الماتىداعى بىرنەشە كوشەگە ەرتەڭنەن باستاپ جاڭا اتاۋ بەرىلەدى
الماتى. KAZINFORM - الماتى قالاسى ءماسليحاتىنىڭ كەزەكتەن تىس XVIⅡ سەسسياسى كەزىندە مەگاپوليستىڭ كەي كوشەلەرىنىڭ اتاۋىن وزگەرتۋ ماسەلەسى قارالدى.
بۇعان دەيىن قالالىق ءماسليحاتتىڭ جابىق وتىرىسى كەزىندە الماتىداعى كەيبىر كوشەلەردىڭ اتىن وزگەرتۋ ماسەلەسى كوتەرىلگەنى حابارلانعان بولاتىن. اتاپ ايتقاندا، گاگارين داڭعىلىنىڭ تيميريازيەۆ كوشەسىنەن ءال-فارابي داڭعىلىنا دەيىنگى بولىگىن ەرمەك سەركەبايەۆ داڭعىلى دەپ قايتا اتاۋ، اۋەزوۆ اۋدانى يۋبيلەينايا كوشەسىنە ۆلاديمير تولوكوننيكوۆ اتىن بەرۋ، تۇركسىب اۋدانى «جاس قانات» شاعىن اۋدانىنداعى اتاۋسىز كوشەگە ەسكەندىر حاسانعاليەۆتىڭ ەسىمىن بەرۋ جانە بوستاندىق اۋدانىنداعى اتاۋسىز كوشەگە يۋري پومەرانسەۆ ەسىمىن بەرۋ ۇسىنىلعان.
- الماتى قالاسى ءماسليحاتىنىڭ 2024 -جىلعى 14-مامىرداعى بىرلەسكەن شەشىمىمەن جانە الماتى قالاسى اكىمدىگىنىڭ قاۋلىسىمەن «الماتى قالاسىنىڭ كوشەلەرىنە اتاۋلار بەرۋ جانە قايتا اتاۋ تۋرالى» ۇسىنىس رەسپۋبليكالىق ونوماستيكا كوميسسياسىنىڭ قاراۋىنا جىبەرىلدى. 2024 -جىلعى 29-مامىردا وڭ قورىتىندى الىندى. قاۋلىنىڭ جوباسى 2024 -جىلعى 14-28-مامىر ارالىعىندا «اشىق ن ق ا» پورتالىندا جاريا تالقىلاۋ ءۇشىن ورنالاستىرىلدى. جوبا 16 مىڭنان استام قارالىم مەن 1,5 مىڭ پىكىر جينادى. «اشىق ن ق ا» پورتالىنا كەلىپ تۇسكەن ءاربىر تۇسىنىكتەمەنى زەردەلەۋ جانە تالداۋ ناتيجەسىندە پايدالانۋشىلاردىڭ %88 ى ە. سەركەبايەۆتىڭ اتىن بەرۋدى، ال پايدالانۋشىلاردىڭ %98 ى وزگە كوشەلەرگە اتاۋ بەرۋ تۋرالى ۇسىنىستى قولداعانى انىقتالدى، - دەدى الماتى قالاسى اكىمىنىڭ ورىنباسارى بەيبىت شاحانوۆ.
ءوز كەزەگىندە قالالىق جوسپارلاۋ جانە ۋربانيستيكا باسقارماسىنىڭ باسشىسى نۇرلان بورانبايەۆ تۇرعىندار ءۇشىن مەكەنجايدى اۋىستىرۋ راسىمدەرى تەگىن بولاتىنىن ايتتى.
- ءبىز مەكەنجاي رەگيسترىنىڭ بازاسىن جۇرگىزەمىز. مەكەنجايدى وزگەرتۋ اۆتوماتتى جۇيەدە ىستەلەدى جانە ازاماتتاردىڭ وتىنىشىنە قاراي ولارعا جاڭا مەكەنجايلار بەرىلەدى. بۇل راسىمدەر جەكە تۇلعالار ءۇشىن دە، زاڭدى تۇلعالار ءۇشىن دە تەگىن بولادى، - دەدى باسقارما باسشىسى.
قالالىق ءماسليحات دەپۋتاتتارى جاڭا وزگەرىسكە ءبىراۋىزدان داۋىس بەردى. ءماسليحات شەشىمى ەرتەڭنەن باستاپ كۇشىنە ەنەدى.
اۆتور
دوسبول اتاجان
