الماتىنىڭ بوتانيكالىق باعىندا اققۋدىڭ موينىنان تارتقان ادام ىزدەستىرىلىپ جاتىر

الماتى. KAZINFORM - الماتىنىڭ بوتانيكالىق باعىندا ەر ادام اققۋعا قاتىگەزدىك كورسەتكەن.

وقيعانىڭ بەينەجازباسى الەۋمەتتىك جەلىدە تارادى.

الماتى قالاسىنىڭ پوليتسيا دەپارتامەنتى ەر ادامنىڭ ءىس-ارەكەتىنە قۇقىقتىق باعا بەرىلەتىنىن حابارلادى.

- الماتى قالاسىنىڭ بوتانيكالىق باعىندا قۇسقا قاتىگەزدىك جاساۋ فاكتىسى بويىنشا تەكسەرۋ باستالدى. ونىڭ ءىس- ارەكەتىنە قۇقىقتىق باعالاۋ بەرىلەدى جانە قازاقستان رەسپۋبليكاسىنىڭ زاڭناماسىنا سايكەس شارالار قابىلدانادى. باسقا دا ءمان-جايلارى انىقتالىپ جاتىر، - دەپ حابارلادى دەپارتامەنتتەن.

ەسكە سالايىق، 2022 -جىلى 2 -ناۋرىزدان باستاپ «جانۋارلارعا جاۋاپكەرشىلىكپەن قاراۋ تۋرالى» زاڭ كۇشىنە ەندى. زاڭ جانۋارلاردى قورعاۋ، قاۋىپسىزدىكتى قامتاماسىز ەتۋ، ىزگىلىكتى نىعايتۋ جانە جانۋارلاردى اسىراۋ كەزىندە قوعامنىڭ ادامگەرشىلىك قاعيداتتارىن ساقتاۋ ماقساتىندا قابىلداندى.

اۆتور

دوسبول اتاجان