الماتىدا زاڭگەر ءارى بلوگەر ادىلەتحان مولداحان ۇستالدى
الماتى. KAZINFORM - الماتىدا 1 ميلليونعا جۋىق وقىرماندارى بار بلوگەر ۇستالدى.
بۇل تۋرالى مالىمەت الەۋمەتتىك جەلىدە تارادى. الماتى قالاسىنىڭ پوليتسيا دەپارتامەنتى اتالعان جاعدايدى راستاپ، تۇسىنىكتەمە بەردى.
- ازامات م. -عا قاتىستى كورىنەۋ جالعان اقپارات تاراتۋ دەرەگى بويىنشا سوتقا دەيىنگى تەرگەپ-تەكسەرۋدى تىركەدى. كۇدىكتى ۋاقىتشا ۇستاۋ يزولياتورىنا قامالدى. تەرگەپ-تەكسەرۋ امالدارى جالعاسىپ جاتىر، - دەپ حابارلادى دەپارتامەنتتەن.
ادىلەتحان مولداحان الەۋمەتتىك جەلىدە قۇقىقتىق سالاداعى بەينەجازبالارىمەن تانىمال. اسىرەسە، ونىڭ ءال-فارابي داڭعىلىندا بولعان جول اپاتى جايلى جاريالاعان بەينەجازبالارى جەلىدە كەڭىنەن تارادى.
ەسكە سالايىق، 21 - ناۋرىزعا قاراعان ءتۇنى Zeekr كولىگىنىڭ جۇرگىزۋشىسى ءال-فارابي داڭعىلىنىڭ بويىمەن كەلە جاتىپ، قارسى قوزعالىس جولاعىنا شىعىپ كەتىپ، Mercedes اۆتوكولىگىمەن سوقتىعىسقان. جول اپاتى سالدارىنان Mercedes كولىگىنىڭ جۇرگىزۋشىسى مەن ەكى جولاۋشىسى وقيعا ورنىندا قازا تاپتى.
اتالعان دەرەك بويىنشا ق ر قىلمىستىق كودەكسىنىڭ 345-بابى 4-بولىگى بويىنشا قىلمىستىق ءىس قوزعالدى. بۇل باپ بويىنشا 10جىلعا دەيىن باس بوستاندىعىنان ايىرۋ جازاسى قاراستىرىلعان.
ىشكى ىستەر ءمينيسترى ەرجان سادەنوۆ الماتىداعى جول اپاتىنان كەيىن ءبىرقاتار باسشى قىزمەتىنەن بوساتىلعانىن مالىمدەدى.
