الماتىداعى جەر سىلكىنىسىنەن كەيىن جەر ۇيلەردىڭ باعاسى كۇرت كوتەرىلدى

استانا. KAZINFORM - الماتىداعى جەر سىلكىنىسىنەن كەيىن قالادا جەكە سەكتورداعى ۇيلەردىڭ باعاسى قىمباتتاي ءتۇستى. بۇل تۋرالى قازاقستان ريەلتورلارى بىرلەسكەن قاۋىمداستىعى پرەزيدەنتىنىڭ كەڭەسشىسى نينا لۋكيانەنكو ايتتى.

«جەر سىلكىنىسىنەن كەيىن جەكە سەكتورداعى نىسانداردى ساتۋ مەن جالداۋعا قىزىعۋشىلىقتىڭ ءبىرشاما ارتقانى بايقالدى. وسىنىڭ اياسىندا كەي ادامدار باعانى ازداپ كوتەردى. ءبىراق، مۇنداي قىزىعۋشىلىق مامىلەلەرگە ەش اسەر ەتپەدى. بۇل جايت ءۇي مەن پاتەر بويىنشا مامىلەلەر قۇرىلىمىنداعى ۇلەستىڭ قايتا بولىنۋىنە ايتا قويارلىقتاي اسەر ەتەدى دەپ ايتا المايمىن»، - دەدى ول اگەنتتىك تىلشىسىنە بەرگەن سۇحباتىندا.

ونىڭ اتاپ وتۋىنشە، جەر سىلكىنىسىنەن كەيىن ءۇي-جايلاردىڭ قاۋىپسىزدىگىن تەكسەرۋ ماسەلەسى وتكىر كوتەرىلدى.

«جەر سىلكىنىسىنەن كەيىنگى الاڭداۋشىلىق تۇرعىن ۇيلەردىڭ نەمەسە ەسكى تۇرعىن ءۇي قورىنىڭ قاۋىپسىزدىگى، ۇيلەردىڭ تەكتونيكالىق وپىرىلۋ قاۋپى بار ايماقتا ورنالاسۋى، عيماراتتاردىڭ بەرىكتىگى سىندى ماسەلەلەردى تالقىلاۋعا قاراي ويىستى. دەگەنمەن، ساراپشىلاردىڭ سەندىرۋىنشە، ۇيلەر ايماقتىڭ سەيسميكالىق قاۋپى ەسكەرىلە وتىرىپ سالىنادى. قۇرىلىس بارىسىندا قاجەتتى ولشەمشارتتار ساقتالادى. ياعني، الاڭداۋعا ەش نەگىز جوق»، - دەدى نينا لۋكيانەنكو.

اۆتور

مارلان جيەمباي