الماتىدا سىرتقى جارناماعا قويىلاتىن تالاپتار وزگەرەدى

الماتى. KAZINFORM - الماتى قالاسى اكىمدىگى «سىرتقى (كورنەكى) جارناما وبەكتىلەرىن ورناتۋ قاعيدالارىن بەكىتۋ تۋرالى» قاۋلىعا وزگەرىس ەنگىزۋ جوباسىن اشىق ن ق ا پورتالىندا جاريالادى.

اتالعان وزگەرىستەر مەملەكەت باسشىسىنىڭ قولايلى ءارى ەستەتيكالىق تۇرعىدان تارتىمدى قالالىق ورتانى قالىپتاستىرۋعا، سونداي-اق «الماتى - ەشقاشان ۇيىقتامايتىن قالا» تۇجىرىمداماسىن دامىتۋعا باعىتتالعان تاپسىرمالارىن ىسكە اسىرۋ ماقساتىندا ەنگىزىلمەك.

- مەگاپوليستەردى دامىتۋ ۇردىستەرى قالالىق ينفراقۇرىلىم ساپاسىن ارتتىرۋدى، ساۋلەتتىك ورتانىڭ كورنەكى ۇيلەسىمدىلىگىن قامتاماسىز ەتۋدى، ءبىرىڭعاي ديزاين-كود قالىپتاستىرۋدى جانە قالا تۇرعىندارى مەن قوناقتارى ءۇشىن قولايلى جاعداي جاساۋدى تالاپ ەتەدى. وسىعان بايلانىستى قولدانىستاعى تالاپتاردى تۇراقتى دامۋ قاعيداتتارىنا سايكەستەندىرۋ جانە نورماتيۆتىك رەتتەۋدى جەتىلدىرۋ قاجەتتىلىگى تۋىنداپ وتىر، - دەلىنگەن جوبادا.

ۇسىنىلىپ وتىرعان وزگەرىستەر:

- قالالىق ينفراقۇرىلىم وبەكتىلەرىنە قويىلاتىن تالاپتاردى جۇيەلەۋ؛

- قالانىڭ ساۋلەتتىك كەلبەتىنىڭ ەستەتيكالىق تۇتاستىعىن قامتاماسىز ەتۋ؛

- شاعىن جانە ورتا بيزنەستىڭ دامۋىنا قولايلى جاعداي جاساۋ؛

- قالانىڭ ينۆەستيتسيالىق تارتىمدىلىعىن ارتتىرۋ؛

- الماتى قالاسىنىڭ زاماناۋي ءارى سەرپىندى دامىپ كەلە جاتقان مەگاپوليس رەتىندەگى يميدجىن نىعايتۋ.

جوبا 26 - ناۋرىزدا جاريالانعان جانە 10- ساۋىرگە دەيىن تالقىلاۋدا بولادى.

ەسكە سالايىق، 2023 -جىلى جەلتوقسان ايىندا الماتى قالاسىنىڭ ءماسليحاتى قالانىڭ ديزاين-كودىن بەكىتتى.