الماتىلىق وقۋشىلار NASA بايقاۋىندا جەڭىسكە جەتتى

الماتى قالاسىنداعى نازاربايەۆ زياتكەرلىك مەكتەبىنىڭ ەكى كومانداسى NASA جانە ا ق ش ۇلتتىق عارىش قوعامى (National Space Society) ۇيىمداستىرعان Space Settlement Contest 2025 حالىقارالىق بايقاۋىندا جەڭىمپاز اتاندى. بۇل تۋرالى وقۋ-اعارتۋ مينيسترلىگىنىڭ باسپاءسوز قىزمەتى حابارلادى.

بايقاۋعا الەمنىڭ 25 ەلىنەن 26 مىڭنان استام وقۋشى قاتىستى. «YURT» جوباسىن ۇسىنعان كوماندانىڭ قۇرامىندا الماتىلىق وقۋشىلار اناستاسيا سوي، يۋليا كيم، كاميلا ەرتىس قىزى جانە ءىلياس داۋلەت بار. ولار ءبىرىنشى ورىندى يەلەندى. كوماندا يۋپيتەردىڭ وربيتاسىمەن قوزعالىپ، ونىڭ گانيمەد جانە كالليستو سەرىكتەرىنە جاقىنداي الاتىن اۆتونومدى عارىش ستانتسياسىنىڭ جوباسىن تانىستىردى.

ستانتسيا 30 مىڭعا جۋىق ادام تۇرۋعا ارنالعان، جاساندى گراۆيتاتسيا جۇيەسىمەن جانە تولىقتاي دەربەس تىرشىلىكپەن قامتاماسىز ەتۋ جۇيەسىمەن جابدىقتالعان.

ەكىنشى ورىندى تاعى ءبىر قازاقستاندىق كوماندانىڭ «يكارۋس» جوباسى يەلەندى. 45 مىڭ تۇرعىنعا ارنالعان گانيمەدتىڭ تومەنگى وربيتاسىندا ورنالاسقان عارىش ستانتسياسىن قۇراستىرۋشىلار - تابىلدى اسان، تەمىربۋلاتوۆ ارمان، ىنكاربەك سابىرجان، قۇزباكوۆا توميريس، جاپاروۆ مۇحيدين، الىشەر باعداۋلەت، بەرىك ءۋالي، نۇرسۇلتان ايسۇلۋ، تايروۆ ارلان، باقىت اسلان. جەتەكشىلەرى - 12 سىنىپ وقۋشىسى ادىلەت ساندىقبايەۆ.

Space Settlement Contest - مەكتەپ وقۋشىلارىنا ارنالعان حالىقارالىق جىل سايىن وتكىزىلەتىن بايقاۋ. ول وقۋشىلاردىڭ ينجەنەرلىك ويلاۋ قابىلەتىن، كرەاتيۆتىلىگىن جانە عىلىمعا ۇمتىلىسىن دامىتۋعا باعىتتالعان.

ايتا كەتەلىك قازاقستان وقۋشىلارى ISF U-15 جازعى گيمنازياداسىندا رەكورد ورناتقان ەدى.