الماتىدا تۇركى اكادەمياسى شىعارعان عىلىمي ەڭبەكتەر تانىستىرىلدى
الماتى. KAZINFORM - ءال-فارابي اتىنداعى قازاق ۇلتتىق ۋنيۆەرسيتەتىندە تۇركى اكادەمياسى شىعارعان عىلىمي ەڭبەكتەر تۇساۋكەسەرى ءوتتى.
تانىستىرىلعان باسىلىمداردىڭ اراسىندا تۇركى اكادەمياسىنىڭ باستاماسىمەن العاش رەت قازاق تىلىنە اۋدارىلعان قىرىم تاتارلارىنىڭ كورنەكتى وكىلى، تۇركولوگ عالىم بەكير چوبانزادەنىڭ تاڭدامالى عىلىمي تۋىندىلارىنىڭ «ءتىلتۇتقا» اتتى جيناعى بولدى. اتالعان كىتاپقا اۆتوردىڭ كوپجىلدىق زەرتتەۋلەرىنەن قۇرالعان كوپتومدىعىنداعى ەڭبەكتەرى ەندى.
سونىمەن بىرگە، ءىس-شارادا تۇركى اكادەمياسىنىڭ «تۇركى تىلدەرىنىڭ تەرمينولوگيالىق سوزدىكتەرى» جوباسى اياسىندا جارىق كورگەن ەكونوميكا، ءتىل ءبىلىمى جانە اسكەري سالالار بويىنشا تەرميندەر سوزدىكتەرى تانىستىرىلدى. باۋىرلاس ەلدەردىڭ بىلىكتى ماماندارى بىرلەسە ەڭبەك ەتكەن بۇل جوبا عىلىمي تەرمينولوگيانى بىرىزدەندىرۋ جانە تۇركى ەلدەرىنىڭ عىلىمي قاۋىمداستىقتارىن جاقىنداستىرۋ جولىنداعى ماڭىزدى قادام بولماق.
بۇدان بولەك، ءال-فارابي اتىنداعى قازاق ۇلتتىق ۋنيۆەرسيتەتىنىڭ رەكتورى جانسەيىت تۇيمەبايەۆتىڭ تۇركى-موڭعول تىلدىك پاراللەلدەرىن زەرتتەۋشىلەر ءۇشىن جاڭا كوكجيەكتەردى اشاتىن مونوگرافياسى وقىرمان نازارىنا ۇسىنىلدى.
ءىس-شاراعا تۇركى اكادەمياسىنىڭ ۆيتسە-پرەزيدەنتى اسحات كەسىكبايەۆ، ءال-فارابي اتىنداعى قازاق ۇلتتىق ۋنيۆەرسيتەتىنىڭ پرورەكتورى ەركىن دۇيسەنوۆ، تۇركيا رەسپۋبليكاسىنىڭ الماتىداعى باس كونسۋلى ەۆرەن مۇدەرريسوعلۋ، عىلىمي زەرتتەۋ ينستيتۋتتارىنىڭ باسشىلارى جانە عىلىمي قاۋىمداستىق وكىلدەرى قاتىستى.
ايتا كەتۋ كەرەك، بيىل تۇركى اكادەمياسى باۋىرلاس ەلدەر عىلىمى قازىناسىنا قوسىلعان ەلەۋلى ولجا سانالاتىن، كوپتەگەن تىڭ تاقىرىپتىق باعىتتاردى قامتيتىن 64 اتالىم بويىنشا ەڭبەكتەر شىعارۋدى جوسپارلاپ وتىر.
