الەمدە 262 ميلليون ادام دەمىكپە اۋرۋىنا شالدىققان

الماتى. KAZINFORM - دەمىكپە - دۇنيەجۇزىندە ەڭ كەڭ تارالعان اۋرۋلاردىڭ ءبىرى. برونح دەمىكپەسى تىنىس الۋ جولدارىنىڭ اۋرۋلارىنا اكەلەدى. الايدا دەمىكپەنىڭ سەبەبى اللەرگيا مەن ناشار ەكولوگيا. بۇل تۋرالى اللەرگولوگ، يممۋنولوگ اراي باتىربايەۆا ايتتى.

11-جەلتوقسان كۇنى دۇنيەجۇزىلىك دەمىكپەمەن كۇرەسۋ كۇنى اتاپ وتىلەدى. بۇل كۇننىڭ باستى مىندەتى - اۋرۋ جانە ونى باقىلاۋ ادىستەرى تۋرالى حالىققا جان-جاقتى تانىستىرۋ. ناۋقاستاردى ءدارى-دارمەك پەن ينگالياتورلاردى دۇرىس قولدانۋعا ۇيرەتۋ، اۋرۋدىڭ الدىن الۋدىڭ ماڭىزدىلىعىنا، تريگگەرلەرمەن كۇرەسۋگە جانە اۋا ساپاسىن جاقسارتۋعا باسا نازار اۋدارۋ.

دەمىكپەنىڭ سەبەپتەرى:

- گەنەتيكالىق بەيىمدىلىك؛
- اللەرگيالىق رەاكسيالار؛
- لاستانعان اۋا مەن توكسيندەردىڭ اسەرى؛
- ۆيرۋستىق ينفەكسيالار؛
- سترەسس جانە فيزيكالىق بەلسەندىلىك.

- دۇنيەجۇزىلىك دەناسۋلىق ساقتاۋ ۇيىمىنىڭ مالىمەتتەرى بويىنشا، الەمدە 262 ميلليوننان استام ادام دەمىكپەمەن ءومىر سۇرەدى جانە جىل سايىن وسى اۋرۋدان 455 مىڭعا جۋىق ادام قايتىس بولادى. ستاتيستيكا ايماققا، ەكونوميكالىق دامۋ دەڭگەيىنە جانە قورشاعان ورتا جاعدايىنا بايلانىستى وزگەرەدى. دەمىكپەگە بالالار دا شالدىعادى. بۇل ەكولوگياسى ناشار نەمەسە اللەرگەندەردىڭ اسەرىنە ۇشىراعان ادامداردا ءجيى كەزدەسەدى، - دەيدى كارديولوگيا جانە ىشكى اۋرۋلار عزي رەسپۋبليكالىق اللەرگولوگيا ورتالىعىنىڭ باسشىسى اراي باتىربايەۆا.

دارىگەردىڭ ايتۋىنشا، دەمىكپەنى ەمدەۋ تىنىس الۋ جولدارىنىڭ قابىنۋىن ازايتۋعا جانە ءورشۋدىڭ الدىن الۋعا باعىتتالعان.

نەگىزگى تاسىلدەر:

- ينگالياتسيالىق گليۋكوكورتيكوستەرويدتاردى قولدانۋ؛
- سيمپتومداردى تەز جەڭىلدەتۋ ءۇشىن برونحوليتيكتەردى قولدانۋ؛
- اللەرگەندەر مەن تريگگەرلەردەن اۋلاق بولۋ؛
- پيكفلوۋمەترلەردىڭ كومەگىمەن جاعدايدى ۇنەمى باقىلاۋدا ۇستاۋ.

- برونح دەمىكپەسى - تىنىس الۋ جولدارىنىڭ سوزىلمالى قابىنۋ اۋرۋى. نەگىزگى بەلگىلەرى: ەنتىگۋ، جوتەل، كەۋدە قۋىسىنىڭ قىسىلۋ سەزىمى، سىرىل نەمەسە ىسقىرىق ءتۇسۋ، - دەيدى دارىگەر.

سپيكەردىڭ سوزىنشە، دۇرىس ەمدەۋ جۇرگىزىلسە، دەمىكپەمەن اۋىراتىنداردىڭ كوبى ونى باقىلاپ وتىرۋعا، سيمپتومدارىنان ارىلۋعا، ۇستامالاردىڭ سيرەك بولۋىنا نەمەسە ءتىپتى مۇلدەم بولماۋىنا، ارنايى ءدارى-دارمەكتەردى سيرەك پايدالانۋعا قول جەتكىزە الادى.