الماتىدا ورازا ايت مەرەكەسى تويلانىپ جاتىر
الماتى. KAZINFORM - الماتى مەشىتتەرىندە ايت نامازى وقىلدى. قاسيەتتى رامازان ايى اياقتالعاننان كەيىن ءمۇمىن مۇسىلماندار تاڭەرتەڭ مەشىتكە بارىپ ايت نامازىن وقيدى. قازاق جەرىندە قاي زاماننان بار ءداستۇر بۇگىنگى كۇنى دە ءوز جالعاسىن تاۋىپ كەلەدى.
بۇگىن الماتىدا ايت نامازى تاڭعى ساعات 07:00-دە وقىلدى. ءبىراق الماتىلىقتار قالا مەشىتتەرىنە تاڭعى 6-دان باستاپ اعىلا باستادى. اۆتوبۋستا، كوشەدە جايناماز ۇستاپ، باسىنا تاقيا كيگەن ادامداردىڭ قاراسى كوپ بولدى.
بۇگىن مۇسىلمان قاۋىمىنىڭ مەرەكەسى ءۇشىن الاتاۋ اۋدانى باۋىرجان مومىش ۇلى كوشەسىنىڭ بويىنداعى جاڭادان سالىنعان ۇلكەن مەشىت ءبىر كۇنگە اشىلدى. ءدىني نىساننىڭ قۇجاتتارى ءالى تولىق دايىن بولماعاندىقتان، ول كەيىن ۋاقىتشا قايتا جابىلادى.
- ارداقتى الماتىلىقتار! بارشاڭىزدى ورازا ايت مەرەكەسىمەن شىن جۇرەكتەن قۇتتىقتايمىز! قالا تۇرعىندارى مەن مەشىت جاماعاتىنا قولايلى جاعداي جاساۋ ءۇشىن جانە مەشىت اۋلالارىنداعى كولىك قوزعالىسىن رەتتەۋ ماقساتىندا الماتى قالاسى، باۋىرجان مومىش ۇلى كوشەسىنىڭ بويىنداعى ۇلكەن مەشىت ورازا ايت مەرەكەسىنە ءبىر كۇنگە اشىلادى. الايدا، مەشىت قۇجاتتارىنىڭ تولىق بولماۋىنا بايلانىستى ايت نامازىنان كەيىن قايتا ۋاقىتشا جابىلادى. قۇجاتتارى تولىقتاي راسىمدەلىپ، تىركەۋدەن وتكەن سوڭ رەسمي تۇردە اشىلاتىن بولادى، - دەپ جازدى الەۋمەتتىك جەلىدە الماتى قالاسىنىڭ باس يمامى تولەبي وسپان.
جاڭا مەشىت ماڭىندا ۇلكەن اۆتوتۇراق بولعانىنا قاراماستان، كەلگەن كولىكتىڭ كوپتىگىنەن جۇرگىزۋشىلەر كولىكتى ەكىنشى- ءۇشىنشى قاتارمەن تۇراققا قويىپ جاتتى. ال باۋىرجان مومىش ۇلى كوشەسىنىڭ بويىندا تاڭعى 6-دان كەپتەلىس باستالدى. 7-گە قاراي كەپتەلىس موڭكە ءبي كوشەسىنەن رىسقۇلوۆ كوشەسىنە دەيىن جەتتى.
سونداي- اق جول بويىندا پوليتسيا قىزمەتكەرلەرى كولىك قوزعالىسىن باقىلادى، ال جاڭا مەشىت ماڭىندا جەدەل جاردەم جانە ءورت ءسوندىرۋ كولىكتەرى قويىلدى. ال ناماز ۋاقىتىندا مەشىت ءىشى لىق تولدى.
ايت نامازىنان شىققان جۇرت ءبىراز ۋاقىت تارقاسپاي، ءبىر-ءبىرىن قۇتتىقتاپ، قول الىسىپ، ءتوس قاعىستىردى.
ەسكە سالايىق، بۇعان دەيىن وزبەكستان باسشىسى ورازا ايت قارساڭىندا 488 ادامعا راقىمشىلىق جاساعانىن جازعانبىز.
اۆتور
دوسبول اتاجان
