الماتىداعى بوكس كەشى: دانيار ەلەۋسىنوۆتىڭ قارسىلاسى جەكپە-جەكتى اياقتاي المادى

استانا. KAZINFORM - قازاقستاندىق بوكسشى دانيار ەلەۋسىنوۆ (11-0، 6 ك و) ۇزاق ۋاقىت ۇزىلىستەن كەيىن رينگكە ورالدى، دەپ حابارلايدى Sports.kz.

ول الماتىدا وتكەن بوكس كەشىندە فيليپپيندىك دجو نوينايمەن (23-4-2، 11 ك و) جۇدىرىقتاستى.

كەزدەسۋ جارتىلاي ورتا سالماقتا ءوتىپ، 9 راۋندقا ەسەپتەلگەن ەدى. بەسىنشى راۋندتان سوڭ نويناي دانياردىڭ سوققىلارىنا شىداي الماي جۇدىرىقتاسۋدان باس تارتتى. سونداي-اق فيليپپيندىك ءبىرىنشى جانە ءتورتىنشى راۋندتتاردا نوكداۋن الدى.

وسىلايشا، دانيار ەلەۋسىنوۆ ءوزىنىڭ كاسىبي مانسابىنداعى ون ەكىنشى جەڭىسىنە قول جەتكىزىپ، WBC Peace بەلدىگىن جەڭىپ الدى. ال دجو نويناي بەسىنشى رەت جەڭىلىسكە ۇشىرادى.

ايتا كەتەيىك، بۇل دانياردىڭ 2021-جىلدىڭ جەلتوقسانىنان كەيىنگى ءبىرىنشى كەزدەسۋى بولاتىن. ول كەزدە قازاقستاندىق سپورتشى تورەشىلەردىڭ ءبىراۋىزدان شەشىمىمەن ارگەنتينالىق بوكسشى حۋان ەرنان لەالدى (15-4-1, 4 ك و) جەڭىپ، IBO نۇسقاسى بويىنشا جارتىلاي ورتا سالماقتا الەم چەمپيونى اتاعىن جەڭىپ العان ەدى.