الماتىدان بەيجىڭگە ۇشقالى تۇرعان ۇشاقتىڭ ەسىگى زاقىمدالعان
استانا. قازاقپارات - 13-تامىزدا Air Astana «الماتى-بەيجىڭ» رەيسىن دايىنداۋ كەزىندە اۋە كەمەسىنىڭ ەسىگىن تاماق تاسيتىن ماشينا زاقىمداعانىن حابارلايدى.
«13-تامىزدا ك س 267 الماتى-بەيجىڭ رەيسىن دايىنداۋ كەزىندە اۋە كەمەسىنىڭ ەسىگىن تاماق تاسيتىن ماشينا زاقىمدادى. بۇل رەيستىڭ جولاۋشىلارى بۇگىنگى رەيسپەن دىتتەگەن جەرىنە جەتكىزىلەدى.
اۋەكومپانيا رەيستىڭ كەشىكتىرىلگەنىنە وكىنىپ، وعان اۋەكومپانيا كىنالى ەمەس ەكەنىن اتاپ كورسەتەدى.
Air Astana الماتى حالىقارالىق اۋەجايىن ماتەريالدىق زالال كەلتىرۋدەن باسقا ۇشۋ كەستەسىن بۇزاتىن وقيعالاردىڭ الدىن الۋعا شاقىرادى» دەلىنگەن اۋە كومپانياسى تاراتقان حابارلامادا.
ايتا كەتەيىك، بۇدان بۇرىن 8-تامىزدا استانا-اتىراۋ باعىتى بويىنشا ك س 983 رەيسىن ورىنداۋعا جوسپارلانعان ۇشاق قاتتى جەل كەزىندە ەلوردالىق اۋەجايدا كونتەينەردىڭ سوققىسىنان زاقىمدانعانىن حابارلاعان ەدىك.
