الماتىداعى قوناق ۇيلەر باكۋمەن سالىستىرعاندا 3,5 ەسە از - ينۆەستورلارعا جاڭا كرەديت بەرىلمەك

استانا. KAZINFORM - الماتى قالاسىنىڭ اكىمى ەربولات دوسايەۆ قالانىڭ تۋريستىك الەۋەتىن تەجەپ وتىرعان نەگىزگى فاكتورلاردى ايتىپ بەردى. اتاپ ايتقاندا، بۇل - نومىرلىك قوردىڭ شەكتەلۋى جانە MICE جانە EVENT تۋريزمىن دامىتۋ ءۇشىن ماماندانعان ينفراقۇرىلىمنىڭ بولماۋى.

«الماتى قالاسىندا بۇگىندە 11400 ءنومىرى بار 354 قوناق ءۇي جۇمىس ىستەيدى. بۇل باكۋمەن سالىستىرعاندا 3,5 ەسە، تبليسيدەن - 2,7 ەسە، تاشكەنتتەن - 2 ەسە تومەن. وسىعان بايلانىستى جاڭا قوناق ۇيلەر قۇرىلىسىنا ەرەكشە نازار اۋدارىپ وتىرمىز»، - ە. دوسايەۆ ۇكىمەتتىڭ بۇگىنگى وتىرىسىندا.

ينۆەستورلاردى ىنتالاندىرۋ ماقساتىندا «بايتەرەك» ۇلتتىق قورى مەن الماتى ا ك ك جەلىسى بويىنشا «Almaty tourism» جاڭا كرەديتتىك ءونىمى ارقىلى تۋريستىك سالا جوبالارىن جەڭىلدىكپەن قارجىلاندىرۋ باعدارلاماسى ىسكە اسىرىلىپ جاتىر.

بۇگىنگى تاڭدا مەگاپوليستە ينۆەستورلار 227 ميلليارد تەڭگەگە 3,3 مىڭ ءنومىر بولاتىن 7 قوناق ءۇي سالىپ جاتىر، 16 قوناق ءۇيدى جوبالادى. اتالعان شارالار ءۇش جىل ىشىندە نومىرلىك قوردى 17 مىڭ نومىرگە دەيىن 1,5 ەسە ۇلعايتۋعا مۇمكىندىك بەرەدى.

«تۋريستىك قىزمەتتەر ەكسپورتىن ارتتىرۋ ماقساتىندا الماتى قالاسى جوعارى الەۋەتكە يە MICE جانە EVENT تۋريزمىن بەلسەندى دامىتۋدا. الايدا رەسپۋبليكا سارايى، اتاكەنت سەكىلدى مامانداندىرىلعان نىسانداردىڭ توزۋىنا، حالىقارالىق كورمە ستاندارتتارىنا سايكەس كەلمەۋىنە بايلانىستى قالا كوپ فۋنكسيالى كورمەلىك جانە كونسەرت جانە ءىس-شارا الاڭدارى رەتىندە تانىلا المايدى. ال بۇل الماتىنىڭ تۋريستىك الەۋەتىن تولىق اشۋعا مۇمكىندىك بەرمەيدى»، - دەپ اتاپ ءوتتى اكىم.

وسى ورايدا قالادا 8,5-12 مىڭ ورىنعا Freedom Hall، مىڭ ورىنعا Swissotel Grand Hall نىساندارى جوبالانىپ جاتىر.

اۆتور

ايجان سەرىكجان قىزى