الماتىداعى تەرگەۋ يزولياتورىنان تاعى ءبىر قاراقالپاق بەلسەندىسى بوساتىلدى
بۇگىن الماتىداعى تەرگەۋ يزولياتورىنان تاعى ءبىر قاراقالپاق بەلسەندىسى زيۋار ميرمانبەتوۆا بوساتىلدى، دەپ حابارلايدى قازاقپارات ەلىمىزدەگى قاراقالپاق دياسپوراسىنىڭ وكىلى اقىلبەك مۇراتبايدىڭ Twitter- دەگى پاراقشاسىنا سىلتەمە جاساپ.
"زيۋار ميرمانبەتوۆا ءبىر جىل بۇرىن وزبەكستان پوليتسياسى مەن ارنايى قىزمەتىنىڭ قاتىسۋىمەن قازاقستان اۋماعىندا ۇستالعان بولاتىن. جالپى، تاشكەنتتىڭ سۇراۋى بويىنشا شەتەلدە قاراقالپاق دياسپوراسىنىڭ 5 وكىلى تۇتقىندالدى. سولاردىڭ ءبىرى تىلەۋبيكە يۋلداشيەۆا ءالى اقتوبەدەگى تەرگەۋ يزولياتورىندا وتىر"، - دەپ جازدى اقىلبەك مۇراتباي.
ونىڭ سوزىنشە، قاراقالپاقتاردى قۋدالاۋ 2022 -جىلدىڭ شىلدە ايىندا قاراقالپاقستانداعى بەيبىت شەرۋگە وق اتۋدان كەيىن باستالعان.
"وندا ونداعان (كەيبىر دەرەكتەر بويىنشا جۇزدەگەن) ادام قازا تاپتى. ءبىرقانشا جۋرناليستەر، زاڭگەرلەر، بلوگەرلەر مەن ازاماتتىق بەلسەندىلەر ۇزاق مەرزىمگە تۇرمەگە قامالدى"، - دەيدى قاراقالپاق دياسپوراسىنىڭ وكىلى.
بۇل وقيعالاردى تەكسەرۋ ءۇشىن پرەزيدەنت ميرزيەۆ مەملەكەتتىك كوميسسيا قۇردى. الايدا ول ۇيىم جۇمىس ىستەپ باستاعالى بەرگى 15 اي ىشىندە ەشبىر ەسەپ جاريالاماعان.
16 -قىركۇيەك كۇنى تۇندە الماتىداعى تەرگەۋ يزولياتورىنان تاعى ءبىر بەلسەندى - رايسا قۇدايبەرگەنوۆا بوساتىلعانىن جازعان ەدىك.
رايسا قۇدايبەرگەنوۆا - قاماۋدان بوساتىلعان ءۇشىنشى بەلسەندى. ودان بۇرىن قازاقستاننىڭ وڭتۇستىك استاناسىنداعى تەرگەۋ يزولياتورىنان قوشقارباي تورەمۇراتوۆ پەن جانگەلدى جاقسىمبەتوۆ بوساتىلعانىن جازعان بولاتىنبىز.
اۆتور
ەربول جانات
⚡ Another Karakalpak activist Ziuar Mirmanbetova was released from the Almaty pre-trial detention center today. A year ago, she was detained on the territory of #Kazakhstan with the participation of the police and special services of #Uzbekistan. In total, at the request of… https://t.co/gswGfEuzo6 pic.twitter.com/Q5F7qM7lmP
— Aqylbek Muratbai (@muratbaiman) October 4, 2023
