الماتىداعى ورتالىق ستاديون جاڭعىرتىلادى
الماتى. KAZINFORM - باسپاءسوز ءماسليحاتى بارىسىندا قالا اكىمى ەربولات دوسايەۆ ورتالىق ستاديوندا «چەلسي» ماتچىنداعى جاعدايدان كەيىن مەگاپوليستىڭ حالىقارالىق يميدجى تۋرالى جۋرناليستەردىڭ سۇراعىنا جاۋاپ بەردى.
قالا باسشىسى «استانا» مەن «چەلسي» اراسىنداعى ماتچقا 12-جەلتوقساندا ۋەفا كونفەرەنسيالار ليگاسى اياسىندا 21 مىڭعا جۋىق ادام قاتىسقانىن اتاپ ءوتتى.
- ەستەرىڭىزدە بولسا، ءبىز كەشىرىم سۇرادىق. ماتچ باستالعان كەزدە ستاديوننىڭ شىعىس سەكتورىنداعى التى قاتارداعى ورىندىقتار اراسىندا ۋاقتىلى تازالاۋ جۇرگىزىلمەدى. ورتالىق ستاديوننىڭ مەنەدجمەنتى ءتيىستى جۇمىستاردى اتقارمادى، سوندىقتان شارالار قابىلداندى، - دەدى ەربولات دوسايەۆ.
ول وسى فاكتىگە بايلانىستى تۇجىرىمدار جاسالعانىن، ءبىراق ول ويىننىڭ وزىنە ەشقانداي اسەر ەتپەگەنىن جانە اعىلشىن كومانداسى مەن ۋەفا تاراپىنان سۇراقتار مەن شاعىمدار بولماعانىن تىلگە تيەك ەتتى.
- كەلەسى جىلى ءبىز ورتالىق ستاديوندى قايتا قۇرۋدى باستايمىز. ورىندار سانى 32 مىڭعا دەيىن كەڭەيتىلەدى دەپ كۇتىلۋدە. ستاديون بارلىق ستاندارتتارعا ساي بولادى، بۇل جابىق الاڭعا اينالادى. قازىر تاپسىرىس بەرۋشى مەن مەردىگەر اراسىنداعى كەلىسىمشارتتىڭ جاڭا جۇيەسى بويىنشا دامۋ تۇجىرىمداماسى بەكىتىلدى. جوعارى كۋبوكتاردى ەۋروپالىق جانە الەمدىك دەڭگەيدە وتكىزۋگە بولادى. سونىمەن قاتار، مەن ورتالىق ستاديوننىڭ باسشىلىعىنان ساپالى جۇمىس جاسالۋى ءۇشىن ولارعا كومەكتەسەتىن كومپانيالاردى قوسىمشا جالداۋدى سۇرادىم، - دەدى اكىم.
بۇعان دەيىن ورتالىق ستاديون باسقارۋشىسى باۋىرجان جۇماجانوۆ قىزمەتىنەن بوساتىلعانى تۋرالى جازعان ەدىك.
الما مۇقانوۆا
اۆتور
