الماتىداعى لاي كوشكىنى: 17 جاستاعى ەگىزدەر ءۇيىندى استىندا قالعان

الماتى. KAZINFORM - مەدەۋ اۋدانىنىڭ اكىمى ەركەبۇلان ورازالين لاي كوشكىنىنەن كەيىن ءۇيىندى استىنان ىزدەستىرىلىپ جاتقان وتباسى تۋرالى ايتتى.

ونىڭ ايتۋىنشا، ۇيدە ەرلى-زايىپتى مەن 2007 -جىلى تۋعان ەگىز ۇلى بولعان. بالالار №48-مەكتەپتە وقيدى. ولار سول كۇنى ساباققا بارماعان.

«مەكتەپ ديرەكتورى دا وسىندا. تۇندە پوليتسيا باسقارماسى ارقىلى وتباسىنىڭ ۇيالى تەلەفوندارىن ىزدەدىك. تەلەفوندارعا سيگنال تۇسكەن جوق. تەلەفوندار ۇيدە دەگەن اقپارات بار»، - دەدى اكىم.

سونىمەن قاتار ول كوشكىننىڭ ىقتيمال سەبەپتەرىن اتادى.

«ۇيلەر دۇرىس سالىنباعان. دۇرىس ورناتىلماعان درەناج جۇيەسى جانە تاۋداعى ۇيلەردىڭ جۇكتەمەسى سەبەپ بولۋى مۇمكىن. قازىر ارنايى قۇرىلعان كوميسسيا جۇمىس ىستەپ جاتىر. كەيىنىرەك ءبارى انىقتالادى»، - دەدى اۋدان اكىمى.

بۇعان دەيىن الماتى قالاسى توتەنشە جاعدايلار دەپارتامەنتى مەن رەسپۋبليكالىق جەدەل-قۇتقارۋ جاساعىنىڭ كۇشتەرى ءۇيىندى استىنان ءبىر ەر ادامنىڭ دەنەسىن تاپقانى تۋرالى جازعان بولاتىنبىز.

ەستەرىڭىزگە سالا كەتەيىك، 8-اقپاندا مەدەۋ اۋدانىنىڭ «تاۋ سامالى» شاعىن اۋدانىنداعى وليمپيسكي كوشەسى بويىندا تەحنوگەندىك سيپاتتاعى توپىراقتىڭ لايلانۋى سالدارىنان لاي كوشكىنى بولدى.

اۆتور

الما مۇقانوۆا