الماتىدا زاڭسىز جۇمىس ىستەگەن افريكالىقتار ۇستالدى
الماتى. KAZINFORM - الماتىدا افريكا ەلدەرىنەن كەلگەن التى جانە كورشىلەس مەملەكەتتەردەن كەلگەن ءبىر ازامات انىقتالدى.
شەتەلدىكتەر جەكە قۇرىلىس الاڭىندا، مەيرامحانا مەن كولىك جۋۋ ورنىندا زاڭسىز جۇمىس ىستەگەن. ولار پوليتسيا دەپارتەمەنتىنىڭ قابىلداپ-تاراتۋ ورنىنا جەتكىزىلدى.
«شەتەلدىكتەردىڭ جەكە باسىن كۋالاندىراتىن قۇجاتتارى بولماعان. ولار قازاقستان رەسپۋبليكاسىنىڭ كوشى-قون زاڭناماسىن بۇزعانى ءۇشىن قۇقىق بۇزۋشىلار اكىمشىلىك جاۋاپكەرشىلىككە تارتىلىپ، ەلدەن شىعارىلاتىن بولادى. وسى كۇندەرى الماتىدا جەدەل جاعدايدى جاقسارتۋعا، قوعامدىق ءتارتىپتى، جول قاۋىپسىزدىگىن قامتاماسىز ەتۋگە، زاڭسىز كوشى- قوننىڭ جانە باسقا دا زاڭسىز ارەكەتتەردىڭ جولىن كەسۋگە باعىتتالعان «ۋچاستوك» جەدەل- الدىن الۋ ءىس-شاراسى وتكىزىلىپ جاتىر»، - دەدى الماتى قالالىق پد كوشى-قون قىزمەتى باسقارماسىنىڭ باستىعى اسحات بۋتۋنچينوۆ.
ەسكە سالايىق، بۇعان دەيىن الماتىدا زاڭسىز جۇمىس ىستەگەن 22 شەتەلدىك ەلدەن شىعارىلعانىن جازعانبىز.
سونداي- اق الماتىدا شەتەلدىكتەردى زاڭسىز جۇمىسقا العان 65 قازاقستاندىققا ايىپپۇل سالىندى.
اۆتور
دوسبول اتاجان
