاقىت وتە كەلە، اسىرەسە تومەن شىعارىندىلارى بار ايماقتاردىڭ پايدا بولۋىمەن جانە ەلەكتر كولىكتەردىڭ دامۋىنا بايلانىستى، جەڭىل ءارى بەرىك ماتەريالدارعا سۇرانىس ارتتى. سول سەبەپتى اليۋمينيدىڭ ماڭىزى كۇرت ءوستى. ول بولاتتان الدەقايدا جەڭىل. كەي جاعدايدا ءتىپتى شىدامدى. قازىرگى تاڭدا اليۋميني كولىكتىڭ كوپتەگەن بولشەكتەرىندە قولدانىلادى. مىسالى، دوڭگەلەكتەردىڭ شامامەن 20 پايىزى وسى مەتالدان جاسالادى. سونداي-اق ول قوزعالتقىشتاردا جانە كۋزوۆ پانەلدەرىندە قولدانىلادى. سوندىقتان اليۋميني بۇگىندە اۆتوموبيل يندۋسترياسىنىڭ ماڭىزدى بولىگىنە اينالدى.
بۇگىندە قىتاي اليۋميني وندىرىسىندە جەتەكشى ورىنعا يە. الەمدىك نارىقتاعى ۇلەسى شامامەن 60 پايىز. الايدا ەلدىڭ وندىرىستىك قۋاتى 98 پايىزعا جەتىپ، ءارى قارايعى وسىمگە مۇمكىندىك ازايدى. ونىڭ ۇستىنە بەيجىڭ جىلدىق ليميتتى 45 ميلليون توننا دەڭگەيىندە ۇستاپ وتىر. مامانداردىڭ ايتۋى بويىنشا، بۇنىڭ سالدارىنان 2025 -جىلدىڭ سوڭىنا قاراي قىتايدىڭ الەمدىك جەتكىزىلىمدەرى 8 پايىزعا دەيىن قىسقارۋى ىقتيمال.
دەگەنمەن ساراپشىلار باستى ءۇمىتتى يندونەزياعا ارتىپ وتىر. بۇل ەلدە قىتايلىق ينۆەستيتسيا ەسەبىنەن جاڭا ءوندىرىس ورىندارى سالىنىپ جاتىر. بولجام بويىنشا، الداعى 5 جىلدا بۇل جوبالار ەلدەگى اليۋميني ءوندىرىسىن تاعى 7 ميلليون تونناعا كوبەيتەدى.
ماكس لەيتون، Citigroup كومپانياسىنىڭ شيكىزات نارىعىن زەرتتەۋ ءبولىمىنىڭ باسشىسى:
- قىتاي جيىرما جىل بويى اليۋميني ءوندىرىسىن كوبەيتىپ، وسى نارىقتاعى باعاعا ىقپال ەتىپ كەلدى. ەندى ول شەگىنە جەتتى. دەگەنمەن، بۇل مەتال ءتۇرلى-ءتۇرلى سالالاردا تاپتىرماس شيكىزات سانالادى. ونىڭ ماڭىزدىلىعى سونشالىقتى، ءتىپتى ءبىر عانا ادام بەينەسىندەگى روبوتتى قۇراستىرۋ ءۇشىن 25 كەلى اليۋميني جۇمسالادى.
ساراپشىلاردىڭ ايتۋىنشا، اليۋميني تاپشىلىعى الداعى جىلدارى الەمدىك نارىقتاعى نەگىزگى سىن-قاتەرلەردىڭ بىرىنە اينالماق. قولدانىسى كۇننەن كۇنگە كەڭەيىپ كەلە جاتقان بۇل مەتالعا سۇرانىس وسسە دە ءوندىرىس كولەمى باياۋلاپ وتىر. ەلەكتروموبيلدەر، كۇن پانەلدەرى مەن جەڭىل قۇرىلىس ماتەريالدارى ونسىز مۇمكىن ەمەس. بۇگىندە اليۋمينيدىڭ تونناسى 2700 دوللار شاماسىندا باعالانسا، كەلەر جىلعا قاراي ونىڭ قۇنى 3 مىڭ دوللارعا جەتۋى مۇمكىن.
ينتەرنەشنل اليۋمينيۋم ينستيتيۋت دەرەكتەرىنە سايكەس، الەمدە اق مەتالعا دەگەن جاھاندىق سۇرانىستىڭ %75- ى 5 سالاعا تيەسىلى. اسىرەسە اۆتوكولىك، ۇشاق قوزعالتقىش بولشەكتەرى جانە تەمىرجول ۆاگوندارىنىڭ جابدىقتارىندا كەڭىنەن قولدانىلادى. ونىڭ جەڭىل سالماعى وتىن شىعىنىن ازايتىپ، ەكولوگيالىق تيىمدىلىكتى ارتتىرادى. اليۋمينيدەن جاسالعان ەسىكتەر مەن شاتىر جابىندارى كۇن-رايىنا ءتوزىمدى جانە ۇزاق مەرزىمگە جارامدى. تاماق وندىرىسىندە دە اق مەتالدى كەڭىنەن پايدالانادى. ويتكەنى ءونىمدى ۇزاق ساقتاۋعا مۇمكىندىك بەرەدى. اليۋمينيدىڭ ەلەكتر وتكىزگىشتىگى جوعارى بولعاندىقتان، ەلەكتر سىمدارى، ترانسفورماتورلار، سالقىنداتقىش رادياتورلار جاساۋدا قولدانىلادى.
سونداي-اق عارىش اپپاراتتارى، زىمىراندار مەن اسكەري تەحنيكالاردا كەڭىنەن پايدالانىلادى. سەبەبى اليۋميني جەڭىل ءارى مىقتى مەتال سانالادى.
اليۋميني كوپ قولدانىلاتىن سالالار
1. كولىك جانە تاسىمالداۋ - %27
2. قۇرىلىس جانە ساۋلەت - %25
3. قاپتاما ونەركاسىبى - %15
4. ەلەكتر جانە ەلەكترونيكا - %12
5. اسكەري، عارىش جانە قورعانىس -%6
6. باسقا سالالار - %15
24.kz
