الماتىدا وقيتىن اتىراۋلىق ستۋدەنت UNAI قوسىمشاسىن ويلاپ تاپتى

UNAI қосымшасын жасады
Фото: Атырау өңірлік коммуникациялар қызметі / Kazinform

  اتىراۋ. KAZINFORM - الماتى تەحنولوگيالىق ۋنيۆەرسيتەتىنىڭ 3-كۋرس ستۋدەنتى نۇرداۋلەت بايحانوۆ جاڭا قوسىمشا قۇراستىردى. اتىراۋلىق ستۋدەنت وعان UNAI دەگەن اتاۋ بەرگەن.

جاڭاشىل ستۋدەنت نۇرداۋلەت ءبايحانوۆتىڭ ايتۋىنشا، بۇل قوسىمشامەن ۇ ب ت سۇراقتارىنا دايىندالۋعا، ساراپتاما جاساۋعا، جەكە جانە توپتىق سايىس وتكىزۋگە بولادى.

«قازىر بۇل فورماتتاعى قوسىمشالار كوپ. ءبىراق، UNAI- دىڭ باسقا قوسىمشالاردان بىرنەشە ەرەكشەلىگى بار. بىرىنشىدەن، ونى تەگىن قولدانا الاسىز. ەكىنشىدەن، وقۋشىنىڭ ۇ ب ت- عا دايىندالىپ، ءبىلىم دەڭگەيىنىڭ كوتەرىلگەنىنە ساراپتاما جاساۋعا بولادى. بۇل قوسىمشا «قالاي 100 مىڭ وقۋشىعا كومەكتەسە الامىز؟» دەگەن ىزدەنىستەن تۋىندادى. ماقساتىم - بيىل 100 مىڭ تۇلەكتىڭ وسى باعدارلامانى پايدالانىپ، جوعارى وقۋ ورىندارىنا تەگىن گرانتقا تۇسۋىنە كومەكتەسۋ. قوسىمشا ءار تۇلەكتىڭ ءبىلىمىن جەتىلدىرۋىنە كىشكەنە بولسا دا ۇلەس قوسادى دەگەن ويدامىن»، - دەيدى نۇرداۋلەت بايحانوۆ.

ونىڭ پىكىرىنشە، بىلىكتى مامان اتانۋ ءۇشىن الدىمەن ۇ ب ت- دان جوعارى بالل الۋ قاجەت. جاستار مەملەكەتتىك گرانتپەن جوعارى ءبىلىم الىپ، مامان يەسى اتانسا، ەلىمىزدىڭ الەمدىك دەڭگەيگە شىعۋىنا ۇلەس قوسار ەدى.

«شوقان ءۋاليحانوۆ اتامىزدىڭ «حالىقتىڭ كەمەلىنە كەلىپ، وركەندەپ، ءوسۋى ءۇشىن ەڭ الدىمەن ازاتتىق پەن ءبىلىم قاجەت» دەگەنىن ۇدايى جادىمدا ۇستاپ جۇرەمىن. مەن دە ەلىمنىڭ دامۋىنا وسىلاي ءوز ۇلەسىمدى قوسىپ، حالقىمىزدىڭ جاعدايى جاقسارعانىن قالايمىن»، - دەيدى نۇرداۋلەت بايحانوۆ.

ستۋدەنتتىڭ ايتۋىنشا، UNAI قوسىمشاسىن پايدالانۋ ءۇشىن App Store جانە Play market باعدارلاماسى ارقىلى جۇكتەۋ كەرەك. قوسىمشاعا تىركەلگەن سوڭ، باستاپقى بەتتەگى «ويناۋ» باتىرماسى ارقىلى بىردەن ۇ ب ت- عا دايىندىقتى باستاۋعا بولادى. ال، ارنايى نۇسقاۋلىقتى unai.kz Instagram نەمەسە Tik Tik پاراقشاسىنان كورۋگە مۇمكىندىك بار.

ەسكە سالا كەتەلىك، بۇعان دەيىن اتىراۋلىق عالىمنىڭ شۇبات پەن قىزىلشادان جاساعان سۋسىنى شىعارىلا باستاعانىن حابارلاعان بولاتىنبىز.

اۆتور

جولداسبەك شوپەعۇل

سوڭعى جاڭالىقتار