الماتىلىقتار كەڭسەدە ەڭ ۇزاق ۋاقىت وتىرىپ جۇمىس ىستەيدى - زەرتتەۋ

قازاقستان بويىنشا الماتىلىقتار كەڭسەدە ەڭ ۇزاق ۋاقىت وتىرىپ جۇمىس ىستەيدى. بۇل تۋرالى س. اسفەندياروۆ اتىنداعى قازاق ۇلتتىق مەديتسينالىق ۋنيۆەرسيتەتىنىڭ (قاز ۇ م ۋ) عالىمدارى جۇرگىزگەن زەرتتەۋ بارىسىندا انىقتالدى، دەپ حابارلايدى Kazinform.

قاز ۇ م ۋ- دىڭ مالىمەتىنشە، زەرتتەۋدىڭ ماقساتى حالىقتىڭ فيزيكالىق بەلسەندىلىگىنىڭ ءتۇرلى اسپەكتىلەرى مەن از قوزعالىستى ءومىر سالتىنىڭ تارالۋىن زەرتتەۋگە ارنالدى. دەرەكتەر ءارتۇرلى جاس توپتارى مەن ەل ايماقتارىن قامتيتىن ساۋالناما ارقىلى جينالدى.

«قازاقستان بويىنشا الماتىلىقتار كەڭسەدە ەڭ ۇزاق ۋاقىت وتىرىپ جۇمىس ىستەيدى. بۇل كورسەتكىش ايەلدەر اراسىندا كۇنىنە ورتا ەسەپپەن 370 مينۋت، ەرلەر اراسىندا 360 مينۋت بولعان. ودان بولەك، الماتىلىقتار ۋاقىتىنىڭ ەداۋىر بولىگىن بەلسەندى فيزيكالىق جۇكتەمەلەرسىز وتكىزەدى. بۇل جۇمىس تۇرىنە، ءومىر سالتىنا، سونداي-اق ۋربانيزاتسيا مەن كولىك قۇرالدارىنىڭ قولجەتىمدىلىگىنە بايلانىستى بولۋى مۇمكىن»، - دەپ حابارلادى قاز ۇ م ۋ- دىڭ باسپا ءسوز قىزمەتى.

بۇل رەتتە استانالىقتاردىڭ كەڭسەدە وتىرىپ جۇمىس ىستەۋدىڭ ورتاشا ۋاقىتى 352 مينۋتتى بولسا، قىزىلوردا وبلىسىندا تاۋلىگىنە 205 مينۋت، تۇركىستان وبلىسىندا 228 مينۋت بولدى.

«ەڭ تومەنگى ۋاقىت كورسەتكىشى اتىراۋ وبلىسىندا. مۇنداعى كورسەتكىشكە كەلسەك، ايەلدەردە 215 مينۋت، ەرلەردە 207 مينۋت. بۇل ايماقتىڭ تۇرعىندارى بەلسەندى ءومىر سالتىمەن نەمەسە فيزيكالىق بەلسەندىلىكتى قاجەت ەتەتىن جۇمىس سيپاتىمەن ەرەكشەلەنەدى»، - دەپ حابارلادى قاز ۇ م ۋ.

سونداي-اق عالىمدار جۇمىستان تىس ۋاقىتتاعى فيزيكالىق بەلسەندىكلىكتى زەرتتەدى. زەرتتەۋ بارىسىندا الماتىلىقتار بوس ۋاقىتتا جاياۋ ءجۇرۋ جانە ۆەلوسيپەد تەبۋمەن بەلسەندى اينالىساتىنى انىقتالدى.

«قالا حالقىنىڭ %72 جاياۋ جۇرۋمەن نەمەسە ۆەلوسيپەد تەبۋدى قالايدى. بۇل حالىقتىڭ بەلسەندى ءومىر سالتىن قالىپتاستىرۋدا قالا ينفراقۇرىلىمىنىڭ ءرولى جوعارى ەكەنىن كورسەتەدى. استانادا بۇل كورسەتكىش تومەن (%61,1). الايدا ول دا قالا تۇرعىندارىنىڭ ومىرىندە جاياۋ جانە ۆەلوسيپەدپەن ءجۇرۋدىڭ ماڭىزدى ەكەنىن كورسەتەدى. اقتوبە وبلىسىندا ەڭ تومەنگى كورسەتكىشى بايقالادى - %49,3. بۇل جاياۋ جۇرگىنشىلەر مەن ۆەلوسيپەدشىلەرگە ارنالعان ينفراقۇرىلىمنىڭ جەتىسپەۋشىلىگى مەن ايماقتاعى كولىككە باعىتتالعان قوزعالىس ۇلگىسىن كورسەتۋى مۇمكىن»، - دەپ حابارلادى قاز ۇ م ۋ- دان.

سونداي-اق بوس ۋاقىتتاعى بەلسەندىلىكتىڭ ەڭ تومەن دەڭگەيى ەگدە جاستاعى ادامداردىڭ اراسىندا انىقتالدى. مۇندا دا اقتوبە وبلىسى كوش باستاپ تۇر.

«جاسى مەن تۇرعىلىقتى جەرىنە قاراماستان، ءار ادام ءوزىنىڭ كۇندەلىكتى رەجيمىنە فيزيكالىق بەلسەندىلىكتى قوسۋى ماڭىزدى. بۇل تازا اۋادا سەرۋەندەۋ، جاتتىعۋ زالىنا بارۋ، ءجۇزۋ، ۆەلوسيپەد تەبۋ نەمەسە ءتىپتى ۇيدە قاراپايىم جاتتىعۋلار بولۋى مۇمكىن. جاياۋ ءجۇرۋ نەمەسە ۆەلوسيپەدپەن جۇرۋگە باسىمدىق بەرۋ كەرەك. بۇل فيزيكالىق جاعدايىڭىزدى جاقسارتىپ قانا قويماي، قورشاعان ورتانىڭ لاستانۋ دەڭگەيىن تومەندەتۋگە كومەكتەسەدى. اسىرەسە، ەگدە جاستاعى ادامداردىڭ بەلسەندى ءومىر سالتىن ۇستانۋى وتە ماڭىزدى. سەبەبى ول كوپتەگەن اۋرۋدىڭ قاۋپىن ازايتۋعا جانە جالپى ءومىر ساپاسىن جاقسارتۋعا كومەكتەسەدى»، - دەدى ب. اتشاباروۆ اتىنداعى ىرگەلى جانە قولدانبالى مەديتسينا عىلىمي-زەرتتەۋ ورتالىعىنىڭ باسشىسى تيمۋر ساليەۆ.